ପୁଡୁଚେରୀରେ ପ୍ରଧାନମନ୍ତ୍ରୀଙ୍କ ଦ୍ୱାରା ବିଭିନ୍ନ ପ୍ରକଳ୍ପର ଉଦଘାଟନ ଓ ଶିଳାନ୍ୟାସ
ଆଜି ଆରମ୍ଭ ହେଉଥିବା ପ୍ରକଳ୍ପ ଆର୍ଥିକ କାର୍ଯ୍ୟକଳାପକୁ ଗତିଶୀଳ କରିବା ସହ ସ୍ଥାନୀୟ ଯୁବଗୋଷ୍ଠୀ ନିମନ୍ତେ ରୋଜଗାର ସୁଯୋଗ ସୃଷ୍ଟି କରିବ: ପ୍ରଧାନମନ୍ତ୍ରୀ
ଜେ ବି ଏନ, ୨୫/୦୨ /୨୦୨୧, ନୂଆଦିଲ୍ଲୀ : ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ପୁଡୁଚେରୀଠାରେ NH45-Aର ଚାରିଲେନ ବିଶିଷ୍ଟ ରାସ୍ତାର ଶିଳାନ୍ୟାସ କରିଛନ୍ତି । ଏହା କରାଇକାଲ ଜିଲ୍ଲା ଏବଂ କରାଇକାଲଠାରେ ମେଡିକାଲ କଲେଜର ନୂତନ କ୍ୟାମ୍ପସ ତଥା କରାଇକାଲ ଜିପମର ପ୍ରଥମ ଖଣ୍ଡକୁ ସଂଯୋଗ କରିବ । ଏହାଛଡା ଶ୍ରୀ ମୋଦୀ ସାଗରମାଳା ଯୋଜନା ଅଧୀନରେ ପୁଡୁଚେରୀ କ୍ଷୁଦ୍ରବନ୍ଦର ବିକାଶ ଓ ପୁଡୁଚେରୀ ଇନ୍ଦିରା ଗାନ୍ଧୀ କ୍ରୀଡା ପରିସରର ସିନ୍ଥେଟିକ ଟ୍ରାକର ମଧ୍ୟ ଶିଳାନ୍ୟାସ କରିଛନ୍ତି ।
ଶ୍ରୀ ମୋଦୀ ପୁଡୁଚେରୀସ୍ଥିତ ଜବାହାର ସ୍ନାତକୋତ୍ତର ମେଡିକାଲ ଶିକ୍ଷା ଓ ଗବେଷଣା ପ୍ରତିଷ୍ଠାନ (ଜିପମାର)ର ରକ୍ତ କେନ୍ଦ୍ର, ଲସପେଟର ମହିଳା କ୍ରୀଡାବିତଙ୍କ ନିମନ୍ତେ ଶହେ ଶଯ୍ୟା ବିଶିଷ୍ଟ ଛାତ୍ରୀ ନିବାସକୁ ମଧ୍ୟ ଉଦଘାଟନ କରିଛନ୍ତି । ଏହାଛଡା ସେ ପୁନର୍ବିନ୍ୟାସ କରାଯାଇଥିବା ମେରୀ ଐତିହ୍ୟ ଭବନର ମଧ୍ୟ ଉଦଘାଟନ କରିଛନ୍ତି ।
ପ୍ରଧାନମନ୍ତ୍ରୀ କହିଛନ୍ତି ଯେ ପୁଡୁଚେରୀ ହେଉଛି ଋଷି, ବିଦ୍ୱାନ ଓ କବି ଏବଂ ମହାକବି ସୁବ୍ରମନିୟମ ଭାରତୀ ଓ ଯୋଗୀ ଅରବିନ୍ଦଙ୍କ କର୍ମଭୂମୀ । ବିବିଧତାର ପ୍ରତୀକ ପୁଡୁଚେରୀର ପ୍ରଶଂସା କରିବା ସହ ଏଠାରେ ଲୋକମାନେ ଭିନ୍ନ ଭିନ୍ନ ଭାଷା ଓ ଧର୍ମ ବିଶ୍ୱାସୀ ହେଲେ ମଧ୍ୟ ଏକତାର ସୂତ୍ରରେ ବାନ୍ଧି ହୋଇ ରହିଥିବା ସେ କହିଛନ୍ତି ।
ପୁନର୍ବିନ୍ୟାସ ହୋଇଥିବା ମେରୀ ଭବନର ଉଦଘାଟନ କରି ଏହା ବେଳାଭୂମୀର ସୁରମ୍ୟ ପରିବେଶକୁ ଅଧିକ ମନୋରମ କରିବା ସହ ଅଧିକ ପର୍ଯ୍ୟଯକଙ୍କୁ ଆକୃଷ୍ଟ କରିବ ବୋଲି ପ୍ରଧାନମନ୍ତ୍ରୀ କହିଛନ୍ତି ।
ପ୍ରଧାନମନ୍ତ୍ରୀ କହିଛନ୍ତି ଯେ NH45-A ଚାରିଲେନ ଯୁକ୍ତ ହେବା ଫଳରେ ଏହା କରାଇକାଲ ଜିଲ୍ଲାରେ ଗମନାଗମନ ସୁଗମ କରିବା ସହ ସନିସ୍ୱରନ ମନ୍ଦିର ଓ ଆନ୍ତଃରାଜ୍ୟ ସଂଯୋଗ ବାସିଲିକା ଆଫ୍ ଆୱାର ଲେଡି ଅଫ ଗୁଡ ହେଲଥ ଏବଂ ନାଗୋର ଦରଘା ସହ କରିବ । ସରକାର ଗ୍ରାମାଞ୍ଚଳ ଓ ବେଳାଭୂମି ସଂଯୋଗୀକରଣକୁ ଉନ୍ନତ କରିବା ପାଇଁ ଅନେକ ଉଦ୍ୟମ କରିଛନ୍ତି, ଯାହା ଫଳରେ କୃଷି କ୍ଷେତ୍ର ମଧ୍ୟ ଏହାଦ୍ୱାରା ଲାଭାନ୍ୱିତ ହେବ । ସରକାରଙ୍କ ଦାୟୀତ୍ୱ ହେଉଛି ଚାଷୀର ଉତ୍ପାଦିତ ସାମଗ୍ରୀ ସମୟାନୁସାରେ ଭଲ ବଜାରରେ ପହଞ୍ଚାଇବା । ସଡକ ପଥର ସୁଗମତା ଏହି ଲକ୍ଷ୍ୟ ହାସଲରେ ସହାୟକ ହେବ ବୋଲି ଶ୍ରୀ ମୋଦୀ କହିଛନ୍ତି । ରାଜପଥର ଏହି ଚାରିଲେନ ଯୋଗୁ ଆର୍ଥିକ ସ୍ଥାନୀୟ କାର୍ଯ୍ୟକଳାପ ବୃଦ୍ଧି ପାଇବା ସହ ଯୁବଗୋଷ୍ଠୀଙ୍କ ନିମନ୍ତେ ରୋଜଗାର ସୁଯୋଗ ମଧ୍ୟ ସୃଷ୍ଟି ହେବ ।
ପ୍ରଧାନମନ୍ତ୍ରୀ କହିଛନ୍ତି ଯେ, ଗତ ସାତ ବର୍ଷ ମଧ୍ୟରେ ସ୍ୱାସ୍ଥ୍ୟ ଓ ସୁସ୍ଥତା ଦିଗରେ ଭାରତ ଅନେକ ପଦକ୍ଷେପ ନେଇଛି କାରଣ ଆର୍ଥିକ ଅଭିବୃଦ୍ଧି ଉତ୍ତମ ସ୍ୱାସ୍ଥ୍ୟ ସହ ଅଙ୍ଗାଙ୍ଗୀଭାବେ ଜଡିତ । ଏହି ପରିପ୍ରେକ୍ଷୀରେ ଖେଲୋ ଇଣ୍ଡିଆ ଯୋଜନା ଅଧୀନରେ ସେ ଏକ ଚାରି ଶହ ମିଟର ସିନ୍ଥେଟିକ ଆଥଲେଟିକ ଟ୍ରାକର ଶିଳାନ୍ୟାସ କରିଛନ୍ତି । ଏହା ଆମର ଯୁବଗୋଷ୍ଠୀ ମଧ୍ୟରେ କ୍ରୀଡାର ବିକାଶ ଘଟାଇବ । ପୁଡୁଚେରୀରେ କ୍ରୀଡା ଭିତ୍ତିଭୂମି ପ୍ରତିଷ୍ଠା ଦ୍ୱାରା ଏଠାକାର କ୍ରୀଡାବିତମାନେ ଜାତୀୟ ତଥା ଆନ୍ତର୍ଜାତୀୟ ସ୍ତରରେ ସୁନାମ ଅର୍ଜନ କରିପାରିବେ । ଲସପେଟରେ ଶହେ ଶଯ୍ୟା ବିଶିଷ୍ଟ ଛାତ୍ରୀ ନିବାସ ଉଦଘାଟିତ ହୋଇଛି । ସେଠାରେ ହକି, ଭଲିବଲ, ଭାରତ୍ତୋଳନ, କବାଡି ଏବଂ ହ୍ୟାଣ୍ଡବଲ ଖେଳାଳୀମାନେ ସାଇର ପ୍ରଶିକ୍ଷକଙ୍କ ତତ୍ତ୍ୱାବଧାନରେ ତାଲିମ ଗ୍ରହଣ କରିପାରିବେ ।
ପ୍ରଧାନମନ୍ତ୍ରୀ କହିଛନ୍ତି ଯେ ଆଗାମୀ ଦିନରେ ସ୍ୱାସ୍ଥ୍ୟସେବା ଏକ ମୁଖ୍ୟ ଭୂମିକା ଗ୍ରହଣ କରିବ । ସମସ୍ତଙ୍କୁ ଗୁଣାତ୍ମକ ସ୍ୱାସ୍ଥ୍ୟସେବା ଯୋଗାଇବା ଲକ୍ଷ୍ୟ ନେଇ ଜିପମାରରେ ଏକ ରକ୍ତକେନ୍ଦ୍ର ଉଦଘାଟିତ ହୋଇଛି । ଏଥିରେ ଦୀର୍ଘସ୍ଥାୟୀ ରକ୍ତ ସଂରକ୍ଷଣ ସହ ରକ୍ତର ଆନୁସଙ୍ଗିକ ଉପାଦାନ ଓ ମଜ୍ଜା ବ୍ୟାଙ୍କ ଇତ୍ୟାଦି ଅତ୍ୟାଧୁନିକ ସୁବିଧା ରହିବ । ଏହି କେନ୍ଦ୍ର ଏକ ଗବେଷଣା ୟୁନିଟ ଭାବେ କାର୍ଯ୍ୟ କରିବା ସହ ରକ୍ତ ଦେବା ନେବା ସହ ସମସ୍ତ ତାଲିମ ଏଥି ସହ ସଂଶ୍ଳିଷ୍ଟ ସ୍ୱାସ୍ଥ୍ୟକର୍ମୀମାନଙ୍କୁ ପ୍ରଦାନ କରାଯିବ ।
ଗୁଣାତ୍ମକ ସ୍ୱାସ୍ଥ୍ୟସେବା ଯୋଗାଇବାକୁ ହେଲେ ଆମର ପେଶାଦାର ସ୍ୱାସ୍ଥ୍ୟ ଚିକିତ୍ସକଙ୍କ ଆବଶ୍ୟକତା ରହିଛି । କରାଇକାଲର ପ୍ରଥମ ପର୍ଯ୍ୟାୟ ମେଡିକାଲ ପ୍ରକଳ୍ପ ଏକ ଅନୁକୂଳ ପରିବେଶ ଭିତ୍ତିକ ଭବନ ଯେଉଁଠି ଏମବିବିଏସ ଛାତ୍ରଛାତ୍ରୀଙ୍କ ନିମନ୍ତେ ସମସ୍ତ ଅତ୍ୟାଧୁନିକ ଚିକିତ୍ସା ସୁବିଧା ରହିଛି ।
ସାଗରମାଳା ଯୋଜନା ଅଧୀନରେ ପୁଡୁଚେରୀ ବନ୍ଦର ବିକାଶର ଶିଳାନ୍ୟାସ କରି ଏହା ସମ୍ପୂର୍ଣ୍ଣ ହେଲେ ଏହା ସାମୁଦ୍ରିକ ମତ୍ସ୍ୟଜୀବୀମାନଙ୍କ ନିମନ୍ତେ ବେଶ ଉପାଦେୟ ହେବବୋଲି ପ୍ରଧାନମନ୍ତ୍ରୀ କହିଛନ୍ତି । ଏହା ଚେନ୍ନାଇ ସହ ସମୁଦ୍ର ମାର୍ଗରେ ଯୋଗାଯୋଗ ସ୍ଥାପନ କରିପାରିବ । ଏହା ପୁଡୁଚେରୀକୁ ମାଲ ପରିବହନ କରିବା ସହ ଚେନ୍ନାଇ ବନ୍ଦରର ବୋଝ ହାଲୁକା କରିପାରିବ । ସାମୁଦ୍ରିକ ନଗରୀଗୁଡିକୁ ଯାତ୍ରୀ ପରିବହନରେ ମଧ୍ୟ ଏହା ସହାୟକ ହେବ ବୋଲି ସେ କହିଛନ୍ତି ।
ପ୍ରତ୍ୟକ୍ଷ ସୁବିଧା ହସ୍ତାନ୍ତରଣ ବିଭିନ୍ନ କଲ୍ୟାଣକାରୀ ଯୋଜନାର ହିତାଧିକାରୀଙ୍କ ନିମନ୍ତେ ବେଶ ସହାୟକ ହୋଇପାରିଛି ବୋଲି ପ୍ରଧାନମନ୍ତ୍ରୀ କହିଛନ୍ତି । ଏହା ଦ୍ୱାରା ଜନସାଧାରଣ ନିଜ ଇଛା ମୁତାବକ ସଶକ୍ତ ହୋଇପାରିଛନ୍ତି । ଉଭୟ ସରକାରୀ ଓ ଘରୋଇ କ୍ଷେତ୍ରରେ ବିଭିନ୍ନ ଶିକ୍ଷାନୁଷ୍ଠାନ ଯୋଗୁଁ ପୁଡୁଚେରୀରେ ଉନ୍ନତ ମାନବସମ୍ବଳ ଉପଲବ୍ଧ ହେଉଛି । ଶିଳ୍ପ ଓ ପର୍ଯ୍ୟଟନର ବିକାଶ ନିମନ୍ତେ ପୁଡୁଚେରୀରେ ଅନେକ ସୁବିଧା ରହିଛି ଯାହା ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି କରିବ । ପୁଡୁଚେରୀର ଜନସାଧାରଣ ମେଧାବୀ । ଏହି ଭୂମୀ ଅତ୍ୟନ୍ତ ମନୋରମ । ପୁଡୁଚେରୀର ବିକାଶ ପାଇଁ ମୋ ସରକାର ପକ୍ଷରୁ ସମସ୍ତ ସମ୍ଭାବ୍ୟ ସହାୟତା ଦେବାକୁ ଏଠାରେ ରହି ମୁଁ ଘୋଷଣା କରୁଛି ବୋଲି ପ୍ରଧାନମନ୍ତ୍ରୀ କହିଛନ୍ତି ।
