୨.୪୩ କୋଟିରେ ନୂଆ ସ୍କୁଲ୍ ଗୃହ, ଉଦ୍‌ଘାଟନ କଲେ ବିଧାୟକ

byjagratbharat
-August 21, 2026

🏫 ୨.୪୩ କୋଟିରେ ନୂଆ ସ୍କୁଲ୍ ଗୃହ, ଉଦ୍‌ଘାଟନ କଲେ ବିଧାୟକ

ଅନୁଗୋଳ: ଶିକ୍ଷାର ଭିତ୍ତିଭୂମିକୁ ଆହୁରି ସୁଦୃଢ଼ କରିବା ଦିଗରେ ଅନୁଗୋଳ ବିଧାନସଭା ନିର୍ବାଚନମଣ୍ଡଳୀର ଖଲାରୀ ଗ୍ରାମ ପଞ୍ଚାୟତ ଅନ୍ତର୍ଗତ ଖମାରରେ ଯୋଡ଼ି ହୋଇଛି ନୂଆ ଅଧ୍ୟାୟ। ୨ କୋଟି ୪୩ ଲକ୍ଷ ଟଙ୍କା ବ୍ୟୟ ଅଟକଳରେ ନିର୍ମିତ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ନୂତନ ଗୃହ ଉଦ୍‌ଘାଟିତ ହୋଇଛି।

ଉଦ୍‌ଘାଟନୀ ଉତ୍ସବରେ ମୁଖ୍ୟଅତିଥି ଭାବେ ଯୋଗଦେଇ ଅନୁଗୋଳ ବିଧାୟକ ପ୍ରତାପ ଚନ୍ଦ୍ର ପ୍ରଧାନ ନୂତନ ବିଦ୍ୟାଳୟ ଗୃହର ଉଦ୍‌ଘାଟନ କରିଥିଲେ। ନୂଆ ଭିତ୍ତିଭୂମି ଛାତ୍ରଛାତ୍ରୀଙ୍କୁ ଉନ୍ନତ ଶିକ୍ଷା ପ୍ରଦାନ ସହ ଏକ ସୁସ୍ଥ ଓ ଶୈକ୍ଷିକ ପରିବେଶ ଗଠନରେ ସହାୟକ ହେବ ବୋଲି ଆଶା ପ୍ରକାଶ ପାଇଛି।

📚 ଶିକ୍ଷା ଭିତ୍ତିଭୂମିକୁ ମିଳିଲା ନୂଆ ରୂପ

ନୂତନ ସ୍କୁଲ୍ ଗୃହ ନିର୍ମାଣ ଫଳରେ ଛାତ୍ରଛାତ୍ରୀଙ୍କ ପାଠପଢ଼ା ପାଇଁ ଅଧିକ ସୁବିଧାଜନକ ପରିବେଶ ସୃଷ୍ଟି ହେବ। ଆଗାମୀ ଦିନରେ ଏହି ବିଦ୍ୟାଳୟ ଅଞ୍ଚଳର ଛାତ୍ରଛାତ୍ରୀଙ୍କ ଶିକ୍ଷାର ମାନ ବଢ଼ାଇବାରେ ଗୁରୁତ୍ୱପୂର୍ଣ୍ଣ ଭୂମିକା ନେବ ବୋଲି ମତ ପ୍ରକାଶ ପାଇଛି।

କାର୍ଯ୍ୟକ୍ରମରେ ଅନୁଗୋଳ ଜିଲ୍ଲା ସହକାରୀ ଶିକ୍ଷା ଅଧିକାରିଣୀ ଲୋପାମୁଦ୍ରା ପଟ୍ଟନାୟକ, ଅନୁଗୋଳ ବ୍ଲକ୍ ଶିକ୍ଷା ଅଧିକାରୀ ଅଶୋକ ପ୍ରଧାନ, ସର୍ବ ଶିକ୍ଷା ଅଭିଯାନ ଅଧିକାରୀ ଦେବାଶିଷ ପାଣି, ଖଲାରୀ ସରପଞ୍ଚ ସସ୍ମିତା ଗଡ଼ନାୟକ, ସମିତି ସଭ୍ୟ ରାକେଶ ନନ୍ଦଙ୍କ ସମେତ ବିଭିନ୍ନ ଅଧିକାରୀ, ଜନପ୍ରତିନିଧି ଓ ଅଞ୍ଚଳର ନେତୃବୃନ୍ଦ ଉପସ୍ଥିତ ଥିଲେ।

ଏଥିସହ ଖଲାରୀ ମଣ୍ଡଳର ବିଜେପି ସଭାପତି ପ୍ରିୟବ୍ରତ ପାଗଳ, ପଞ୍ଚାୟତ ସଭାପତି ଶୁଭ୍ରାଂଶୁ ଶେଖର ସାହୁ, ଯୁବମୋର୍ଚ୍ଚା ସଭାପତି ଲାଲ ବାହାଦୁର ଗଡ଼ନାୟକଙ୍କ ସମେତ ଦଳୀୟ କର୍ମକର୍ତ୍ତା, ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ, ଶିକ୍ଷକ-ଶିକ୍ଷୟିତ୍ରୀ ଓ ଛାତ୍ରଛାତ୍ରୀ ଯୋଗଦେଇଥିଲେ।

ନୂଆ ସ୍କୁଲ୍ ଗୃହକୁ ନେଇ ଅଞ୍ଚଳରେ ଶିକ୍ଷାର ଭିତ୍ତିଭୂମି ଆହୁରି ମଜବୁତ ହେବା ସହ ଛାତ୍ରଛାତ୍ରୀଙ୍କ ସ୍ୱପ୍ନକୁ ନୂଆ ଦିଗ ମିଳିବ ବୋଲି ଆଶା କରାଯାଉଛି।