ଇପିଏଫ୍ଓ ବେତନ ସୀମା ୧୫ ହଜାରରୁ ୨୫ ହଜାର ଟଙ୍କାକୁ ବୃଦ୍ଧି
ନୂଆଦିଲ୍ଲୀ: କର୍ମଚାରୀଙ୍କ ସାମାଜିକ ସୁରକ୍ଷାକୁ ଆହୁରି ବ୍ୟାପକ କରିବା ଲକ୍ଷ୍ୟରେ କେନ୍ଦ୍ର ସରକାର ବଡ଼ ନିଷ୍ପତ୍ତି ନେଇଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ କେନ୍ଦ୍ରୀୟ କ୍ୟାବିନେଟ୍ କର୍ମଚାରୀ ଭବିଷ୍ୟନିଧି ସଂଗଠନ (ଇପିଏଫ୍ଓ)ରେ ବାଧ୍ୟତାମୂଳକ କଭରେଜ୍ ପାଇଁ ମାସିକ ବେତନ ସୀମାକୁ ୧୫,୦୦୦ ଟଙ୍କାରୁ ବଢ଼ାଇ ୨୫,୦୦୦ ଟଙ୍କା କରିବାକୁ ମଞ୍ଜୁରି ଦେଇଛି।
ଏହି ନିଷ୍ପତ୍ତି ଫଳରେ ୫୧ ଲକ୍ଷରୁ ଅଧିକ ଅତିରିକ୍ତ କର୍ମଚାରୀ ଇପିଏଫ୍ଓର ଅନିବାର୍ଯ୍ୟ ସାମାଜିକ ସୁରକ୍ଷା ବ୍ୟବସ୍ଥାରେ ସାମିଲ ହେବେ ବୋଲି ଆଶା କରାଯାଉଛି। ଏହା ଦ୍ୱାରା ଭବିଷ୍ୟନିଧି ସଞ୍ଚୟ, ପେନ୍ସନ୍ ସୁବିଧା ଓ ବୀମା ସୁରକ୍ଷାର ଲାଭ ଅଧିକ କର୍ମଚାରୀଙ୍କ ପାଖରେ ପହଞ୍ଚିବ।
୨୦୦୪ରୁ ୨୦୧୪ ପର୍ଯ୍ୟନ୍ତ ଇପିଏଫ୍ଓର ବେତନ ସୀମାରେ କୌଣସି ପରିବର୍ତ୍ତନ ହୋଇନଥିଲା। ପରେ ୨୦୧୪ ସେପ୍ଟେମ୍ବରରେ ଏହାକୁ ୧୫,୦୦୦ ଟଙ୍କା କରାଯାଇଥିଲା। ଦେଶରେ ବେତନ ଓ ଆୟ ବୃଦ୍ଧି ସହ ଔପଚାରିକ ନିଯୁକ୍ତିର ପରିସର ବଢ଼ୁଥିବାରୁ ବର୍ତ୍ତମାନ ସୀମା ବୃଦ୍ଧି କରାଯାଇଛି।
ବର୍ତ୍ତମାନ ୧୫,୦୦୦ ଟଙ୍କାରୁ ଅଧିକ ମାସିକ ବେତନରେ ଚାକିରିରେ ଯୋଗଦେଉଥିବା ନୂଆ କର୍ମଚାରୀମାନେ ସ୍ୱତଃସ୍ଫୂର୍ତ୍ତ ଭାବେ ଇପିଏଫ୍ ବ୍ୟବସ୍ଥାରେ ସାମିଲ ହେଉନଥିଲେ। ବେତନ ସୀମା ୨୫,୦୦୦ ଟଙ୍କାକୁ ବଢ଼ିବା ପରେ ୧୫ରୁ ୨୫ ହଜାର ଟଙ୍କା ବେତନ ପାଉଥିବା ବହୁ କର୍ମଚାରୀ ବାଧ୍ୟତାମୂଳକ ଭାବେ ଭବିଷ୍ୟନିଧି, ପେନ୍ସନ୍ ଓ ବୀମା ସୁରକ୍ଷା ପରିସରକୁ ଆସିବେ।
ଏହି ମଞ୍ଜୁରି ଅନୁସାରେ କର୍ମଚାରୀମାନେ ଇପିଏଫ୍ ଅଧୀନରେ ସଞ୍ଚୟ, କର୍ମଚାରୀ ପେନ୍ସନ୍ ଯୋଜନା (ଇପିଏସ୍) ଅଧୀନରେ ପେନ୍ସନ୍ ଏବଂ କର୍ମଚାରୀ ଜମା-ସଂଯୁକ୍ତ ବୀମା ଯୋଜନା (ଇଡିଏଲ୍ଆଇ) ଅଧୀନରେ ବୀମା ସୁବିଧା ପାଇପାରିବେ। ଏହା ସହିତ ବର୍ତ୍ତମାନର ବେତନ ଗଠନକୁ ଧ୍ୟାନରେ ରଖି ଆଇନଗତ ଅବଦାନ ଓ ପେନ୍ସନ୍ଯୋଗ୍ୟ ବେତନ ବ୍ୟବସ୍ଥାରେ ମଧ୍ୟ ସୁଧାର ଆସିବ।
ଏହି ପ୍ରସ୍ତାବ ଉପରେ ବିଭିନ୍ନ ମନ୍ତ୍ରଣାଳୟ ମଧ୍ୟରେ ବିସ୍ତୃତ ଆଲୋଚନା ହୋଇଥିଲା। ୨୦୨୬ ଜୁନ୍ ୧୬ ତାରିଖରେ ଅନୁଷ୍ଠିତ ବ୍ୟୟ ଅର୍ଥ କମିଟିର ବୈଠକରେ ମଧ୍ୟ ଏହି ପ୍ରସ୍ତାବକୁ ସୁପାରିଶ କରାଯାଇଥିଲା। ବର୍ତ୍ତମାନର ବାର୍ଷିକ ୧୦,୨୫୦ କୋଟି ଟଙ୍କା ସରକାରୀ ବଜେଟ୍ ସହାୟତା ତୁଳନାରେ ନୂଆ ବ୍ୟବସ୍ଥାରେ ବାର୍ଷିକ ସରକାରୀ ବ୍ୟୟ ପ୍ରାୟ ୧୧,୩୩୯ କୋଟି ଟଙ୍କା ହେବ। ପାଞ୍ଚ ବର୍ଷରେ ମୋଟ ବ୍ୟୟ ପ୍ରାୟ ୫୬,୬୯୬ କୋଟି ଟଙ୍କା ହେବାର ଆକଳନ କରାଯାଇଛି।
ଇପିଏଫ୍ଓ ବର୍ତ୍ତମାନ ବିଶ୍ୱର ଅନ୍ୟତମ ବୃହତ୍ ସାମାଜିକ ସୁରକ୍ଷା ସଂଗଠନ ଭାବେ ଇପିଏଫ୍, ଇପିଏସ୍ ଓ ଇଡିଏଲ୍ଆଇ ଯୋଜନା ପରିଚାଳନା କରୁଛି। ସର୍ବଶେଷ ତଥ୍ୟ ଅନୁସାରେ ପ୍ରାୟ ୭.୬୮ ଲକ୍ଷ ପ୍ରତିଷ୍ଠାନରେ ୭.୯୮ କୋଟି ଅବଦାନକାରୀ ସଦସ୍ୟ ରହିଛନ୍ତି। ଏହା ସହିତ ଇପିଏସ୍ ଅଧୀନରେ ପ୍ରାୟ ୮୨ ଲକ୍ଷ ପେନ୍ସନ୍ଭୋଗୀ ଲାଭ ପାଉଛନ୍ତି।
ସରକାରଙ୍କ ମତରେ, ଏହି ନିଷ୍ପତ୍ତି ନିଯୁକ୍ତିର ଔପଚାରିକୀକରଣ, କର୍ମଚାରୀ ଧରିରଖିବା, କାର୍ଯ୍ୟକ୍ଷେତ୍ରର ସ୍ଥିରତା ଓ ଦୀର୍ଘମିଆଦୀ ଅବସର ସୁରକ୍ଷାକୁ ଆହୁରି ମଜବୁତ କରିବ। ବିକଶିତ ଭାରତ@୨୦୪୭ ଲକ୍ଷ୍ୟ ଦିଗରେ ଏହା ସାମାଜିକ ସୁରକ୍ଷା ବ୍ୟବସ୍ଥାକୁ ଅଧିକ ସମାବେଶୀ ଓ ଭବିଷ୍ୟତମୁଖୀ କରିବାରେ ସହାୟକ ହେବ।
ନିଷ୍ପତ୍ତିର କାର୍ଯ୍ୟକାରିତା ପାଇଁ ଶ୍ରମ ଓ ନିଯୁକ୍ତି ମନ୍ତ୍ରଣାଳୟ ଏବଂ ଇପିଏଫ୍ଓ ପକ୍ଷରୁ ଆବଶ୍ୟକ ଆଇନଗତ ଓ ପ୍ରଶାସନିକ ପଦକ୍ଷେପ ଗ୍ରହଣ କରାଯିବ।
