✈️ ସେପ୍ଟେମ୍ବର ୩ରୁ ମାଲକାନଗିରି-ଭୁବନେଶ୍ୱର ସିଧାସଳଖ ବିମାନ ସେବା
ମାଲକାନଗିରି: ମାଲକାନଗିରିବାସୀଙ୍କ ପାଇଁ ଆସିଲା ବଡ଼ ଖୁସି ଖବର। ଆସନ୍ତା ସେପ୍ଟେମ୍ବର ୩ ତାରିଖରୁ ମାଲକାନଗିରି-ଭୁବନେଶ୍ୱର ମଧ୍ୟରେ ସିଧାସଳଖ ବିମାନ ସେବା ଆରମ୍ଭ ହେବାକୁ ଯାଉଛି। ଏହାଦ୍ୱାରା ଦୀର୍ଘ ସମୟର ଯାତାୟାତ ଅସୁବିଧାରୁ ଜିଲ୍ଲାବାସୀଙ୍କୁ ବଡ଼ ଆଶ୍ୱସ୍ତି ମିଳିବ।
ପ୍ରାରମ୍ଭିକ ପର୍ଯ୍ୟାୟରେ ୯ ଆସନ ବିଶିଷ୍ଟ ବିମାନ ଚଳାଚଳ କରିବା ନେଇ ସୂଚନା ମିଳିଛି। ଯାତ୍ରୀଙ୍କ ଟିକଟ୍ ବୁକିଂକୁ ସହଜ କରିବା ପାଇଁ ଖୁବ୍ଶୀଘ୍ର ଏକ ସ୍ୱତନ୍ତ୍ର ଅନଲାଇନ୍ ପୋର୍ଟାଲ୍ ଉପଲବ୍ଧ ହେବ। ବିମାନ ସେବା ଆରମ୍ଭ ପୂର୍ବରୁ ଜିଲ୍ଲା ପ୍ରଶାସନ ପକ୍ଷରୁ ଆବଶ୍ୟକ ଆନୁଷଙ୍ଗିକ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି।
ଏହି ସେବା ଆରମ୍ଭ ହେଲେ ରୋଗୀ, ଛାତ୍ରଛାତ୍ରୀ, ବ୍ୟବସାୟୀ ଏବଂ ସରକାରୀ କାର୍ଯ୍ୟରେ ଭୁବନେଶ୍ୱର ଯାଉଥିବା ଲୋକଙ୍କ ପାଇଁ ଯାତାୟାତ ଅଧିକ ସୁବିଧାଜନକ ହେବ। ମାଲକାନଗିରିରୁ ରାଜଧାନୀକୁ ଅଳ୍ପ ସମୟରେ ପହଞ୍ଚିବା ସମ୍ଭବ ହେବ।
ଅନ୍ୟପଟେ, ବିମାନ ସଂଯୋଗ ଦ୍ୱାରା ମାଲକାନଗିରିର ପର୍ଯ୍ୟଟନ ଶିଳ୍ପକୁ ମଧ୍ୟ ନୂଆ ଗତି ମିଳିବା ଆଶା କରାଯାଉଛି। ଚିତ୍ରକୋଣ୍ଡା ଜଳଭଣ୍ଡାର, ବାଲିମେଳା ସମେତ ଜିଲ୍ଲାର ପ୍ରାକୃତିକ ପର୍ଯ୍ୟଟନସ୍ଥଳୀକୁ ବାହାର ଅଞ୍ଚଳର ପର୍ଯ୍ୟଟକଙ୍କ ଯାତାୟାତ ସହଜ ହେବ। ଏହା ସହ ସ୍ଥାନୀୟ ହୋଟେଲ, ପରିବହନ, ବ୍ୟବସାୟ ଓ ରୋଜଗାର କ୍ଷେତ୍ରରେ ମଧ୍ୟ ନୂଆ ସୁଯୋଗ ସୃଷ୍ଟି ହେବାର ସମ୍ଭାବନା ରହିଛି।
ମାଲକାନଗିରିକୁ ଆକାଶପଥରେ ରାଜଧାନୀ ସହ ଯୋଡ଼ିବା ପଦକ୍ଷେପକୁ ଜିଲ୍ଲାର ବିକାଶ ଯାତ୍ରାରେ ଏକ ଐତିହାସିକ ମାଇଲଖୁଣ୍ଟ ଭାବେ ଦେଖାଯାଉଛି। ଯାତାୟାତ ସୁବିଧା ସହ ଏହା ମାଲକାନଗିରିର ଆର୍ଥିକ ଓ ପର୍ଯ୍ୟଟନ ବିକାଶକୁ ମଧ୍ୟ ନୂଆ ଦିଗ ଦେବ ବୋଲି ଆଶା ପ୍ରକାଶ ପାଇଛି।
