ନୁଆଦିଲ୍ଲୀ, ୨୮/୦୩ : ଆଜି ଜେୱାରରେ ନୋଏଡା ଅନ୍ତର୍ଜାତୀୟ ବିମାନବନ୍ଦର ଉଦଘାଟନ ସହିତ ବର୍ଷ ବର୍ଷ ଧରି କଳ୍ପନା କରାଯାଇଥିବା ଏକ ସ୍ୱପ୍ନ ଶେଷରେ ସତ ହେବାକୁ ଯାଉଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସକାଳ ୧୧ଟା ୩୦ରେ ବିମାନବନ୍ଦର ଉଦଘାଟନ କରିବେ। ଏହା ପରେ ସେ ପ୍ରାୟ ୨ଲକ୍ଷ ଲୋକଙ୍କ ଯୋଗଦାନ ପାଇଁ ଏକ ସାଧାରଣ ସମାବେଶକୁ ସମ୍ବୋଧିତ କରିବେ।
ସ୍ୱତନ୍ତ୍ର ସୁରକ୍ଷା ଗୋଷ୍ଠୀ ସୁରକ୍ଷା ବ୍ୟବସ୍ଥାର ଦାୟିତ୍ୱ ନେଇଛି। CISF, PAC, RAF, ଏବଂ ATS କର୍ମଚାରୀମାନଙ୍କୁ ମଧ୍ୟ ନିୟୋଜିତ କରାଯାଇଛି। ଏହା ସହିତ ସୁରକ୍ଷା ସୁନିଶ୍ଚିତ କରିବା ପାଇଁ ୫୦୦୦ ପୋଲିସ କର୍ମଚାରୀଙ୍କୁ ନିୟୋଜିତ କରାଯିବ। ପୋଲିସ ସହାୟତା ଡେସ୍କ ସହିତ ସିସିଟିଭି ନିରୀକ୍ଷଣ ପାଇଁ ଏକ ନିୟନ୍ତ୍ରଣ କକ୍ଷ କାର୍ଯ୍ୟକ୍ଷମ ହୋଇଛି।
ସମ୍ପୂର୍ଣ୍ଣ ଅଞ୍ଚଳକୁ ‘ରେଡ୍ ଜୋନ୍’ ଘୋଷଣା କରାଯାଇଛି ଏବଂ ଏକ ଡ୍ରୋନ୍ ପ୍ରତିରୋଧୀ ବ୍ୟବସ୍ଥା ସକ୍ରିୟ କରାଯାଇଛି। ୨୦,୦୦୦ ଯାନବାହାନ ରଖିବା ପାଇଁ ପନ୍ଦରଟି ପାର୍କିଂ ସ୍ଥାନ ନିରୂପଣ କରାଯାଇଛି। ଶୁକ୍ରବାର ପ୍ରସ୍ତୁତି ଚୂଡ଼ାନ୍ତ ହୋଇଥିଲା ଏବଂ ଏକ ମକ୍ ଡ୍ରିଲ୍ ମଧ୍ୟ କରାଯାଇଥିଲା। ପ୍ରଧାନମନ୍ତ୍ରୀ ସକାଳ ପ୍ରାୟ ୧୧:୩୦ ସମୟରେ ଗୌତମ ବୁଦ୍ଧ ନଗରର ଜେୱାର ବିମାନବନ୍ଦରରେ ପହଞ୍ଚିବେ।
ଟର୍ମିନାଲ କୋଠା ଯାଞ୍ଚ କରିବା ପରେ, ସେ ମଧ୍ୟାହ୍ନ ୧୨ଟାରେ ପ୍ରଥମ ପର୍ଯ୍ୟାୟର ଆନୁଷ୍ଠାନିକ ଭାବରେ ଉଦଘାଟନ କରିବେ। ଉଦଘାଟନ ସମାରୋହ ପରେ, ସେ ଏକ ସାଧାରଣ ସମାବେଶକୁ ସମ୍ବୋଧିତ କରିବେ। ନୋଏଡା ଅନ୍ତର୍ଜାତୀୟ ବିମାନବନ୍ଦରକୁ ୧୧,୨୦୦ କୋଟି ନିବେଶ ସହିତ ସରକାରୀ-ଘରୋଇ ସହଭାଗୀତା ମଡେଲରେ ବିକଶିତ କରାଯାଇଛି। ଏହା ଭାରତର ସର୍ବବୃହତ ଗ୍ରୀନଫିଲ୍ଡ ବିମାନବନ୍ଦର ପ୍ରକଳ୍ପ ମଧ୍ୟରୁ ଗୋଟିଏ।
