୩ରୁ ୪ ମାସ ମଧ୍ୟରେ ଶ୍ରୀମନ୍ଦିରରେ ଆରମ୍ଭ ହେବ ଧାଡ଼ି ଦର୍ଶନ

byjagratbharat
-August 28, 2026

🛕 ୩ରୁ ୪ ମାସ ମଧ୍ୟରେ ଶ୍ରୀମନ୍ଦିରରେ ଆରମ୍ଭ ହେବ ଧାଡ଼ି ଦର୍ଶନ

ଭୁବନେଶ୍ୱର: ମହାପ୍ରଭୁ ଶ୍ରୀଜଗନ୍ନାଥଙ୍କ ଦର୍ଶନକୁ ଅଧିକ ଶୃଙ୍ଖଳିତ ଓ ସୁବ୍ୟବସ୍ଥିତ କରିବା ଦିଗରେ ଆଉ ଏକ ବଡ଼ ପଦକ୍ଷେପ ନେବାକୁ ଯାଉଛନ୍ତି ସରକାର। ଆସନ୍ତା ୩ରୁ ୪ ମାସ ମଧ୍ୟରେ ପୁରୀ ଶ୍ରୀମନ୍ଦିରରେ ଧାଡ଼ି ଦର୍ଶନ ବ୍ୟବସ୍ଥା କାର୍ଯ୍ୟକ୍ଷମ କରାଯିବ ବୋଲି ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ସୂଚନା ଦେଇଛନ୍ତି।

ଲୋକସେବା ଭବନର ଆଇନ ବିଭାଗ ସମ୍ମିଳନୀ କକ୍ଷରେ ଆୟୋଜିତ ଏକ ଉଚ୍ଚସ୍ତରୀୟ ବୈଠକରେ ଶ୍ରୀମନ୍ଦିରର ଦର୍ଶନ ବ୍ୟବସ୍ଥା, ଭିଡ଼ ନିୟନ୍ତ୍ରଣ ଓ ଭକ୍ତଙ୍କ ସୁବିଧା ନେଇ ବିସ୍ତୃତ ଆଲୋଚନା ହୋଇଛି। ବୈଠକରେ ଆଇଆଇଟି ଭୁବନେଶ୍ୱର ପକ୍ଷରୁ ଧାଡ଼ି ଦର୍ଶନ ପାଇଁ ବିଭିନ୍ନ ମଡେଲ୍ ଉପସ୍ଥାପନ କରାଯାଇଥିଲା।

୫ଟି ରାମ୍ପରେ ଦର୍ଶନ

ପ୍ରସ୍ତାବିତ ବ୍ୟବସ୍ଥା ଅନୁସାରେ ଭକ୍ତମାନଙ୍କ ପାଇଁ ୫ଟି ସ୍ୱତନ୍ତ୍ର ରାମ୍ପ ବ୍ୟବସ୍ଥା କରାଯିବ। ପ୍ରତ୍ୟେକ ରାମ୍ପରେ ଏକ ସମୟରେ ପ୍ରାୟ ୫୦ ଜଣ ଭକ୍ତ ଦର୍ଶନ କରିପାରିବେ। ଏହା ଦ୍ୱାରା ଘଣ୍ଟାକୁ ପ୍ରାୟ ୮ରୁ ୧୦ ହଜାର ଭକ୍ତଙ୍କୁ ଶୃଙ୍ଖଳିତ ଭାବେ ଦର୍ଶନ କରାଇବା ଲକ୍ଷ୍ୟ ରହିଛି।

ଗରୁଡ଼ ସ୍ତମ୍ଭଠାରୁ ବାହାର କାଠ ପର୍ଯ୍ୟନ୍ତ ରାମ୍ପ ନିର୍ମାଣ କରାଯିବା ସହ ସାତପାହାଚ ଅଞ୍ଚଳରେ ଭିଡ଼ ନିୟନ୍ତ୍ରଣ ପାଇଁ ମଧ୍ୟ ବ୍ୟବସ୍ଥା କରାଯିବ। ମନ୍ଦିର ଭିତରେ ଥିବା ୯ଟି ଲାଇନ୍‌କୁ କିଭଳି ଅଧିକ ପ୍ରଭାବୀ ଭାବେ ବ୍ୟବହାର କରାଯିବ, ସେନେଇ ମଧ୍ୟ ଯୋଜନା ପ୍ରସ୍ତୁତ ହେଉଛି।

ପ୍ରଥମେ ହେବ ପାଇଲଟ୍ ମଡେଲ୍

ନୂଆ ବ୍ୟବସ୍ଥା ଲାଗୁ କରିବା ପୂର୍ବରୁ ଏକ ପାଇଲଟ୍ ମଡେଲ୍ ପ୍ରସ୍ତୁତ କରାଯିବ। ଏହାକୁ ଛତିଶା ନିଯୋଗ ଓ ଶ୍ରୀମନ୍ଦିର ପ୍ରଶାସନ ଅନୁଧ୍ୟାନ କରିବେ। ମନ୍ଦିରର ନୀତିକାନ୍ତି କିମ୍ବା ଭକ୍ତଙ୍କ ଦର୍ଶନରେ ଯେପରି କୌଣସି ବାଧା ନ ଉପୁଜେ, ସେଥିପାଇଁ ପରୀକ୍ଷାମୂଳକ ଭାବେ ଏହି ମଡେଲ୍‌କୁ ଯାଞ୍ଚ କରାଯିବ।

ନାଟମଣ୍ଡପରେ ଏସି ବ୍ୟବସ୍ଥା ନେଇ ଆଲୋଚନା

ବୈଠକରେ ସାତପାହାଚରେ ଭିଡ଼ ନିୟନ୍ତ୍ରଣ ସହ ନାଟମଣ୍ଡପରେ ଶୀତତାପ ନିୟନ୍ତ୍ରିତ ବ୍ୟବସ୍ଥା ନେଇ ମଧ୍ୟ ଆଲୋଚନା ହୋଇଛି। ପୂର୍ବରୁ ଭକ୍ତମାନଙ୍କ ଦର୍ଶନ ସୁବିଧା ପାଇଁ ବିଭିନ୍ନ ଉଚ୍ଚତାରେ ପ୍ଲାଟଫର୍ମ ନିର୍ମାଣ ଯୋଜନା ହୋଇଥିଲା। ତେବେ ବୈଷୟିକ ସମସ୍ୟା ଯୋଗୁଁ ଏହାକୁ ସ୍ଥଗିତ ରଖାଯାଇଥିଲା। ଏହାର ଯାନ୍ତ୍ରିକ ଯାଞ୍ଚ ଦାୟିତ୍ୱ ଆଇଆଇଟି ଭୁବନେଶ୍ୱରକୁ ଦିଆଯାଇଥିଲା।

ବଢ଼ୁଥିବା ଭକ୍ତଙ୍କ ସଂଖ୍ୟା ଓ ଛୁଟିଦିନରେ ହେଉଥିବା ପ୍ରବଳ ଭିଡ଼କୁ ଦୃଷ୍ଟିରେ ରଖି ଦର୍ଶନ ବ୍ୟବସ୍ଥାରେ ଏହି ପରିବର୍ତ୍ତନ ଅଣାଯାଉଛି। ଧାଡ଼ି ଦର୍ଶନ ବ୍ୟବସ୍ଥା କାର୍ଯ୍ୟକ୍ଷମ ହେଲେ ମନ୍ଦିର ଭିତରେ ଭିଡ଼ କମିବା ସହ ଭକ୍ତମାନେ ଅଧିକ ସୁବିଧାରେ ମହାପ୍ରଭୁଙ୍କ ଦର୍ଶନ ପାଇପାରିବେ ବୋଲି ଆଶା କରାଯାଉଛି।

ବୈଠକରେ ଆଇନ ବିଭାଗର ପ୍ରମୁଖ ଶାସନ ସଚିବ ଡ. ପବିତ୍ର ମୋହନ ସାମଲ, ପୁରୀ ଏସ୍‌ପି ପ୍ରତୀକ ସିଂ, ବିଭାଗୀୟ ବରିଷ୍ଠ ଅଧିକାରୀ, ଓବିସିସି ଅଧିକାରୀ ଏବଂ ଆଇଆଇଟି ଭୁବନେଶ୍ୱରର ବୈଷୟିକ ପରାମର୍ଶଦାତାମାନେ ଉପସ୍ଥିତ ଥିଲେ।