ଗୋପାଳ ସମାଜର ପୂର୍ବତନ ସଭାପତି ଉଗ୍ରେସନ ବେହେରାଙ୍କ ପରଲୋକ, ଶୋକର ଛାୟା
ତାଳଚେର, ୬ ଅଗଷ୍ଟ: ଅନୁଗୁଳ ଜିଲ୍ଲା ତାଳଚେର ଅଞ୍ଚଳର ବିଶିଷ୍ଟ ସମାଜସେବୀ, ଗୋପାଳ ସମାଜର ପୂର୍ବତନ ସଭାପତି ତଥା ଏଫ୍ସିଆଇ (FCI) ତାଳଚେରର ପୂର୍ବତନ ଇଞ୍ଜିନିୟର ଉଗ୍ରେସନ ବେହେରାଙ୍କର ୫ ଅଗଷ୍ଟ ୨୦୨୬ ତାରିଖରେ ୮୦ ବର୍ଷ ବୟସରେ ପରଲୋକ ଘଟିଛି। ତାଙ୍କ ବିୟୋଗରେ ତାଳଚେର ଅଞ୍ଚଳ ସମେତ ଗୋପାଳ ସମାଜରେ ଶୋକର ଛାୟା ଖେଳିଯାଇଛି।
ସ୍ୱର୍ଗତ ବେହେରା ୧୯୪୭ ମସିହା ମାର୍ଚ୍ଚ ୩୧ ତାରିଖରେ ଅନୁଗୁଳ ଜିଲ୍ଲା ତାଳଚେର ବ୍ଲକ୍ର ଚାଇଁପାଳ ଗ୍ରାମରେ ଜନ୍ମଗ୍ରହଣ କରିଥିଲେ। ଉଚ୍ଚ ଶିକ୍ଷା ଲାଭ କରିବା ପରେ ସେ ଏଫ୍ସିଆଇ ତାଳଚେରରେ ଜଣେ ଇଞ୍ଜିନିୟର ଭାବେ ଦୀର୍ଘଦିନ କାର୍ଯ୍ୟରତ ଥିଲେ। କର୍ମଜୀବନରେ ଦକ୍ଷତା ଓ ସଚ୍ଚୋଟତା ପାଇଁ ସେ ସମସ୍ତଙ୍କ ପ୍ରଶଂସା ଅର୍ଜନ କରିଥିଲେ।
କେବଳ ଜଣେ ସଫଳ ଇଞ୍ଜିନିୟର ନୁହେଁ, ସେ ଜଣେ ନିଷ୍ଠାପର ସମାଜସେବୀ ଭାବେ ମଧ୍ୟ ପରିଚିତ ଥିଲେ। ଗୋପାଳ ସମାଜର ସଭାପତି ଭାବେ ଦାୟିତ୍ୱ ପାଳନ କରୁଥିବା ସମୟରେ ସମାଜର ପରମ୍ପରାର ସଂରକ୍ଷଣ, ସ୍ୱାସ୍ଥ୍ୟ, ଶିକ୍ଷା ଓ ସାଂସ୍କୃତିକ ବିକାଶ ଦିଗରେ ଅନେକ ଉଲ୍ଲେଖନୀୟ ପଦକ୍ଷେପ ନେଇଥିଲେ। ତାଙ୍କ ପ୍ରୟାସରେ ଗଡ଼ତଳ କଲେଜର ନିର୍ମାଣ ସମ୍ଭବ ହୋଇଥିବାରୁ ଶିକ୍ଷା କ୍ଷେତ୍ରରେ ତାଙ୍କ ଅବଦାନ ସଦା ସ୍ମରଣୀୟ ହୋଇ ରହିବ।
ଅବସର ଗ୍ରହଣ ପରେ ମଧ୍ୟ ସେ ନିଜକୁ ସମାଜସେବା କାର୍ଯ୍ୟରେ ନିୟୋଜିତ ରଖିଥିଲେ। ତାଙ୍କର ସରଳ ଜୀବନଶୈଳୀ, ମେଳାପୀ ଓ ବନ୍ଧୁତ୍ୱପୂର୍ଣ୍ଣ ସ୍ୱଭାବ ସମସ୍ତଙ୍କୁ ଆକର୍ଷିତ କରୁଥିଲା। ସେ ଗୋପାଳ ସମାଜର ଜଣେ ଗର୍ବ ଓ ପ୍ରେରଣାର ଉତ୍ସ ଭାବେ ପରିଚିତ ଥିଲେ।
ତାଙ୍କ ଶେଷ ସମୟରେ ସହଧର୍ମିଣୀ, ଦୁଇ ପୁତ୍ରବଧୂ, ସାନ ପୁଅ, ସାନ ଭାଇ, ନାତି-ନାତୁଣୀ ଏବଂ ପୁତୁରାମାନେ ଉପସ୍ଥିତ ଥିଲେ। ତାଙ୍କ ବିୟୋଗରେ ବିଭିନ୍ନ ସାମାଜିକ ସଂଗଠନ, ବୁଦ୍ଧିଜୀବୀ, ବନ୍ଧୁବର୍ଗ ଓ ଗୋପାଳ ସମାଜର ସଦସ୍ୟମାନେ ଗଭୀର ଶୋକ ପ୍ରକାଶ କରିବା ସହ ଶୋକସନ୍ତପ୍ତ ପରିବାର ପ୍ରତି ସମବେଦନା ଜଣାଇଛନ୍ତି।
ଆବିର୍ଭାବ: ୩୧ ମାର୍ଚ୍ଚ ୧୯୪୭
ତୀରୋଭାବ: ୫ ଅଗଷ୍ଟ ୨୦୨୬
