ରେଳ ଷ୍ଟେସନରେ ପାନୀୟ ଜଳର ମାନ ଯାଞ୍ଚ, ଟାଙ୍କି ସଫା ଓ ଜୀବାଣୁମୁକ୍ତ କରିବାକୁ ବିଶେଷ ଅଭିଯାନ
ନୂଆଦିଲ୍ଲୀ: ଯାତ୍ରୀମାନଙ୍କୁ ନିରାପଦ ଓ ସ୍ୱଚ୍ଛ ପାନୀୟ ଜଳ ଯୋଗାଣ ସୁନିଶ୍ଚିତ କରିବା ଲକ୍ଷ୍ୟରେ ଭାରତୀୟ ରେଳବାଇ ପକ୍ଷରୁ ଏକ ବ୍ୟାପକ ସ୍ୱଚ୍ଛତା ଅଭିଯାନ ଆରମ୍ଭ କରାଯାଇଛି। ଏହି ଅଭିଯାନରେ ରେଳ ଷ୍ଟେସନରେ ଥିବା ଜଳ ଟାଙ୍କି, ଫିଲ୍ଟର, ୱାଟର କୁଲର ଓ ଜଳ ବଣ୍ଟନ ବ୍ୟବସ୍ଥାର ସମ୍ପୂର୍ଣ୍ଣ ଯାଞ୍ଚ ସହ ସଫେଇ ଓ ଜୀବାଣୁମୁକ୍ତକରଣ କରାଯିବ।
ରେଳବାଇର ପାନୀୟ ଜଳ ଗୁଣବତ୍ତା ପରିଚାଳନାକୁ ଆହୁରି ସୁଦୃଢ଼ କରିବା ପାଇଁ ଏହି ପଦକ୍ଷେପ ନିଆଯାଇଛି। ଜଳର ଉତ୍ସଠାରୁ ଆରମ୍ଭ କରି ଯାତ୍ରୀଙ୍କ ପାଖରେ ପହଞ୍ଚିବା ପର୍ଯ୍ୟନ୍ତ ସମଗ୍ର ଯୋଗାଣ ବ୍ୟବସ୍ଥାର ନିୟମିତ ଯାଞ୍ଚ ଓ ରକ୍ଷଣାବେକ୍ଷଣ ଉପରେ ଗୁରୁତ୍ୱ ଦିଆଯିବ।
ଅଭିଯାନ ସମୟରେ ଜଳ ଉତ୍ସ, ଟ୍ରିଟମେଣ୍ଟ ଓ ଫିଲ୍ଟରେସନ୍ ପ୍ଲାଣ୍ଟ, ଅଣ୍ଡରଗ୍ରାଉଣ୍ଡ ଓ ଓଭରହେଡ୍ ଟାଙ୍କି, ପିଭିସି ଟାଙ୍କି, ଜଳ ବୁଥ୍, ନଳ ଏବଂ ଜଳ ବଣ୍ଟନ କେନ୍ଦ୍ରଗୁଡ଼ିକର ଯାଞ୍ଚ କରାଯିବ। ଟାଙ୍କିଗୁଡ଼ିକୁ ଖାଲି କରି ସଫା କରାଯିବା ପରେ ଜୀବାଣୁମୁକ୍ତ କରାଯିବ। ପକ୍ଷୀ, ପଶୁ ଓ ଶୈବାଳ ଯୋଗୁଁ ଜଳ ଦୂଷିତ ନହେବା ପାଇଁ ଟାଙ୍କିର ଭେଣ୍ଟ ଓ ଓଭରଫ୍ଲୋ ପଏଣ୍ଟରେ ମଧ୍ୟ ଆବଶ୍ୟକ ସୁରକ୍ଷା ବ୍ୟବସ୍ଥା କରାଯିବ।
ଖରାପ ଟାଙ୍କି ଓ ପାଇପଲାଇନ୍ର ହେବ ମରାମତି
ଯାଞ୍ଚ ସମୟରେ ଚିହ୍ନଟ ହେଉଥିବା ତ୍ରୁଟିର ତୁରନ୍ତ ସମାଧାନ କରାଯିବ। ନଷ୍ଟ ହୋଇଥିବା ଟାଙ୍କି, ପାଇପଲାଇନ୍ ଓ ଫିଲ୍ଟରକୁ ମରାମତି କିମ୍ବା ଆବଶ୍ୟକତା ଅନୁସାରେ ବଦଳାଯିବ। ପାନୀୟ ଓ ଅଣପାନୀୟ ଜଳ ବ୍ୟବସ୍ଥା ମଧ୍ୟରେ କୌଣସି କ୍ରସ୍-କନେକ୍ସନ୍ ନଥିବା ନିଶ୍ଚିତ କରାଯିବ। ପାନୀୟ ଜଳ ପାଇପରେ ଲିକେଜ୍ ଯାଞ୍ଚ ସହ ଜଳ ଅପଚୟ ରୋକିବାକୁ ମଧ୍ୟ ପଦକ୍ଷେପ ନିଆଯିବ।
ହ୍ୟାଣ୍ଡପମ୍ପ ଓ ବୋରୱେଲ୍ ମାଧ୍ୟମରେ ପାନୀୟ ଜଳ ଯୋଗାଣ ହେଉଥିବା ସ୍ଥାନଗୁଡ଼ିକୁ ବିଶେଷ ଭାବେ ଯାଞ୍ଚ କରାଯିବ। ଏହି ଉତ୍ସରୁ ମିଳୁଥିବା ଜଳ ପାନୀୟ ଉପଯୋଗ ପାଇଁ ସୁରକ୍ଷିତ କି ନୁହେଁ, ତାହା ପରୀକ୍ଷା କରାଯିବ।
ୱାଟର କୁଲର ଓ ଆର୍ଓ ବ୍ୟବସ୍ଥା ଉପରେ ନଜର
ରେଳବାଇ ବୋର୍ଡ ପକ୍ଷରୁ ଆଞ୍ଚଳିକ ରେଳବାଇଗୁଡ଼ିକୁ ୱାଟର କୁଲର ଓ ଜଳ ବିଶୋଧନ ବ୍ୟବସ୍ଥାର ବ୍ୟାପକ ଯାଞ୍ଚ ପାଇଁ ନିର୍ଦ୍ଦେଶ ଦିଆଯାଇଛି। ୱାଟର କୁଲରର ଟାଙ୍କି, ପାଇପ ଓ ନଳ ସଫା କରାଯିବା ସହ ଲିକେଜ୍ ଥିଲେ ତୁରନ୍ତ ମରାମତି କରାଯିବ। ୟୁଭି/ଆର୍ଓ ସିଷ୍ଟମର ମଧ୍ୟ ଯାଞ୍ଚ କରାଯିବ ଏବଂ ଆବଶ୍ୟକ ହେଲେ ନୂଆ ବ୍ୟବସ୍ଥା ସ୍ଥାପନ କରାଯିବ।
ଫିଲ୍ଟର କ୍ୟାଣ୍ଡଲ୍ ଓ ଅନ୍ୟାନ୍ୟ ଉପକରଣର ନିର୍ଦ୍ଧାରିତ ସମୟରେ ସର୍ଭିସିଂ ଓ ପରିବର୍ତ୍ତନ ମଧ୍ୟ ସୁନିଶ୍ଚିତ କରାଯିବ। ଜଳ ବିକ୍ରୟ କରୁଥିବା ଭେଣ୍ଡିଂ ମେସିନ୍ଗୁଡ଼ିକ ପାଇଁ ମଧ୍ୟ ସମାନ ସଫେଇ ଓ ଗୁଣବତ୍ତା ଯାଞ୍ଚ ବ୍ୟବସ୍ଥା ଲାଗୁ ହେବ।
ଜଳ ନମୁନାର ହେବ ତିନି ପ୍ରକାର ପରୀକ୍ଷା
ନିର୍ଦ୍ଧାରିତ ସ୍ଥାନରୁ ଜଳ ନମୁନା ସଂଗ୍ରହ କରି ଭୌତିକ, ରାସାୟନିକ ଓ ଜୀବାଣୁ ସମ୍ବନ୍ଧୀୟ ପରୀକ୍ଷା କରାଯିବ। ଜଳ ଉତ୍ସ, ଟ୍ରିଟମେଣ୍ଟ ପରବର୍ତ୍ତୀ ଆଉଟଲେଟ୍, ଟାଙ୍କି, କୁଲର, ଭେଣ୍ଡିଂ ମେସିନ୍ ଓ ନଳ/ବୁଥ୍ରୁ ନମୁନା ନିଆଯିବ। ଦୈନିକ ଭାବେ ଅବଶିଷ୍ଟ କ୍ଲୋରିନ୍ର ମାତ୍ରା ମଧ୍ୟ ଯାଞ୍ଚ କରାଯିବ। ଆବଶ୍ୟକ ହେଲେ ତୁରନ୍ତ ପୁନଃ କ୍ଲୋରିନେସନ୍ କିମ୍ବା ଅନ୍ୟାନ୍ୟ ସୁଧାରମୂଳକ ପଦକ୍ଷେପ ନିଆଯିବ।
ନୂଆ ଟାଙ୍କି ନିର୍ମାଣ ଓ ପୁରୁଣା ଟାଙ୍କି ପରିବର୍ତ୍ତନକୁ ତ୍ୱରାନ୍ୱିତ କରାଯିବ
ଓଭରହେଡ୍ ଓ ଅଣ୍ଡରଗ୍ରାଉଣ୍ଡ ଟାଙ୍କି ପରିବର୍ତ୍ତନ ଏବଂ ନୂଆ ଟାଙ୍କି ନିର୍ମାଣ ପାଇଁ ଅନୁମୋଦିତ କାର୍ଯ୍ୟଗୁଡ଼ିକର ଅଗ୍ରଗତି ଉପରେ ରେଳବାଇ ବୋର୍ଡ ନଜର ରଖିବ। ଆବଶ୍ୟକ ସ୍ଥାନରେ ନୂଆ ଅନୁମୋଦନ ପ୍ରକ୍ରିୟା ମଧ୍ୟ ଆରମ୍ଭ କରାଯିବ।
ଅଭିଯାନରେ ଚିହ୍ନଟ ହେଉଥିବା ତ୍ରୁଟି ଓ ତାହାର ସମାଧାନ ସମ୍ପର୍କିତ ଷ୍ଟେସନ୍ୱାରୀ ରିପୋର୍ଟ ପ୍ରସ୍ତୁତ ହେବ। ଏହା ମାଧ୍ୟମରେ ସମସ୍ୟାଗୁଡ଼ିକର ନିୟମିତ ନିରୀକ୍ଷଣ ଏବଂ ସମୟସୀମା ମଧ୍ୟରେ ସମାଧାନ ସୁନିଶ୍ଚିତ କରାଯିବ।
ଯାତ୍ରୀଙ୍କ ସୁବିଧା ସୀମାରେ ନ ରହି ରେଳବାଇ କଲୋନୀ ଓ କାର୍ଯ୍ୟସ୍ଥଳର ପାନୀୟ ଜଳ ଭିତ୍ତିଭୂମିକୁ ମଧ୍ୟ ଏହି ବ୍ୟବସ୍ଥାରେ ସାମିଲ କରାଯାଇଛି। ଏହି ସମନ୍ୱିତ ପଦକ୍ଷେପ ମାଧ୍ୟମରେ ଭାରତୀୟ ରେଳବାଇ ପାନୀୟ ଜଳ ଯୋଗାଣରେ ସ୍ୱଚ୍ଛତା, ନିୟମିତ ଯାଞ୍ଚ ଓ ଗୁଣବତ୍ତା ନିରୀକ୍ଷଣକୁ ଆହୁରି ସୁଦୃଢ଼ କରିବାକୁ ଲକ୍ଷ୍ୟ ରଖିଛି।
