ଓଡ଼ିଶା ହାଇକୋର୍ଟକୁ ମିଳିବେ ୪ ନୂଆ ବିଚାରପତି, କଲେଜିୟମର ସୁପାରିସ
କଟକ: ଓଡ଼ିଶା ହାଇକୋର୍ଟର ବିଚାରପତି ପଦ ପାଇଁ ଆଉ ୪ ଜଣ ଆଇନଜୀବୀଙ୍କ ନାମ ସୁପାରିସ କରିଛନ୍ତି ସୁପ୍ରିମକୋର୍ଟ କଲେଜିୟମ। ସୁପାରିସ ହୋଇଥିବା ନାମଗୁଡ଼ିକ ହେଲା ସସ୍ମିତା ତ୍ରିପାଠୀ, ଆଦିତ୍ୟ ନାରାୟଣ ଦାଶ, ରଜିତ୍ ରାୟ ଏବଂ ଗୌତମ ମିଶ୍ର। ଏନେଇ ସମ୍ପ୍ରତି ରିପୋର୍ଟ ପ୍ରକାଶ ପାଇଛି।
ଦୀର୍ଘ ସମୟ ଧରି ଆଇନ କ୍ଷେତ୍ରରେ କାର୍ଯ୍ୟ କରୁଥିବା ଏହି ଚାରିଜଣଙ୍କ ଅଭିଜ୍ଞତା ଓ ଯୋଗ୍ୟତାକୁ ବିଚାରକୁ ନେଇ କଲେଜିୟମ ଏହି ସୁପାରିସ କରିଥିବା ଜଣାପଡ଼ିଛି।
ଏବେ କଲେଜିୟମର ସୁପାରିସ ପରେ ନିଯୁକ୍ତିର ପରବର୍ତ୍ତୀ ପ୍ରକ୍ରିୟା ଆଗକୁ ବଢ଼ିବ। ଚୂଡ଼ାନ୍ତ ଅନୁମୋଦନ ଓ ନିଯୁକ୍ତି ପରେ ଏହି ଚାରିଜଣ ଓଡ଼ିଶା ହାଇକୋର୍ଟରେ ବିଚାରପତି ଭାବେ ଦାୟିତ୍ୱ ଗ୍ରହଣ କରିବେ।
ବର୍ତ୍ତମାନ ହାଇକୋର୍ଟର ମଞ୍ଜୁରୀପ୍ରାପ୍ତ ବିଚାରପତି ସଂଖ୍ୟା ୩୩ ଥିବାବେଳେ ପ୍ରକୃତରେ କାର୍ଯ୍ୟରତ ବିଚାରପତିଙ୍କ ସଂଖ୍ୟା ଏହାଠାରୁ କମ୍ ରହିଛି। ଏପରି ସ୍ଥିତିରେ ଆଉ ୪ ଜଣ ବିଚାରପତିଙ୍କ ନିଯୁକ୍ତି ହେଲେ ମାମଲା ଶୁଣାଣି ଓ ନ୍ୟାୟ ପ୍ରଦାନ ପ୍ରକ୍ରିୟାକୁ ଅଧିକ ସୁଦୃଢ଼ କରିବାରେ ଏହା ସହାୟକ ହେବ ବୋଲି ଆଶା କରାଯାଉଛି।
