ଜିଲ୍ଲା ସ୍ତରୀୟ ସଡକ ସୁରକ୍ଷା କମିଟୀ ବୈଠକ ଅନୁଷ୍ଠିତ ।
ଜାନୁଆରୀ ୧୮ ରୁ ଫେବୃଆରୀ ୧୭ ପର୍ଯ୍ୟନ୍ତ ଜାତୀୟ ସଡ଼କ ସୁରକ୍ଷା ମାସ ପାଳନ ।
(ଜେ ବି ଏନ /ସୁଶାନ୍ତ କୁମାର) ୧୪/୦୧ /୨୦୨୧ ଅନୁଗୋଳ :ରାସ୍ତା ଦୁର୍ଘଟଣାକୁ କିପରି ନିୟନ୍ତ୍ରଣ କରାଯାଇପାରିବ ଓ ଦୁର୍ଘଟଣାଜନିତ ମୃତ୍ୟୁ ସଂଖ୍ୟା କମାଇବା ସହ ଆହତମାନଙ୍କୁ ତୁରନ୍ତ ଚିକିତ୍ସାସେବା ଯୋଗାଇ ଦେବା ସମ୍ପର୍କରେ ଗଠିତ ଜିଲ୍ଲା ସଡକ ସୁରକ୍ଷା କମିଟୀର ବୈଠକ ଗତକାଲି ମଧ୍ୟାହ୍ନରେ ଜିଲ୍ଲାପାଳ ଶ୍ରୀ ସିଦ୍ଧାର୍ଥ ଶଙ୍କର ସ୍ବାଇଁଙ୍କ ଅଧ୍ୟକ୍ଷତାରେ ତାଙ୍କ କାର୍ଯ୍ୟାଳୟ ପ୍ରକୋଷ୍ଠରେ ଅନୁଷ୍ଠିତ ହୋଇଯାଇଛି । ବିଗତ ବର୍ଷରେ ଘଟିଥିବା ଦୁର୍ଘଟଣା ଓ ଏହାର ହାରକୁ କମାଇବାକୁ ନେଇ ଯୁଗ୍ମ ନିରୀକ୍ଷଣ ରିପୋର୍ଟ ନିୟମିତ ପ୍ରଦାନ କରିବାକୁ ଜିଲ୍ଲାପାଳ ପରାମର୍ଶ ଦେବା ସହ ଏହି ବୈଠକ ମାଧ୍ୟମରେ ସଡକ ସୁରକ୍ଷା ସମ୍ପର୍କୀତ ତଥ୍ୟକୁ ଅପଡେଟ୍ କରିବାକୁ ନିର୍ଦ୍ଦେଶ ଦେଇଛନ୍ତି । ଗତବର୍ଷ ମାର୍ଚ୍ଚ ମାସରୁ ଅଗଷ୍ଟ ମାସ ମଧ୍ୟରେ କରୋନାର ପ୍ରାର୍ଦୁଭାବକୁ ନେଇ ସମ୍ପୂର୍ଣ୍ଣ ଲକ୍ ଡାଉନ୍ ଥିବା ସ୍ଵତ୍ତେ ଦୁର୍ଘଟଣାର ହାରରେ କୌଣସି ନିୟନ୍ତ୍ରଣ ହୋଇପାରିନଥିଲା । ବାରମ୍ବାର ଦୁର୍ଘଟଣା ଘଟି ଗୁରୁତର ଆହାତ ଓ ମୃତ୍ୟୁ ସଂଖ୍ୟା ବୃଦ୍ଧି ପାଉଥିବାରୁ ଜିଲ୍ଲାପାଳ କ୍ଷୋଭ ପ୍ରକାଶ କରିଥିଲେ । ସମସ୍ତ ପ୍ରକାର ସାଙ୍ଘାତିକ ଦୁର୍ଘଟଣାର ଯୁଗ୍ମ ନିରୀକ୍ଷଣ ରିପୋର୍ଟ ବୈଠକରେ ପ୍ରଦାନ କରି ଦୁର୍ଘଟଣାର କାରଣକୁ ବିଶ୍ଳେଷଣ କରିବାକୁ ଜିଲ୍ଲାପାଳ ପରାମର୍ଶ ଦେଇଛନ୍ତି । ଉଭୟ ଅନୁଗୋଳ ଓ ତାଳଚେର ଆଞ୍ଚଳିକ ପରିବହନ ଅଧିକାରୀ ଚିହ୍ନଟ ହୋଇଥିବା ବ୍ଲାକ ସ୍ପଟ ରେ ଘଟୁଥିବା ଦୁର୍ଘଟଣାକୁ ନିୟମିତ ଯାଞ୍ଚ କରି ଜିଲ୍ଲାପାଳଙ୍କୁ ରିପୋର୍ଟ ମାଧ୍ୟମରେ ଅବଗତ କରିବେ । ଦୁର୍ଘଟଣା ପାଇଁ ଯୁଗ୍ମ ନିରୀକ୍ଷଣ ଦାୟିତ୍ବରେ ଥିବା ବିଭାଗଗୁଡିକ ସାଂଘାତିକ ଦୁର୍ଘଟଣା ଘଟୁଥିବାର ପ୍ରତିକାର ପଦକ୍ଷେପ ସମ୍ପର୍କରେ ଜଣାଇବା ସହ ଆରକ୍ଷୀ ଅଧକ୍ଷକ , ଭଭୟ ଅଂଚଳିକ ପରିବହନ ଅଧିକାରୀ ,ସମ୍ବଲପୁର ଓ ଢେଙ୍କାନାଳ ଜାତୀୟ ରାଜପଥ ପ୍ରାଧିକରଣ କର୍ତ୍ତୁପକ୍ଷଙ୍କ ସମେତ ଅନ୍ୟାନ୍ୟ ବିଭାଗୀୟ ଅଧିକାରୀ ରାସ୍ତା ଦୁର୍ଘଟଣା ଓ ଏହାର ଆନୁଷଙ୍ଗିକ ସମସ୍ୟାକୁ ଅନୁଧ୍ୟାନ କରି ନିଜ ବିଭାଗ ମାଧ୍ୟମରେ ଏହାର ନିୟନ୍ତ୍ରଣ ପାଇଁ ପଦକ୍ଷେପ ନେବେ । ଯୁଗ୍ମ ନିରିକ୍ଷଣ ଟିମ ଦୁର୍ଘଟଣାର ବିଶ୍ଳେଷଣ ସମ୍ପର୍କରେ ଏକ ବିସ୍ତୀର୍ଣ୍ଣ ଅନୁପାଳନ ରିପୋର୍ଟ ଜିଲ୍ଲା ସଡକ ସୁରକ୍ଷା କମିଟୀର ସଦସ୍ୟମାନଙ୍କୁ ପ୍ରଦାନ କରିବାକୁ ପରାମର୍ଶ ଦିଆଯାଇଛି । ବୈଠକରେ ଚଳିତ ବର୍ଷ ଜାତୀୟ ସଡକ ସୁରକ୍ଷା ମାସ ପାଳନ ସମ୍ପର୍କରେ ଆଲୋଚନା ହୋଇଥିଲା । ସଡକ ସୁରକ୍ଷା ନିମନ୍ତେ ନିଆଯାଉଥିବା ବିଭିନ୍ନ କାର୍ଯ୍ୟକ୍ରମକୁ ବ୍ୟାପକ ଭାବେ କରିବା ନିମନ୍ତେ ଚଳିତ ବର୍ଷ ପ୍ରଥମ କରି ଜାନୁଆରୀ ୧୮ ତାରିଖରୁ ଫେବୃଆରୀ ମାସ ୧୭ ତାରିଖ ପର୍ଯ୍ୟନ୍ତ ( ଏକ ମାସ ) ବିଭିନ୍ନ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହେବା ସମ୍ପର୍କରେ ବୈଠକରେ ଆଲୋଚନା ହୋଇଥିଲା । ଏହି ବୈଠକରେ ଆରକ୍ଷୀ ଅଧୀକ୍ଷକ ଶ୍ରୀ ଜଗମୋହନ ମୀନା , ଅତିରିକ୍ତ ଜିଲ୍ଲାପାଳ ( ରାଜସ୍ବ ) ଶ୍ରୀ ସନ୍ତୋଷ କୁମାର ପ୍ରଧାନ , ଜିଲ୍ଲା ମୁଖ୍ୟ ଚିକିତ୍ସା ଓ ଜନସ୍ବାସ୍ଥ୍ୟ ଅଧିକାରୀ ଡାଃ ଅଭୟ କୁମାର ଦାଶ , ପୂର୍ତ୍ତ ବିଭାଗର ନିର୍ବାହୀ ଯନ୍ତ୍ରୀ ଶ୍ରୀ ସୁଧାଂଶୁ କୁମାର ନାୟକ , ଅନୁଗୋଳ ଆଞ୍ଚଳିକ ପରିବହନ ଅଧିକାରୀ ଶ୍ରୀ ବିଭାଭଞ୍ଜନ ସାମନ୍ତସିଂହାର , ତାଳଚେର ଆଞ୍ଚଳିକ ପରିବହନ ଅଧିକାରୀ ଶ୍ରୀ ସମରେନ୍ଦ୍ର ପଟ୍ଟନାୟକ , ଆସିଷ୍ଟାଣ୍ଟ କଲେକ୍ଟର ଶ୍ରୀ ସୁବ୍ରତ କୁମାର ବେହେରା , ଟ୍ରକ ମାଲିକ ସଂଘ ଓ ଜିଲ୍ଲା ଟ୍ରକ୍ ମାଲିକ ସଂଘର ସଭାପତି ଶ୍ରୀ ବିଭୁତି ପ୍ରସାଦ ଦାସ , ଅଧିସ୍ବିକୃତ ସାମ୍ବାଦିକ ଶ୍ରୀ ସଂଗ୍ରାମ ରଞ୍ଜନ ଦାସଙ୍କ ସମେତ ସମ୍ବଲପୁର ଓ ଢେଙ୍କାନାଳ ଜାତୀୟ ରାଜପଥ ପ୍ରାଧିକରଣ ଙ୍କ ପ୍ରତିନିଧି ଏବଂ ବିଭିନ୍ନ ବିଭାଗର ଜିଲ୍ଲା ସ୍ତରୀୟ ଅଧିକାରୀମାନେ ଯୋଗ ଦେଇଥିଲେ ।
