ଭୁବନେଶ୍ଵର – ଆଜି ସନ୍ଧ୍ୟାରେ ସଚ୍ଚିବାଳୟ ମାର୍ଗସ୍ଥିତ ଉତ୍କଳ ସଂଗୀତ ମହାବିଦ୍ୟାଳୟ ପରିସରରେ ଥିବା ଉତ୍କଳ ମଣ୍ଡପ ଠାରେ ମୟୁରଭଞ୍ଜ ସାଂସ୍କୃତିକ ସଂସଦ, ଭୁବନେଶ୍ଵର ଦ୍ଵାରା ଆୟୋଜିତ ଐତିହାସିକ ତିନିଦିନିଆ ଏକାଦଶ ମୟୁରଭଞ୍ଜ ଉତ୍ସବର ଉଦ୍ଘାଟନୀ ପର୍ବ ମହା ସମାରୋହରେ ସମାପନ ହୋଇଯାଇଛି। ଏହି ଚିତ୍ତାକର୍ଷକ ଉତ୍ସବକୁ ଉଦ୍ଘାଟନ କରିଥିଲେ ମୁଖ୍ୟ ଅତିଥ୍ ଭାବେ ଓଡ଼ିଶାର ମହାମହିମ ରାଜ୍ୟପାଳ ଡକ୍ଟର ହରିବାବୁ ସମ୍ଭମପତି ମହୋଦୟ।
ସମ୍ମାନିତ ଅତିଥ ଭାବେ ମଞ୍ଚାସୀନ ଥିଲେ ଆମ ରାଜ୍ୟର ଦୁର୍ଗ, ଅବକାରୀ ଓ ଆଇନ ବିଭାଗର ମାନ୍ୟବର ମନ୍ତ୍ରୀ ଶ୍ରୀଯୁକ୍ତ ପୃଥ୍ୱୀରାଜ ହରିଚନ୍ଦନ, ମୟୁରଭଞ୍ଜ ସଂସଦର ସଭାପତି ତଥା ଆମ ରାଜ୍ୟର ଗୃହନିର୍ମାଣ ଓ ନଗର ଉନ୍ନୟନ ବିଭାଗର ମାନ୍ୟବର ମନ୍ତ୍ରୀ ଡକ୍ଟର କୃଷ୍ଣଚନ୍ଦ୍ର ମହାପାତ୍ର, କାର୍ଯ୍ୟକାରୀ ସଭାପତି ତଥା ଉତ୍ସବ କମିଟିର ଅଧ୍ୟକ୍ଷ ଓଡ଼ିଶା ଜଙ୍ଗଲ ଓ ପରିବେଶ ବିଭାଗର ମାନ୍ୟବର ମନ୍ତ୍ରୀ ଇଂଜିନିୟର ଗଣେଶ ରାମ ସିଂ ଖୁଣ୍ଟିଆ, ମୟୁରଭଞ୍ଜ ସାଂସଦ ଶ୍ରୀ ନବ ଚରଣ ମାଝି, ସାଧାରଣ ସଂପାଦକ ଡକ୍ଟର ରଜନୀକାନ୍ତ ବିଶ୍ବାଳ, ସଂପାଦକ ଚିନ୍ମୟ ଦାସ ପଟ୍ଟନାୟକ ଓ ସ୍ୱରୂପ ରଞ୍ଜନ ଦାସ। ମହାମହିମ ରାଜ୍ୟପାଳ ପ୍ରଦୀପ ପ୍ରଜ୍ଜଳନ କରି ଉଦ୍ଘାଟନ କରିବା ପରେ ଆରମ୍ଭ ହୋଇଥିଲା ସଭାକାର୍ଯ୍ୟ।
ମୁଖ୍ୟ ଅତିଥି ଓ ସମ୍ମାନିତ ଅତିଥିମାନଙ୍କ ବହୁମୂଲ୍ୟ ବକ୍ତବ୍ୟ ପରେ ଉନ୍ମୋଚିତ ହୋଇଥିଲା ମୟୁରଭଞ୍ଜ ଉତ୍ସବର ସ୍ମରଣିକା। ସାଧାରଣ ସଂପାଦକ ଡକ୍ଟର ରଜନୀକାନ୍ତ ବିଶ୍ଵାଳ ଧନ୍ୟବାଦ ଅର୍ପଣ କରିସାରିବା ପରେ ଆରମ୍ଭ ହୋଇଥିଲା ମନ ମୁଗ୍ଧକର ସାଂସ୍କୃତିକ କାର୍ଯ୍ୟକ୍ରମ। ପ୍ରଥମେ ଅଡ଼ିଓ-ଭିଜୁଆଲ୍ ମାଧ୍ୟମରେ ପ୍ରଦର୍ଶିତ ହୋଇଥିଲା ମୟୁରଭଞ୍ଜ ସଂସଦର ଶୀର୍ଷକ ସଂଗୀତ। ପରିଚାଳନା କରିଥିଲେ ସିନେ ନିର୍ଦ୍ଦେଶକ ତାପସ ସରଘରିଆ ଏବଂ ତାଙ୍କ ଟିମ୍। ପରେ ପରେ ଆରମ୍ଭ ହୋଇଥିଲା ବାରିପଦାସ୍ଥିତ ଉତ୍ତରସାହି ଛଉନୃତ୍ୟ ପ୍ରତିଷ୍ଠାନ ଦ୍ଵାରା ପରିବେଷିତ ବିଶ୍ଵ ପ୍ରସିଦ୍ଧ ମୟୁରଭଞ୍ଜ ଛଉନୃତ୍ୟ। ମନମୁଗ୍ଧକର ଝୁମର ନୃତ୍ୟ ପରିବେଷଣ କରିଥିଲେ ରାଇରଙ୍ଗପୁରର ଆର.ଏମ୍.ଏସ୍ ଝୁମର ସଂଗୀତ ଏକାଡ଼େମୀର ଦକ୍ଷ କଳାକାରଗଣ। ଭୁବନେଶ୍ଵର ସ୍ଥିତ ମୟୂରଭଞ୍ଜ ଆଦିମ ଆଦିବାସୀ ସଂଘ ପାରପମ୍ପରିକ ସାନ୍ତାଳୀ ନୃତ୍ୟ ପରିବେଷଣ କରିଥିବା ବେଳେ ବାରିପଦାର ଆଇ.ଡ଼ି.ଏସ୍. ଡ୍ୟାନ୍ସଗ୍ରୁପ୍ ଏବଂ ଡ୍ରପ ବିଟ୍ ଡ୍ୟାନ୍ସ ଗ୍ରୁପ୍ ପରିବେଷଣ କରିଥିଲେ ଚିତ୍ତାକର୍ଷକ ଆଧୁନିକ ନୃତ୍ୟ ସାଙ୍ଗକୁ ଓଲିଉଡ୍ ମିକ୍ସ ନୃତ୍ୟ।
ଓଡ଼ିଆ ଚଳଚ୍ଚିତ୍ର ଜଗତର ବିଶିଷ୍ଟ ପ୍ରଚ୍ଛଦପଟ ଗାୟକ ବିଶ୍ଵ ମୋହନ କବି ତାଙ୍କ ସୁମଧୁର ସ୍ଵରରେ ଦର୍ଶକଙ୍କର ମନ ଜିଣିଥିବା ବେଳେ ଯୁବ କଣ୍ଠଶିଳ୍ପୀ ହଂସରାଜ ଦାସ ତାଙ୍କ ସଂଗୀତର ଯାଦୁ ଦେଖାଇଥିଲେ। ଉତ୍ସବର ଅନ୍ୟତମ ଆକର୍ଷଣ କ୍ରାଫ୍ଟ ମେଳାରେ ପଥର, ଟସର, ବାଉଁଶ ଓ ସବାଇ ଘାସର କାରୁକାର୍ଯ୍ୟ ସମସ୍ତଙ୍କୁ ଆକର୍ଷିତ କରିଥିବା ବେଳେ ମୟୁରଭଞ୍ଜର ପ୍ରସିଦ୍ଧ ସୁଆଦିଆ ବ୍ୟଞ୍ଜନ ମୁଢ଼ିମାଂସ, ଦଳାଖେଚୁଡ଼ି, ରାମରୋଚକ କଡା ତରକାରୀ, ଆରିସାପିଠା, ଗୁଡ଼ଲଡୁ ସମସ୍ତଙ୍କୁ ଆମୋଦିତ କରିଥିଲା। ଉଦ୍ଘାଟନୀ ଉତ୍ସବର କାର୍ଯ୍ୟକ୍ରମ ପରିଚଳନା ସଂସଦର ସଂପାଦକ ତଥା ଓଡ଼ିଆ ସିନେ ଜଗତର ବିଶିଷ୍ଟ ଲେଖକ ଓ ନିର୍ଦ୍ଦେଶକ ଚିନ୍ମୟ ଦାସ ପଟ୍ଟନାୟକ କରିଥିବା ବେଳେ ଉପସ୍ଥାପନା ଦାୟିତ୍ଵରେ ଥିଲେ ସିନେ ଜଗତର ବିଶିଷ୍ଟ ଅଭିନେତା ସୁକାନ୍ତ ରଥ। ଆଗାମୀ କାଲି (ଶନିବାର) ଓ ଉଦ୍ଯାପନୀ ଉତ୍ସବ (ରବିବାର)ରେ ମଧ୍ୟ ଅନେକ ଧମାକାଦାର କାର୍ଯ୍ୟକ୍ରମ ରହିଥିବା ବେଳେ ଏହି ତିନିଦିନିଆ ଜାନୁଆରୀ ୩୦, ୩୧ ଓ ଫେବୃଆରୀ ୧, ୨୦୨୬ ଐତିହାସିକ ମୟୂରଭଞ୍ଜ ଉତ୍ସବକୁ ମନଭରି ଉପଭୋଗ କରିବା ପାଇଁ ନିଶୁଳ୍କ ପ୍ରବେଶର ବ୍ୟବସ୍ଥା ରହିଛି ବୋଲି ସଂସଦର ସଂପାଦକ ତଥା ବିଶିଷ୍ଟ ଉଦ୍ୟୋଗପତି ସ୍ଵରୂପ ରଞ୍ଜନ ଦାସ ମତପ୍ରକାଶ କରିଛନ୍ତି ।
