ମୋବାଇଲ ନେଟୱର୍କ ଅଭାବରୁ ଭାଙ୍ଗୁଛି ବିବାହ ପ୍ରସ୍ତାବ, ପାଳଲହଡା ଅଞ୍ଚଳରେ ଗ୍ରାମବାସୀଙ୍କ ଅଭିଯୋଗ
ପାଳଲହଡା: ଅନୁଗୁଳ ଜିଲ୍ଲାର ପାଳଲହଡା ସବଡିଭିଜନ ଅନ୍ତର୍ଗତ ନମପସି ଓ ଝାରବେଡା ଗ୍ରାମ ପଞ୍ଚାୟତରେ ମୋବାଇଲ ନେଟୱର୍କ ସୁବିଧା ନଥିବାରୁ ସ୍ଥାନୀୟ ଲୋକେ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି। ଏପରିକି ନେଟୱର୍କ ଅଭାବ ଯୋଗୁଁ ବିବାହ ପ୍ରସ୍ତାବ ମଧ୍ୟ ଭାଙ୍ଗୁଥିବା ଅଭିଯୋଗ ସାମ୍ନାକୁ ଆସିଛି।
ସ୍ଥାନୀୟ ଲୋକଙ୍କ କହିବା ଅନୁସାରେ, ଜାମ୍ବିଆ ଗ୍ରାମର ଜଣେ ଯୁବକ ଶ୍ରୀତମ ନାୟକଙ୍କ କ୍ଷେତ୍ରରେ ନେଟୱର୍କ ସମସ୍ୟା କାରଣରୁ ବିବାହ ପ୍ରସ୍ତାବ ପ୍ରଭାବିତ ହୋଇଥିବା ଘଟଣା ଏହି ସମସ୍ୟାର ଗମ୍ଭୀରତାକୁ ସାମ୍ନାକୁ ଆଣିଛି।
ଗ୍ରାମବାସୀଙ୍କ ଅଭିଯୋଗ ଅନୁଯାୟୀ, ଏହି ଅଞ୍ଚଳରେ ଏପର୍ଯ୍ୟନ୍ତ ମୋବାଇଲ ଟାୱାର ସ୍ଥାପନ ହୋଇନାହିଁ। ଫଳରେ ଶିକ୍ଷା, ସ୍ୱାସ୍ଥ୍ୟ, ଜରୁରୀକାଳୀନ ସେବା ଓ ଗମନାଗମନ ସମ୍ବନ୍ଧୀୟ ସୂଚନା ଆଦାନ-ପ୍ରଦାନରେ ମଧ୍ୟ ସେମାନେ ଅସୁବିଧାର ସମ୍ମୁଖୀନ ହେଉଛନ୍ତି। ବିଶେଷକରି ଆଦିବାସୀ ଅଧ୍ୟୁଷିତ ଏହି ଅଞ୍ଚଳର ବିକାଶ ପାଇଁ ଉନ୍ନତ ଟେଲିକମ୍ ସୁବିଧାର ଆବଶ୍ୟକତା ଥିବା ସେମାନେ କହିଛନ୍ତି।
ସମସ୍ୟାର ସ୍ଥାୟୀ ସମାଧାନ ପାଇଁ ଶୀଘ୍ର ମୋବାଇଲ ଟାୱାର ସ୍ଥାପନ ଏବଂ ଯୋଗାଯୋଗ ବ୍ୟବସ୍ଥାର ଉନ୍ନତି କରିବାକୁ ଗ୍ରାମବାସୀ ପ୍ରଶାସନ ଓ ସରକାରଙ୍କ ନିକଟରେ ଦାବି ଜଣାଇଛନ୍ତି।
