ନୁଆଦିଲ୍ଲୀ: କେନ୍ଦ୍ର ଗୃହ ଓ ସମବାୟ ମନ୍ତ୍ରୀ ଅମିତ ଶାହ ଏବଂ କେନ୍ଦ୍ର ବନ୍ଦର, ଜାହାଜ ଚଳାଚଳ ଏବଂ ଜଳପଥ ମନ୍ତ୍ରୀ ସର୍ବାନନ୍ଦ ସୋନୋୱାଲ ବନ୍ଦର ସୁରକ୍ଷା ବ୍ୟୁରୋ (ବିଓପିଏସ) ଗଠନରେ ହୋଇଥିବା ଅଗ୍ରଗତିର ସମୀକ୍ଷା କରିଥିଲେ। ଏହି ଅବସରରେ କେନ୍ଦ୍ର ଗୃହ ସଚିବ, ଗୁଇନ୍ଦା ନିର୍ଦ୍ଦେଶକ, ସୀମା ପରିଚାଳନା ସଚିବ, ବନ୍ଦର, ଜାହାଜ ଚଳାଚଳ ଏବଂ ଜଳପଥ ସଚିବ, ମତ୍ସ୍ୟ ବିଭାଗ ସଚିବ, କେନ୍ଦ୍ରୀୟ ଶିଳ୍ପ ସୁରକ୍ଷା ବାହିନୀ (ସି.ଆଇ. ଏସ୍. ଏଫ୍.)ର ମହାନିର୍ଦ୍ଦେଶକଙ୍କ ସମେତ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।ଶ୍ରୀ ଶାହ କହିଛନ୍ତି ଯେ, ବନ୍ଦରଗୁଡ଼ିକର ସୁରକ୍ଷାରେ କେବଳ ଲାଇସେନ୍ସପ୍ରାପ୍ତ ଘରୋଇ ସୁରକ୍ଷା ସଂସ୍ଥା କାର୍ଯ୍ୟ କରିବା ଉଚିତ ଏବଂ କେବଳ ସି.ଆଇ.ଏସ୍.ଏଫ୍ ରୁ ତାଲିମ ପ୍ରାପ୍ତ ଘରୋଇ ସୁରକ୍ଷା କର୍ମୀଙ୍କୁ ନିୟୋଜିତ କରାଯିବା ଉଚିତ। ବନ୍ଦର ସୁରକ୍ଷା ତାଲିମ ପ୍ରତିଷ୍ଠାନ (ପି. ଏସ୍. ଟି. ଆଇ.) ପାଇଁ ବର୍ତ୍ତମାନ ଉପଲବ୍ଧ ଭିତ୍ତିଭୂମିରେ ସୁରକ୍ଷା କର୍ମୀଙ୍କ ତାଲିମ ଶୀଘ୍ର ଆରମ୍ଭ କରିବା ଉପରେ ସେ ଗୁରୁତ୍ୱାରୋପ କରିଥିଲେ। ସେ କହିଛନ୍ତି ଯେ ବି. ଓ. ପି. ଏସ୍. ରେ ନିୟୋଜିତ ହେବାକୁ ଥିବା ସୁରକ୍ଷା କର୍ମଚାରୀଙ୍କ ଏକ ଡାଟାବେସ୍ ସୃଷ୍ଟି କରାଯିବ। ସେ କହିଥିଲେ ଯେ ବି. ଓ. ପି. ଏସ୍. ସୁରକ୍ଷା ଥିବା ସମସ୍ତ ବନ୍ଦରରେ କଣ୍ଟେନର ସ୍କାନିଂ ବ୍ୟବସ୍ଥା ରହିବା ଉଚିତ। ଗୃହମନ୍ତ୍ରୀ ସି. ଆଇ. ଏସ୍. ଏଫ୍. କୁ ଦେଶର ପ୍ରମୁଖ ବନ୍ଦର ଯଥା ବିଶାଖାପାଟନମ୍ ବନ୍ଦର, ଜବାହରଲାଲ ନେହେରୁ ବନ୍ଦର ଏବଂ ମୁନ୍ଦ୍ରା ବନ୍ଦର ପରିଦର୍ଶନ କରି ବି. ଓ. ପି. ଏସ୍. କୁ ପ୍ରଦାନ କରାଯାଉଥିବା ସୁରକ୍ଷାର ପରୀକ୍ଷଣ କରିବାକୁ କହିଥିଲେ।
ଗୃହମନ୍ତ୍ରୀ ଅମିତ ଶାହ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ସରକାର ଉପକୂଳ ସୁରକ୍ଷାକୁ ଅଭେଦ୍ୟ କରିବାକୁ ପ୍ରତିଶ୍ରୁତିବଦ୍ଧ।
ମର୍ଚାଣ୍ଟ ସିପିଂ ଆକ୍ଟ, ୨୦୨୫ର ଧାରା ୧୩ର ବ୍ୟବସ୍ଥା ଅନୁଯାୟୀ ବିଓପିଏସକୁ ଏକ ବୈଧାନିକ ସଂସ୍ଥା ଭାବେ ଗଠନ କରାଯାଉଛି। ଏହି ବ୍ୟୁରୋର ନେତୃତ୍ୱ ଜଣେ ମହାନିର୍ଦ୍ଦେଶକ ନେବେ ଏବଂ ଏହା ବନ୍ଦର, ଜାହାଜ ଚଳାଚଳ ଏବଂ ଜଳପଥ ମନ୍ତ୍ରଣାଳୟ ଅଧୀନରେ କାର୍ଯ୍ୟ କରିବ। ବନ୍ଦରରେ ଜାହାଜ ଏବଂ ସୁବିଧାଗୁଡ଼ିକର ସୁରକ୍ଷା ସମ୍ବନ୍ଧୀୟ ନିୟାମକ ଏବଂ ଯାଞ୍ଚ କାର୍ଯ୍ୟ ପାଇଁ ବିଓପିଏସ ଦାୟୀ ରହିବେ। ବି. ଓ. ପି. ଏସ୍. ସାଇବର ସୁରକ୍ଷା ଉପରେ ବିଶେଷ ଧ୍ୟାନ ଦେବା ସହିତ ସମୟବଦ୍ଧ ବିଶ୍ଳେଷଣ, ସୁରକ୍ଷା ସମ୍ବନ୍ଧୀୟ ସୂଚନା ସଂଗ୍ରହ ଏବଂ ବିନିମୟ ସୁନିଶ୍ଚିତ କରିବ; ଏଥିରେ ଡିଜିଟାଲ ବିପଦରୁ ବନ୍ଦରଗୁଡ଼ିକର ଆଇ. ଟି. ଭିତ୍ତିଭୂମିକୁ ସୁରକ୍ଷିତ ରଖିବା ପାଇଁ ସମର୍ପିତ ବିଭାଗ ମଧ୍ୟ ଅନ୍ତର୍ଭୁକ୍ତ ହେବ।
କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ ମଧ୍ୟ ମତ୍ସ୍ୟ ବିଭାଗର ଅଧିକାରୀମାନଙ୍କ ସହ ଏକ ବୈଠକ କରି ମାଛଧରା ବନ୍ଦର ଏବଂ ମାଛ ଅବତରଣ କେନ୍ଦ୍ରର ସୁରକ୍ଷା ପାଇଁ ଆବଶ୍ୟକ ନିର୍ଦ୍ଦେଶ ଦେଇଥିଲେ। ସେ କହିଥିଲେ ଯେ ଇସ୍ରୋର ବିକଶିତ ‘ନବମିତ୍ର’ ଆପକୁ ଅଧିକ ପ୍ରୋତ୍ସାହନ ଦିଆଯିବା ଉଚିତ, ଯାହାଦ୍ୱାରା ଅଧିକରୁ ଅଧିକ ନାବିକ ଏହାକୁ ନିଜ ମୋବାଇଲରେ ଡାଉନଲୋଡ୍ କରିପାରିବେ।
ଜିଲ୍ଲାର ସମସ୍ତ ମାଛ ଅବତରଣ କେନ୍ଦ୍ରର ତାଲିକା କେନ୍ଦ୍ରକୁ ପଠାଇବା ପାଇଁ ସମସ୍ତ ଜିଲ୍ଲାର ଜିଲ୍ଲାପାଳ ଏବଂ ଏସପିଙ୍କୁ ଚିଠି ଲେଖିବାକୁ ଗୃହ ମନ୍ତ୍ରୀ ମତ୍ସ୍ୟ ବିଭାଗର ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ମତ୍ସ୍ୟଜୀବୀଙ୍କ ପଞ୍ଜୀକରଣକୁ ସହଜ କରାଯିବା ଉଚିତ ବୋଲି ସେ କହିଥିଲେ। ଅମିତ ଶାହ କହିଥିଲେ ଯେ ଜିଲ୍ଲା ପୁଲିସ ଅଧୀକ୍ଷକମାନେ ମତ୍ସ୍ୟ ଅବତରଣ କେନ୍ଦ୍ରରେ ପର୍ଯ୍ୟାପ୍ତ ସୁରକ୍ଷା ବ୍ୟବସ୍ଥା ସୁନିଶ୍ଚିତ କରିବା ଉଚିତ ଏବଂ ସେଠାରେ କେବଳ ସ୍ଥାୟୀ ପୋଲିସ କର୍ମଚାରୀ ନିୟୋଜିତ ହେବା ଉଚିତ।
