SC-ST ଛାତ୍ରଛାତ୍ରୀଙ୍କୁ ବଡ଼ ଆଶ୍ୱସ୍ତି: ସରକାରୀ ମେଡିକାଲ୍-ଇଞ୍ଜିନିୟରିଂ କଲେଜରେ ଆଡମିଶନ୍ ବେଳେ ଦେବାକୁ ପଡ଼ିବନି ଫି

ଛାତ୍ରବୃତ୍ତି ମିଳିବା ପର୍ଯ୍ୟନ୍ତ ୬ ମାସ ଯାଏଁ ଫି ଦେୟରୁ ମିଳିବ ରାହାତ, ଖୁବ୍‌ଶୀଘ୍ର ଜାରି ହେବ ମାର୍ଗଦର୍ଶିକା

ଭୁବନେଶ୍ୱର, ୩୧/୮: ରାଜ୍ୟର ଅନୁସୂଚିତ ଜାତି (SC) ଓ ଅନୁସୂଚିତ ଜନଜାତି (ST) ବର୍ଗର ମେଧାବୀ ଓ ଆର୍ଥିକ ଦୁର୍ବଳ ଛାତ୍ରଛାତ୍ରୀଙ୍କ ପାଇଁ ବଡ଼ ଆଶ୍ୱସ୍ତି। ସରକାରୀ ମେଡିକାଲ୍ ଓ ଇଞ୍ଜିନିୟରିଂ କଲେଜରେ ଆଡମିଶନ୍ ସମୟରେ ଏଣିକି ଏହି ବର୍ଗର ଛାତ୍ରଛାତ୍ରୀଙ୍କୁ ତୁରନ୍ତ ଟ୍ୟୁସନ୍ ଫି କିମ୍ବା ଅନ୍ୟ ଫି ଜମା କରିବାକୁ ପଡ଼ିବ ନାହିଁ।

ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏନେଇ ନିର୍ଦ୍ଦେଶ ଦେଇଛନ୍ତି। ଆଡମିଶନ୍ ତାରିଖଠାରୁ ପ୍ରାୟ ୬ ମାସ ପର୍ଯ୍ୟନ୍ତ ଛାତ୍ରଛାତ୍ରୀମାନେ ଫି ଦେୟରୁ ରାହାତ ପାଇବେ। ଏହି ସମୟ ମଧ୍ୟରେ ସେମାନେ ସରକାରଙ୍କ ଠାରୁ ମିଳିବାକୁ ଥିବା ଛାତ୍ରବୃତ୍ତି ପାଇବା ପରେ ଆବଶ୍ୟକ ଫି ଜମା କରିପାରିବେ।

ଛାତ୍ରବୃତ୍ତି ଆସିବାରେ ବିଳମ୍ବ ହେଉଥିଲା ବଡ଼ ସମସ୍ୟା

SC-ST ବର୍ଗର ଛାତ୍ରଛାତ୍ରୀମାନେ କେନ୍ଦ୍ର ଓ ରାଜ୍ୟ ସରକାରଙ୍କ ବିଭିନ୍ନ ଯୋଜନାରେ ଛାତ୍ରବୃତ୍ତି ପାଇଥାନ୍ତି। କିନ୍ତୁ ଛାତ୍ରବୃତ୍ତି ପ୍ରକ୍ରିୟା ସମ୍ପୂର୍ଣ୍ଣ ହୋଇ ଟଙ୍କା ମିଳିବାକୁ ସାଧାରଣତଃ ୩ରୁ ୪ ମାସ ସମୟ ଲାଗୁଥିଲା।

ଫଳରେ ମେଡିକାଲ୍ କିମ୍ବା ଇଞ୍ଜିନିୟରିଂ ଭଳି ଉଚ୍ଚଶିକ୍ଷାରେ ସଫଳତା ପାଇଥିଲେ ମଧ୍ୟ ଆଡମିଶନ୍ ସମୟରେ ଫି ଦେବା ପାଇଁ ଅର୍ଥ ଅଭାବରୁ ଅନେକ ଛାତ୍ରଛାତ୍ରୀ ଚିନ୍ତାରେ ପଡ଼ୁଥିଲେ।

ଏବେ ସରକାରଙ୍କ ନୂଆ ପଦକ୍ଷେପ ଯୋଗୁଁ ଏହି ସମସ୍ୟାରୁ ସେମାନଙ୍କୁ ମୁକ୍ତି ମିଳିବ।

ଖୁବ୍‌ଶୀଘ୍ର ଆସିବ ମାର୍ଗଦର୍ଶିକା

ସରକାରୀ ମେଡିକାଲ୍ ଓ ଇଞ୍ଜିନିୟରିଂ କଲେଜରେ ଏହି ବ୍ୟବସ୍ଥା କିପରି ଲାଗୁ ହେବ, ସେନେଇ ରାଜ୍ୟ ସରକାର ଖୁବ୍‌ଶୀଘ୍ର ସ୍ୱତନ୍ତ୍ର ମାର୍ଗଦର୍ଶିକା ଜାରି କରିବେ।

ସରକାରଙ୍କ ଏହି ନିଷ୍ପତ୍ତି ଫଳରେ ଆର୍ଥିକ ଅସୁବିଧା ସତ୍ତ୍ୱେ ପ୍ରତିଯୋଗିତାମୂଳକ ପରୀକ୍ଷାରେ ସଫଳ ହୋଇଥିବା SC-ST ବର୍ଗର ମେଧାବୀ ଛାତ୍ରଛାତ୍ରୀଙ୍କୁ ଉଚ୍ଚଶିକ୍ଷା ଜାରି ରଖିବାରେ ବଡ଼ ସହାୟତା ମିଳିବ।

‘ପଢ଼ା ଆଗରେ, ଟଙ୍କା ପଛରେ’ — ସରକାରଙ୍କ ନୂଆ ପଦକ୍ଷେପ

ଆର୍ଥିକ ଦୁର୍ବଳତା କାରଣରୁ କୌଣସି ମେଧାବୀ ଛାତ୍ରଛାତ୍ରୀ ଯେପରି ଉଚ୍ଚଶିକ୍ଷାରୁ ବଞ୍ଚିତ ନହୁଅନ୍ତି, ସେଥିପାଇଁ ଏହି ପଦକ୍ଷେପକୁ ଗୁରୁତ୍ୱପୂର୍ଣ୍ଣ ବୋଲି ମନେ କରାଯାଉଛି। ଆଡମିଶନ୍ ସମୟର ଆର୍ଥିକ ଚାପ କମାଇ ଛାତ୍ରଛାତ୍ରୀଙ୍କୁ ପାଠପଢ଼ା ଉପରେ ଧ୍ୟାନ ଦେବାର ସୁଯୋଗ ଦେବା ହେଉଛି ଏହି ନିଷ୍ପତ୍ତିର ମୁଖ୍ୟ ଉଦ୍ଦେଶ୍ୟ।