ଆଗ୍ରା ମେଟ୍ରୋ ପ୍ରକଳ୍ପ ନିର୍ମାଣ କାର୍ଯ୍ୟ ଉଦଘାଟନ କଲେ ପ୍ରଧାନମନ୍ତ୍ରୀ
● ଦେଶର ଭିତ୍ତିଭୂମି ବିକାଶ ନିମନ୍ତେ ସମଗ୍ର ବିଶ୍ଵରୁ ପୁଞ୍ଜି ନିବେଶ ଆକୃଷ୍ଟ କରିବା ପାଇଁ ଚେଷ୍ଟା କରାଯାଉଛି – ପ୍ରଧାନମନ୍ତ୍ରୀ
● ସ୍ଵଦେଶ ଦର୍ଶନ ଓ ପ୍ରସାଦ ଯୋଜନା ମାଧ୍ୟମରେ ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ହେଉଛି ପ୍ରୟାସ – ପ୍ରଧାନମନ୍ତ୍ରୀ
● ଘରୋଇ କ୍ରେତା ଓ ନିର୍ମାତାଙ୍କ ମଧ୍ୟରେ ବିଶ୍ଵାସ ବୃଦ୍ଧି ପାଇଁ ରେରା ଆଇନ ପ୍ରବର୍ତ୍ତିତ – ପ୍ରଧାନମନ୍ତ୍ରୀ
● ପ୍ରଧାନମନ୍ତ୍ରୀ ଆବାସ ଯୋଜନା ଅଧୀନରେ 12 ଲକ୍ଷ ସହରାଞ୍ଚଳ ମଧ୍ୟବିତ୍ତ ପରିବାରଙ୍କୁ ଘର କିଣିବା ପାଇଁ ଦିଆଯାଇଛି 28 ହଜାର କୋଟି ଟଙ୍କାର ସାହାଯ୍ୟ – ପ୍ରଧାନମନ୍ତ୍ରୀ
ଜେ ବି ଏନ, ୮/୧୨/୨୦୨୦, ନୂଆଦିଲ୍ଲୀ : ଉତ୍ତରପ୍ରଦେଶର ଆଗ୍ରାଠାରେ ଆଗ୍ରା ମେଟ୍ରୋ ପ୍ରକଳ୍ପ ନିର୍ମାଣ କାର୍ଯ୍ୟ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଦ୍ଵାରା ଭିଡିଓ କନଫରେନ୍ସ ମାଧ୍ୟମରେ ଉଦଘାଟିତ ହୋଇଛି । କେନ୍ଦ୍ର ଆବାସ ଓ ସହରାଞ୍ଚଳ ବ୍ୟାପାର ମନ୍ତ୍ରୀ ଶ୍ରୀ ହରଦୀପ ସିଂହ ପୁରୀ, ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଓ ଅନ୍ୟାନ୍ୟ ଗଣମାନ୍ୟ ବ୍ୟକ୍ତି ଏହି ଅବସରରେ ଉପସ୍ଥିତ ଥିଲେ ।
ଏଥିରେ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଛନ୍ତି, ସବୁଠାରୁ ବଡ ସମସ୍ୟା ହେଲା ନୂତନ ପ୍ରକଳ୍ପ ଘୋଷଣା ହେଲେ ମଧ୍ୟ ସେଥିପାଇଁ ଅର୍ଥ କେଉଁଠୁ ଆସିବ ସେ ବିଷୟରେ ଚିନ୍ତା କରାଯାଉ ନାହିଁ । ପ୍ରକଳ୍ପ ଆରମ୍ଭରୁ ହିଁ ଏଥିପାଇଁ ଆବଶ୍ୟକ ପାଣ୍ଠି ସରକାର ସୁନିଶ୍ଚିତ କରୁଛନ୍ତି ।
ପ୍ରଧାନମନ୍ତ୍ରୀ କହିଛନ୍ତି, ଜାତୀୟ ଭିତ୍ତିଭୂମି ପାଇପ ଲାଇନ ପ୍ରକଳ୍ପ ଅଧୀନରେ 1 ଲକ୍ଷ କୋଟି ଟଙ୍କା ବ୍ୟୟ ହେବ । ଏହାଛଡା ବହୁମୂଖୀ ଭିତ୍ତିଭୂମି ସଂଯୋଗକାରୀ ବୃହତ ଯୋଜନା ପାଇଁ କାର୍ଯ୍ୟ ମଧ୍ୟ ଚାଲୁ ରହିଛି । ଦେଶର ଭିତ୍ତିଭୂମି ସୁଦୃଢ କରିବା ପାଇଁ ସମଗ୍ର ବିଶ୍ଵରୁ ପୁଞ୍ଜି ନିବେଶ ଆକୃଷ୍ଟ କରିବା ଲାଗି ଉଦ୍ୟମ ଜାରି ରହିଥିବା ଶ୍ରୀ ମୋଦୀ ପ୍ରକାଶ କରିଛନ୍ତି । ପର୍ଯ୍ୟଟନ କ୍ଷେତ୍ର ଯେଉଁଥିରେ କି ସମସ୍ତଙ୍କ ନିମନ୍ତେ ରୋଜଗାରର ଅବକାଶ ରହିଛି ସେ କ୍ଷେତ୍ରରେ ଇ-ଭିସା ସୁବିଧା ପାଇଁ ଅଧିକ ଦେଶକୁ ସରକାର ଅନ୍ତର୍ଭୁକ୍ତ କରିଥିବା ବେଳେ ହୋଟେଲ ରୁମ ଶୁଳ୍କ ମଧ୍ୟ ଆଶାତୀତ ଭାବେ ହ୍ରାସ ପାଇଥିବା ପ୍ରଧାନମନ୍ତ୍ରୀ କହିଛନ୍ତି । ସ୍ଵଦେଶ ଦର୍ଶନ ଓ ପ୍ରସାଦ ଯୋଜନା ମାଧ୍ୟମରେ ଅଧିକ ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ଉଦ୍ୟମ ହେଉଛି । ସରକାରଙ୍କ ପ୍ରଚେଷ୍ଟା ଯୋଗୁଁ ଯାତ୍ରା ଓ ପର୍ଯ୍ୟଟନ ସୂଚୀରେ ଭାରତ ଏବେ 34ତମ ସ୍ଥାନରେ ରହିଛି । 2013ରେ ଭାରତ ଏହି ସୂଚୀରେ 65ତମ ସ୍ଥାନରେ ଥିଲା । କରୋନା ସ୍ଥିତିରେ ସୁଧାର ଆସିବା ସହ ପର୍ଯ୍ୟଟନ କ୍ଷେତ୍ରରେ ମଧ୍ୟ ଚମକ ଆସିବ ବୋଲି ଶ୍ରୀ ମୋଦୀ ଆଶା ପ୍ରକାଶ କରିଥିଲେ ।
ପ୍ରଧାନମନ୍ତ୍ରୀ କହିଛନ୍ତି, ବର୍ତ୍ତମାନ ଦେଶରେ ସଂସ୍କାର ପ୍ରକ୍ରିୟା ଅଧାପନ୍ତରିଆ ନହୋଇ ପୁରା ଦମ୍ରେ ଚାଲିଛି । ସେ କହିଛନ୍ତି ଯେ, ବର୍ତ୍ତମାନ ନଗରଗୁଡିକର ବିକାଶ କାର୍ଯ୍ୟ 4ଟି ସ୍ତରରେ ହେଉଛି । ସେଗୁଡିକ ହେଲା ଦୀର୍ଘଦିନ ଧରି ପଡିରହିଥିବା ସମାସ୍ୟାର ସମାଧାନ, ସ୍ଵଚ୍ଛନ୍ଦ ରହଣି, ସର୍ବାଧିକ ବିନିଯୋଗ ଓ ଆଧୁନିକ ପ୍ରଯୁକ୍ତିବିଦ୍ୟାର ଅଧିକ ଉପଯୋଗ ।
ପ୍ରଧାନମନ୍ତ୍ରୀ କହିଛନ୍ତି ଯେ, ଘର କିଣୁଥିବା ବ୍ୟକ୍ତି ଓ ନିର୍ମାଣକାରୀଙ୍କ ମଧ୍ୟରେ ବିଶ୍ଵାସର ଏକ ବ ବ୍ୟବଧାନ ସୃଷ୍ଟି ହୋଇଛି । କିଛି ଲୋକ ଉଦ୍ଦେଶ ପ୍ରଣୋଦିତ ଭାବେ ମନ୍ଦ ଅଭିପ୍ରାୟ ରଖି ସମଗ୍ର ଭୂ-ସମ୍ପତ୍ତି କ୍ଷେତ୍ରକୁ ବଦନାମ କରିବା ଯୋଗୁଁ ମଧ୍ୟବିତ୍ତ ଶ୍ରେଣୀୟ ବ୍ୟକ୍ତ ଦୁଶ୍ଚିନ୍ତାରେ ରହୁଛନ୍ତି । ଏହି ସମସ୍ୟାର ସମାଧାନ ପାଇଁ ରେରା (ଆରଇଆରଏ) ଆଇନ ପ୍ରବର୍ତ୍ତନ କରାଯାଇଛି । ଏହି ଆଇନ ପ୍ରବର୍ତ୍ତନ ପରେ ମଧ୍ୟବିତ୍ତ ଶ୍ରେଣୀ ଲୋକଙ୍କ ପାଇଁ କୋଠାବାଡି ନିର୍ମାଣ କାର୍ଯ୍ୟ ଶୀଘ୍ର ଶେଷ ହେବା ଦେଖାଯାଉଛି । ଅତ୍ୟାଧୁନିକ ସାଧାରଣ ପରିବହନଠାରୁ କୋଠାବାଡ଼ି ପର୍ଯ୍ୟନ୍ତ କ୍ଷେତ୍ରରେ ସର୍ବାଙ୍ଗୀନ ବିକାଶ ପରିଲକ୍ଷିତ ହୋଇଥିବା ଶ୍ରୀ ମୋଦୀ କହିଛନ୍ତି ।
ଶ୍ରୀ ମୋଦୀ କହିଛନ୍ତି ଯେ, ପ୍ରଧାନମନ୍ତ୍ରୀ ଆବାସ ଯୋଜନା ଆଗ୍ରାରେ ଉଦଘାଟିତ ହେବା ପରଠାରୁ ସହରାଞ୍ଚଳ ଗରିବ ଲୋକଙ୍କ ନିମନ୍ତେ 1 କୋଟିରୁ ଉର୍ଦ୍ଧ୍ଵ ଆବାସସ୍ଥଳୀ ଅନୁମୋଦିତ ହୋଇଛି । ସହରର ମଧ୍ୟବିତ୍ତ ଶ୍ରେଣୀ ନିମନ୍ତେ ପ୍ରଥମ ଘର କିଣିବା ପାଇଁ ସହାୟତା ପ୍ରଦାନ କରାଯାଉଛି । ଘର କିଣିବା ନିମନ୍ତେ ଏପର୍ଯ୍ୟନ୍ତ 12 ଲକ୍ଷ ମଧ୍ୟବିତ୍ତ ଶ୍ରେଣୀର ଲୋକଙ୍କୁ 28 ହଜାର କୋଟି ଟଙ୍କାର ସହାୟତା ପ୍ରଦାନ କରାଯାଇଛି । ଅମୃତ ମିଶନ ଅଧୀନରେ ଜଳ ଓ ବର୍ଜ୍ୟ ବସ୍ତୁ ନିଷ୍କାସନ ବ୍ୟୁ ବ୍ୟବସ୍ଥାର ଭିତ୍ତିଭୂମିକୁ ଉନ୍ନତି କରାଯାଇଛି । 2014 ପୂର୍ବରୁ 225 କିଲୋମିଟର ମେଟ୍ରୋ ଲାଇନ ଥିବାବେଳେ 2014 ପରଠାରୁ 450 କିଲୋମିଟର ମେଟ୍ରୋ ଲାଇନ କାର୍ଯ୍ୟକ୍ଷମ ହୋଇଛି । 1 ହଜାର କିଲୋମିଟର ଦୀର୍ଘ ମେଟ୍ରୋ ଲାଇନ କାର୍ଯ୍ୟ ଦ୍ରୁତଗତିରେ ଆଗେଇ ଚାଲିଛି । ଦେଶର 27ଟି ନଗରୀରେ ଏହି କାର୍ଯ୍ୟ ଚାଲିଛି ବୋଲି ଶ୍ରୀ ମୋଦୀ କହିଛନ୍ତି ।
ଆଗ୍ରା ମେଟ୍ରୋ ପ୍ରକଳ୍ପର ଦୈର୍ଘ୍ୟ 29.4 କିଲୋମିଟର ହୋଇଥିବା ବେଳେ ଏଥିରେ 2ଟି କରିଡର ରହିଛି । ଏହା ପର୍ଯ୍ୟଟନ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ତାଜମହଲ, ଆଗ୍ରା ଦୁର୍ଗ, ସିକନ୍ଦର ସମେତ ରେଳ ଷ୍ଟେସନ ଓ ବସଷ୍ଟାଣ୍ଡକୁ ସଂଯୋଗ କରୁଛି । ଏହି ପ୍ରକଳ୍ପ ଯୋଗୁଁ ଆଗ୍ରା ମହାନଗରୀର 24 ଲକ୍ଷ ଜନସାଧାରଙ୍କ ସମେତ ପ୍ରତିବର୍ଷ ଆଗ୍ରାକୁ ଆସୁଥିବା 60 ଲକ୍ଷ ପର୍ଯ୍ୟଟକ ଉପକୃତ ହେବେ । ଏହା ଏକ ପରିବେଶ ଅନୁକୂଳ ମାସ୍ ରାପିଡ଼ ଟ୍ରାଂସିଟ ସିଷ୍ଟମ ବା ସର୍ବସାଧାରଣଙ୍କ ପାଇଁ ଉଦିଷ୍ଟ ପରିବହନ ବ୍ୟବସ୍ଥା ପ୍ରଦାନ କରିବ । 5 ବର୍ଷରେ ସଂପୂର୍ଣ୍ଣ ହେବାକୁ ଥିବା ଏହି ପ୍ରକଳ୍ପ ବାବଦକୁ ପ୍ରାୟ 8,380 କୋଟି ଟଙ୍କା ଖର୍ଚ୍ଚ ଆକଳନ କରାଯାଇଛି । ପୂର୍ବରୁ ଗତ ବର୍ଷ ମାର୍ଚ୍ଚ 8 ତାରିଖ ଦିନ ପ୍ରଧାନମନ୍ତ୍ରୀ ଶ୍ରୀ ମୋଦୀ ଆଗ୍ରା ମେଟ୍ରୋ ପ୍ରକଳ୍ପ ସହ ଲକ୍ଷ୍ନୌ ମେଟ୍ରୋର 23 କିଲୋମିଟର ଦୀର୍ଘ ଉତ୍ତର-ଦକ୍ଷିଣ କରିଡରର ସିସିଏ ବିମାନ ବନ୍ଦରରୁ ମୁନିଶିପୁଲିଆ ପର୍ଯ୍ୟନ୍ତ ବାଣିଜ୍ୟିକ କାରବାର ପଥର ଶୁଭାରମ୍ଭ କରିଥିଲେ ।
