ମୋଦି ୩.୦ରେ ଆସିପାରେ ବଡ଼ ପରିବର୍ତ୍ତନ! କ୍ୟାବିନେଟ୍ରେ ନୂଆ ମୁହଁକୁ ମିଳିପାରେ ସୁଯୋଗ
ନୂଆଦିଲ୍ଲୀ: ୨୦୨୯ ଲୋକସଭା ନିର୍ବାଚନ ଏବଂ ଆଗାମୀ ବିଭିନ୍ନ ରାଜ୍ୟ ବିଧାନସଭା ନିର୍ବାଚନକୁ ନଜରରେ ରଖି କେନ୍ଦ୍ରର ମୋଦି ୩.୦ ସରକାରରେ ବଡ଼ ଅଦଳବଦଳ ହେବା ନେଇ ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି। ଭାଜପାର ସାଂଗଠନିକ ଟିମ୍ରେ ପରିବର୍ତ୍ତନ ପରେ ଏବେ କେନ୍ଦ୍ରୀୟ ମନ୍ତ୍ରିପରିଷଦରେ ମଧ୍ୟ ଫେରବଦଳ ହୋଇପାରେ ବୋଲି ଆଲୋଚନା ହେଉଛି।
ସୂତ୍ର ଅନୁସାରେ, ମନ୍ତ୍ରୀମାନଙ୍କ କାର୍ଯ୍ୟଦକ୍ଷତା, ବୟସ, ରାଜ୍ୟଭିତ୍ତିକ ରାଜନୈତିକ ସମୀକରଣ ଏବଂ ଏନ୍ଡିଏର ସହଯୋଗୀ ଦଳଗୁଡ଼ିକର ଭୂମିକାକୁ ବିଚାର କରି ମନ୍ତ୍ରିପରିଷଦରେ ନୂଆ ମୁହଁଙ୍କୁ ସାମିଲ କରାଯାଇପାରେ।
ବର୍ତ୍ତମାନ ପ୍ରଧାନମନ୍ତ୍ରୀଙ୍କ ସମେତ କେନ୍ଦ୍ରୀୟ ମନ୍ତ୍ରିପରିଷଦରେ ୬୯ ଜଣ ସଦସ୍ୟ ଥିବାବେଳେ ସମ୍ବିଧାନ ଅନୁଯାୟୀ ସର୍ବାଧିକ ୮୧ ଜଣ ମନ୍ତ୍ରୀ ରହିପାରିବେ। ତେଣୁ ଆହୁରି ୧୨ ଜଣଙ୍କୁ ସାମିଲ କରିବାର ସୁଯୋଗ ରହିଛି। ଖାଲି ପଡ଼ିଥିବା କିଛି ପଦରେ ନୂଆ ନେତାଙ୍କୁ ଦାୟିତ୍ୱ ଦିଆଯାଇପାରେ।
ଯୁବ ଓ ମହିଳା ନେତାଙ୍କ ଉପରେ ଫୋକସ୍
ସମ୍ଭାବ୍ୟ କ୍ୟାବିନେଟ୍ ଫେରବଦଳରେ ଯୁବ ନେତାଙ୍କୁ ଅଧିକ ସୁଯୋଗ ଦେବା ଉପରେ ଭାଜପା ଗୁରୁତ୍ୱ ଦେଇପାରେ। ଏହା ସହିତ ମହିଳା ନେତାଙ୍କ ପ୍ରତିନିଧିତ୍ୱ ବଢ଼ାଇବା ନେଇ ମଧ୍ୟ ବିଚାର ହୋଇପାରେ। ଛାତ୍ର ଓ ଯୁବପିଢ଼ିଙ୍କ ମଧ୍ୟରେ ଦଳର ପହଞ୍ଚ ବଢ଼ାଇବା ପାଇଁ ନୂଆ ପିଢ଼ିର ନେତାଙ୍କୁ କେନ୍ଦ୍ରରେ ଦାୟିତ୍ୱ ଦେବା ନେଇ ଚର୍ଚ୍ଚା ରହିଛି।
ବରିଷ୍ଠ ମନ୍ତ୍ରୀଙ୍କ ଦାୟିତ୍ୱ କମିପାରେ
ବର୍ତ୍ତମାନ ଅମିତ ଶାହା, ଜେପି ନଡ୍ଡା, ଶିବରାଜ ସିଂହ ଚୌହାନ ଓ ଅଶ୍ୱିନୀ ବୈଷ୍ଣବଙ୍କ ଭଳି କିଛି ବରିଷ୍ଠ ନେତା ଏକାଧିକ ମନ୍ତ୍ରଣାଳୟର ଦାୟିତ୍ୱ ସମ୍ଭାଳୁଛନ୍ତି। ଫେରବଦଳ ହେଲେ ସେମାନଙ୍କ ଉପରୁ କିଛି ଦାୟିତ୍ୱ କମାଇ ଅନ୍ୟ ନେତାଙ୍କୁ ନୂଆ ବିଭାଗ ଦିଆଯାଇପାରେ।
ରାଜ୍ୟ ଓ ସହଯୋଗୀ ଦଳକୁ ମିଳିପାରେ ଗୁରୁତ୍ୱ
ଆଗାମୀ ନିର୍ବାଚନୀ ରଣନୀତିରେ ଉତ୍ତରପ୍ରଦେଶ, ପଞ୍ଜାବ, ଗୁଜରାଟ, କର୍ନାଟକ, ହିମାଚଳ ପ୍ରଦେଶ, ମଧ୍ୟପ୍ରଦେଶ, ରାଜସ୍ଥାନ ଓ ମହାରାଷ୍ଟ୍ର ଭଳି ରାଜ୍ୟକୁ ଗୁରୁତ୍ୱ ଦିଆଯାଇପାରେ। ଏନ୍ଡିଏର ସହଯୋଗୀ ଦଳଗୁଡ଼ିକ ମଧ୍ୟ ଅଧିକ ପ୍ରତିନିଧିତ୍ୱ ଦାବି କରିପାରନ୍ତି। ଶିବସେନା, ଟିଡିପି ସମେତ ଅନ୍ୟ ସହଯୋଗୀ ଦଳର ନେତାଙ୍କୁ ମନ୍ତ୍ରିପରିଷଦରେ ସ୍ଥାନ ମିଳିବା ନେଇ ମଧ୍ୟ ଚର୍ଚ୍ଚା ଚାଲିଛି।
ତେବେ ଏପର୍ଯ୍ୟନ୍ତ କ୍ୟାବିନେଟ୍ ଅଦଳବଦଳ ନେଇ ଭାଜପା କିମ୍ବା କେନ୍ଦ୍ର ସରକାରଙ୍କ ପକ୍ଷରୁ କୌଣସି ଆନୁଷ୍ଠାନିକ ଘୋଷଣା ହୋଇନାହିଁ। ଫଳରେ କିଏ ମନ୍ତ୍ରୀ ହେବେ ଏବଂ କାହାର ଦାୟିତ୍ୱ ବଦଳିବ, ସେନେଇ ଚର୍ଚ୍ଚା ଏବେ ଅନୁମାନ ମଧ୍ୟରେ ସୀମିତ ରହିଛି।
