ବଡ଼ବିଲ ଲାଇଟ୍ ହାଉସ୍ ପକ୍ଷରୁ ଏକଦିବସୀୟ ନିଯୁକ୍ତି ମେଳା ଆୟୋଜିତ।
ବଡ଼ବିଲ୍ ସହରର ବଡ଼ବିଲ୍ ଶିଳ୍ପ ତାଲିମ୍ କେନ୍ଦ୍ର (ITI )ପରିସର ମଧ୍ୟରେ ଥିବା Barbil Lighthouse ପକ୍ଷରୁ ଏକ ଦିବସୀୟ ବୃହତ ନିଯୁକ୍ତି ମେଳା (Job Fair) ଅତ୍ୟନ୍ତ ସଫଳତାର ସହ ଆୟୋଜିତ ହୋଇଯାଇଛି। ଆଜିର ଏହି ଯୁଗରେ ବେକାରୀ ସମସ୍ୟାର ସମାଧାନ କରିବା ଏବଂ ସ୍ଥାନୀୟ ଅଞ୍ଚଳର ପଢ଼ୁଆ ତଥା ଯୋଗ୍ୟ ଯୁବପିଢିଙ୍କୁ ସେମାନଙ୍କର ପ୍ରତିଭା ଅନୁଯାୟୀ ଉପଯୁକ୍ତ ରୋଜଗାରର ସୁଯୋଗ ଯୋଗାଇଦେବା ଏହି ମେଳାର ମୁଖ୍ୟ ଉଦ୍ଦେଶ୍ୟ ଥିଲା। ସକାଳ 10 ଟାରୁ ଆରମ୍ଭ ହୋଇଥିବା ଏହି କାର୍ଯ୍ୟକ୍ରମ ଅପରାହ୍ନ 4 ଟା ପର୍ଯ୍ୟନ୍ତ ଚାଲିଥିଲା ଏବଂ ସ୍ଥାନୀୟ ଅଞ୍ଚଳର ବହୁ ଚାକିରି ଆଶାୟୀ ଏହାର ସୁଯୋଗ ନେଇଥିଲେ। ଏହି ନିଯୁକ୍ତି ମେଳାକୁ ସକାଳେ ମାନ୍ୟଗଣ୍ୟ ଅତିଥି ତଥା ବଡ଼ବିଲ ପୌରପାଳିକା ର କାର୍ଯ୍ୟନିର୍ବାହୀ ଅଧିକାରୀ ଶ୍ରୀ ରମେଶ ଚନ୍ଦ୍ର ନାୟକ, ସହକାରୀ କାର୍ଯୟନିର୍ବାହୀ ଯନ୍ତ୍ରୀ ଶ୍ରୀ ମାନସ କୁମାର ମାଝୀ ଏବଂ ଆମ ସଂସ୍ଥାର ବରିଷ୍ଠ କର୍ମକର୍ତ୍ତାଙ୍କ ଦ୍ୱାରା ଆନୁଷ୍ଠାନିକ ଭାବେ ଉଦ୍ଘାଟନ କରାଯାଇଥିଲା। ଉଦ୍ଘାଟନୀ ଅଭିଭାଷଣରେ ଅତିଥିମାନେ କହିଥିଲେ ଯେ, ଏଭଳି ଶିଳ୍ପସମୃଦ୍ଧ ଅଞ୍ଚଳରେ ଯୁବକଯୁବତୀମାନଙ୍କ ପାଇଁ ସିଧାସଳଖ କମ୍ପାନୀ ସହ ଯୋଗାଯୋଗ କରିବାର ଏହା ଏକ ସୁବର୍ଣ୍ଣ ସୁଯୋଗ।
ଏହି ନିଯୁକ୍ତି ମେଳାରେ ଦେଶର ବିଭିନ୍ନ କ୍ଷେତ୍ରର ପ୍ରାୟ 5 ଟି ପ୍ରତିଷ୍ଠିତ କମ୍ପାନୀ ଯୋଗ ଦେଇଥିଲେ। ପ୍ରତ୍ୟେକ କମ୍ପାନୀ ନିଜ ନିଜର ଆବଶ୍ୟକତା ଅନୁଯାୟୀ ବିଭିନ୍ନ ପଦବୀ ଯଥା- ଟେକ୍ନିସିଆନ୍, ମ୍ୟାନେଜମେଣ୍ଟ ଟ୍ରେନି, ଏକ୍ଜିକ୍ୟୁଟିଭ୍ ଏବଂ ଫିଲ୍ଡ ଅଫିସର୍ ପଦବୀ ପାଇଁ ନିଯୁକ୍ତି ପ୍ରକ୍ରିୟା ଆରମ୍ଭ କରିଥିଲେ।
ଏହି ମେଳାରେ ଯୋଗଦେବା ପାଇଁ ବଡ଼ବିଲ୍ ସମେତ ଆଖପାଖ ଅଞ୍ଚଳରୁ ପ୍ରାୟ 250 ରୁ ଅଧିକ ଆଶାୟୀ ଯୁବକଯୁବତୀ ଏବଂ ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ। ଆବେଦନକାରୀଙ୍କ ମଧ୍ୟରେ ମାଟ୍ରିକ, ଆଇଟିଆଇ (ITI), ଡିପ୍ଲୋମା, ଗ୍ରାଜୁଏଟ୍ ଏବଂ ପୋଷ୍ଟ-ଗ୍ରାଜୁଏଟ୍ ପାସ୍ କରିଥିବା ଉଭୟ ଫ୍ରେସର୍ସ ଏବଂ ଅଭିଜ୍ଞ ବ୍ୟକ୍ତି ସାମିଲ ଥିଲେ। ମେଳାରେ ପ୍ରାର୍ଥୀମାନଙ୍କ ସୁବିଧା ପାଇଁ ପଞ୍ଜୀକରଣ କାଉଣ୍ଟର (Registration Desk) ର ବ୍ୟବସ୍ଥା କରାଯାଇଥିଲା, ଯେଉଁଠାରେ ସେମାନେ ନିଜର ବାୟୋଡାଟା ଓ ଶିକ୍ଷାଗତ ଯୋଗ୍ୟତା ପ୍ରମାଣପତ୍ର ଦାଖଲ କରିଥିଲେ।
ବଡ଼ବିଲ୍ ଲାଇଟ୍ହାଉସ୍ ପରିସରରେ ପ୍ରତ୍ୟେକ କମ୍ପାନୀ ପାଇଁ ପୃଥକ ପୃଥକ ଷ୍ଟଲ୍ ଏବଂ ସାକ୍ଷାତକାର କୋଠରୀର ବ୍ୟବସ୍ଥା କରାଯାଇଥିଲା। ପ୍ରଥମେ ପ୍ରାର୍ଥୀଙ୍କ ବାୟୋଡାଟା ଯାଞ୍ଚ୍ କରାଯିବା ପରେ ସେମାନଙ୍କର ଗ୍ରୁପ୍ ଡିସକସନ୍ ଏବଂ ସିଧାସଳଖ ସାକ୍ଷାତକାର ନିଆଯାଇଥିଲା। ଏହି ସମ୍ପୂର୍ଣ୍ଣ ପ୍ରକ୍ରିୟା ଅତ୍ୟନ୍ତ ସ୍ୱଚ୍ଛ ଏବଂ ଶୃଙ୍ଖଳିତ ଭାବେ ପରିଚାଳିତ ହୋଇଥିଲା। ଯୋଗ୍ୟତା ଆଧାରରେ ଅନେକ ପ୍ରାର୍ଥୀଙ୍କୁ ସେହି ସ୍ଥାନରେ ହିଁ ପ୍ରାଥମିକ ଭାବେ ସ୍ପଟ୍ ସିଲେକ୍ସନ କରାଯାଇ ନିଯୁକ୍ତି ପତ୍ର (Letter of Intent/Offer Letter) ପ୍ରଦାନ କରାଯାଇଥିବା ବେଳେ, ଅନ୍ୟ କିଛି ପ୍ରାର୍ଥୀଙ୍କୁ ପରବର୍ତ୍ତୀ ରାଉଣ୍ଡ ସାକ୍ଷାତକାର ପାଇଁ ସର୍ଟଲିଷ୍ଟ କରାଯାଇଛି।
କାର୍ଯ୍ୟକ୍ରମ ଶେଷରେ ଆମ ସଂସ୍ଥାର ମୁଖ୍ୟ ପରିଚାଳକ ସମସ୍ତ ଅଂଶଗ୍ରହଣକାରୀ ଓ କମ୍ପାନୀର ପ୍ରତିନିଧିମାନଙ୍କୁ ଧନ୍ୟବାଦ ଅର୍ପଣ କରିଥିଲେ। ମେଳାକୁ ସଫଳ କରିବାରେ ଆମର ସମସ୍ତ ସ୍ୱେଚ୍ଛାସେବୀ ଓ କର୍ମଚାରୀ ଦିନସାରା ଅକ୍ଳାନ୍ତ ପରିଶ୍ରମ କରିଥିଲେ। ଏହି ନିଯୁକ୍ତି ମେଳା ସ୍ଥାନୀୟ ଅଞ୍ଚଳରେ କର୍ମସଂସ୍ଥାନ ଯୋଗାଇବାରେ ଏକ ବଡ଼ ସଫଳ ପଦକ୍ଷେପ ସାବ୍ୟସ୍ତ ହୋଇଛି। ଆଗାମୀ ଦିନରେ ମଧ୍ୟ ବେକାର ଯୁବପିଢିଙ୍କ ହିତ ପାଇଁ ଆମ ସଂସ୍ଥା ପକ୍ଷରୁ ଏଭଳି ଅନେକ ଜନହିତକର ଓ ନିଯୁକ୍ତିଭିତ୍ତିକ ମେଳାର ଆୟୋଜନ ଜାରି ରହିବ ବୋଲି ପ୍ରତିଶ୍ରୁତି ଦିଆଯାଇଛି।
କେନ୍ଦୁଝର ଜିଲ୍ଲାରୁ ସରୋଜ କୁମାର ମହାପାତ୍ରଙ୍କ ରିପୋର୍ଟ।
