AEE ଶିଶିର କୁମାର ଦାଶଙ୍କ ସମ୍ପତ୍ତି ଉପରେ ଭିଜିଲାନ୍ସ ଚଢ଼ାଉ: ୨ଟି ବହୁତଳ କୋଠା, ୬ ମୂଲ୍ୟବାନ ପ୍ଲଟ୍ ଠାବ
ଭୁବନେଶ୍ୱର: ଆୟବହିର୍ଭୂତ ସମ୍ପତ୍ତି ସନ୍ଦେହରେ ମାଥିଲି ବ୍ଲକରେ କାର୍ଯ୍ୟରତ ତଥା DRDA, ମାଲକାନଗିରି ସହ ସଂଲଗ୍ନ AEE ଶିଶିର କୁମାର ଦାଶଙ୍କ ସମ୍ପତ୍ତି ଉପରେ ଭିଜିଲାନ୍ସ ପକ୍ଷରୁ ଚାଲିଥିବା ଚଢ଼ାଉ ବେଳେ ବହୁ ମୂଲ୍ୟବାନ ସମ୍ପତ୍ତିର ସନ୍ଧାନ ମିଳିଛି। ଘର ତଲାସି ଜାରି ରହିଥିବା ବେଳେ ଏପର୍ଯ୍ୟନ୍ତ ୨ଟି ବହୁତଳ କୋଠା, ୬ଟି ମୂଲ୍ୟବାନ ପ୍ଲଟ୍ ସମେତ ଏକାଧିକ ଯାନବାହନ ଠାବ କରାଯାଇଛି।
ଭିଜିଲାନ୍ସର ପ୍ରାଥମିକ ସୂଚନା ଅନୁଯାୟୀ, ଶ୍ରୀ ଦାଶ ଓ ତାଙ୍କ ପରିବାର ସଦସ୍ୟଙ୍କ ନାମରେ ନିମ୍ନଲିଖିତ ସମ୍ପତ୍ତି ମିଳିଛି—
୧. ଭୁବନେଶ୍ୱରରେ ୪ ମହଲା କୋଠା: ବରମୁଣ୍ଡା ଅଞ୍ଚଳରେ ପ୍ରାୟ ୬,୭୬୦ ବର୍ଗଫୁଟ୍ ପରିମିତ ଏକ ୪ ମହଲା କୋଠା ଠାବ ହୋଇଛି।
୨. ବ୍ରହ୍ମପୁରରେ ଦୁଇ ମହଲା କୋଠା: ନୀଳାଚଳ ନଗରରେ ପ୍ରାୟ ୨,୫୦୦ ବର୍ଗଫୁଟ୍ ଅଞ୍ଚଳରେ ନିର୍ମିତ ଏକ ଦୁଇ ମହଲା କୋଠାର ସନ୍ଧାନ ମିଳିଛି।
୩. ୬ଟି ମୂଲ୍ୟବାନ ପ୍ଲଟ୍: ବ୍ରହ୍ମପୁରରେ ୩ଟି, ପୁରୀରେ ୧ଟି, ଖୋର୍ଦ୍ଧାରେ ୧ଟି ଏବଂ ଗଞ୍ଜାମ ଜିଲ୍ଲାର ଗୋବରାରେ ୧ଟି ପ୍ଲଟ୍ ଠାବ କରାଯାଇଛି।
ଠାବ ହୋଇଥିବା କୋଠା ଓ ପ୍ଲଟ୍ଗୁଡ଼ିକର ପ୍ରକୃତ ମାପ, ମୂଲ୍ୟାୟନ ଏବଂ ଆକଳନ ପାଇଁ ଭିଜିଲାନ୍ସର ଟେକ୍ନିକାଲ ୱିଙ୍ଗ୍ ପକ୍ଷରୁ ଯାଞ୍ଚ ଜାରି ରହିଛି।
ଏହାସହିତ ବ୍ୟାଙ୍କ ଓ ଡାକଘରରେ ଥିବା ଜମାରାଶି ସମେତ ଅନ୍ୟାନ୍ୟ ନିବେଶର ତଥ୍ୟ ମଧ୍ୟ ସଂଗ୍ରହ କରାଯାଉଛି।
୪. ଯାନବାହନ: ତଲାସି ସମୟରେ ଗୋଟିଏ Hyundai i10 କାର୍ ସହ ୩ଟି ଦୁଇଚକିଆ ଯାନ ମିଳିଛି। ଏଥିରେ Yamaha FZS, Hero Splendor ଏବଂ Yamaha Cygnus ସ୍କୁଟର ରହିଛି।
ଭିଜିଲାନ୍ସ ପକ୍ଷରୁ ସମ୍ପତ୍ତି ସମ୍ପର୍କିତ ତଥ୍ୟର ଯାଞ୍ଚ ଓ ମୂଲ୍ୟାୟନ ଜାରି ରହିଛି। ତଲାସି ଶେଷ ହେବା ପରେ ଆହୁରି ସମ୍ପତ୍ତିର ତଥ୍ୟ ସାମ୍ନାକୁ ଆସିପାରେ। ଏନେଇ ଭିଜିଲାନ୍ସ ପକ୍ଷରୁ ପରବର୍ତ୍ତୀ ରିପୋର୍ଟ ଦିଆଯିବ।