ଏନଏଲସିଆଇଏଲ ତାଳବିରା ଓସିପି-ଦ୍ୱିତୀୟ ଓ ତୃତୀୟ ପ୍ରକଳ୍ପରେ ସ୍ୱଚ୍ଛ ଭାରତ କାର୍ଯ୍ୟକ୍ରମର ଶୁଭାରମ୍ଭ
ସମ୍ବଲପୁର(ନରେନ୍ଦ୍ର ସାହୁ)ଜାଗ୍ରତ ଭାରତ ନିୟୁଜ: ଚାଲୁଥିବା ସ୍ୱଚ୍ଛ ଭାରତ ମିଶନ ଅନ୍ତର୍ଗତ ସ୍ୱଚ୍ଛତା ପକ୍ଷୱାଡା-୨୦୨୬ ଅବସରରେ ଏନଏଲସି ଇଣ୍ଡିଆ ଲିମିଟେଡ୍ (ଏନଏଲସିଆଇଏଲ) ତାଳବିରା ଓସିପି-ଦ୍ୱିତୀୟ ଓ ତୃତୀୟ ପ୍ରକଳ୍ପର ସରଲାଖାନି ଠାରେ ବୁଧବାର ରୁ ସ୍ୱଚ୍ଛତା କାର୍ଯ୍ୟକଳାପର ଶୁଭାରମ୍ଭ କରାଯାଇଛି। ଏଥିରେ ପ୍ରକଳ୍ପର ସମସ୍ତ ବିଭାଗର ଅଧିକାରୀ ଓ କର୍ମଚାରୀମାନେ ଉତ୍ସାହର ସହ ଅଂଶଗ୍ରହଣ କରିଥିବାବେଳେ କାର୍ଯ୍ୟକ୍ରମର ଆରମ୍ଭରେ ସ୍ୱଚ୍ଛତା ଶପଥ ପାଠ କରାଯାଇଥିଲା। ଏହି ଅବସରରେ କର୍ମଚାରୀମାନେ ସ୍ୱଚ୍ଛତା, ସ୍ୱାସ୍ଥ୍ୟବିଧି ଏବଂ ସୁସ୍ଥ କାର୍ଯ୍ୟ ପରିବେଶ ରକ୍ଷା ପାଇଁ ନିଜମାନଙ୍କର ପ୍ରତିବଦ୍ଧତାକୁ ପୁନଃଦୃଢ଼ କରିଥିଲେ। ଶପଥ ଗ୍ରହଣ ପରେ ସେମାନେ ନିଜ ଡେସ୍କ, କାର୍ଯ୍ୟସ୍ଥଳ, କାର୍ଯ୍ୟାଳୟ ପରିସର ଏବଂ ଆଖପାଖ ଅଞ୍ଚଳକୁ ସଫା କରି ସୁଚ୍ଛ ଓ ପରିଚ୍ଛନ୍ନ ପରିବେଶ ଗଠନରେ ସକ୍ରିୟ ଭାବେ ଅଂଶ ନେଇଥିଲେ। କାର୍ଯ୍ୟାଳୟ ପରିସର ବାହାରେ ମଧ୍ୟ ଏହି ପଦକ୍ଷେପକୁ ବିସ୍ତାର କରିବା ପାଇଁ ପ୍ରକଳ୍ପ ମୁଖ୍ୟ କାର୍ଯ୍ୟାଳୟ ନିକଟସ୍ଥ ସର୍କାନୀ ଛକଠାରେ ଏକ ବ୍ୟାପକ ସ୍ୱଚ୍ଛତା ଅଭିଯାନ ଆୟୋଜନ କରାଯାଇଥିଲା। କର୍ମଚାରୀ ଓ ଅଧିକାରୀମାନେ ମିଳିତ ଭାବେ ସାର୍ବଜନୀନ ସ୍ଥାନଗୁଡ଼ିକୁ ସଫା କରିବା ସହିତ ସ୍ଥାନୀୟ ଲୋକଙ୍କ ମଧ୍ୟରେ ସ୍ୱଚ୍ଛତା, ପରିମଳ ବ୍ୟବସ୍ଥା ଏବଂ ପରିବେଶ ସୁରକ୍ଷା ସମ୍ପର୍କରେ ସଚେତନତା ସୃଷ୍ଟି କରିଥିଲେ।
ଏହି କାର୍ଯ୍ୟକ୍ରମ କୁ ଶ୍ରୀ ଜଗଦୀଶ ଚନ୍ଦ୍ର ମଜୁମଦାର, କାର୍ଯ୍ୟନିର୍ବାହୀ ନିର୍ଦ୍ଦେଶକ ଓ ପ୍ରକଳ୍ପ ମୁଖ୍ୟ, ତାଳବିରା ଓସିପି-ଦ୍ୱିତୀୟ ଓ ତୃତୀୟ ପ୍ରକଳ୍ପ ଏବଂ ଶ୍ରୀ ରଘୁନାଥ ବେହେରା, ସିଜିଏମ୍ (ଭୂମି)ଙ୍କ ନିର୍ଦ୍ଦେଶନାରେ ଅନୁଷ୍ଠିତ ହୋଇଥିଲା। ଏଥିରେ ଶ୍ରୀ ପି. ଥାମିଲ ସେଲଭମ, ଜିଏମ୍ (ଖଣି), ଶ୍ରୀ ରବିଶଙ୍କର ଭି., ଜିଏମ୍ (ଇ ଆଣ୍ଡ ଏମ୍), ଶ୍ରୀ ସୁବ୍ରତ କୁମାର ବିଶ୍ୱାଳ, ଉପ ମହାପ୍ରବନ୍ଧକ ଓ ମାନବ ସମ୍ପଦ ବିଭାଗ ମୁଖ୍ୟଙ୍କ ସହ ଅନ୍ୟାନ୍ୟ ବରିଷ୍ଠ ଅଧିକାରୀ, କାର୍ଯ୍ୟନିର୍ବାହୀ ଓ କର୍ମଚାରୀମାନେ ଯୋଗଦେଇଥିଲେ। ଏହି ଅବସରରେ ଶ୍ରୀ ଜଗଦୀଶ ଚନ୍ଦ୍ର ମଜୁମଦାର କହିଥିଲେ ଯେ, ସ୍ୱଚ୍ଛତା ରକ୍ଷା କେବଳ କିଛି ଲୋକଙ୍କ ଦାୟିତ୍ୱ ନୁହେଁ, ବରଂ ଏହା ପ୍ରତ୍ୟେକ ନାଗରିକଙ୍କର ସାମୂହିକ ଦାୟିତ୍ୱ ରହିଥିବା ସହ ସେ କହିଥିଲେ ଯେ, ନିଜର ବୃତ୍ତିଗତ କାର୍ଯ୍ୟ ସହ ସ୍ୱଚ୍ଛ ଭାରତ ପରି ଅଭିଯାନରେ ସକ୍ରିୟ ଭାଗୀଦାର ହେବା ସମାଜ, ପରିବେଶ ଓ ଆଗାମୀ ପିଢ଼ି ପ୍ରତି ଆମର ଦାୟିତ୍ୱବୋଧକୁ ପ୍ରତିଫଳିତ କରେ। ସେ ସମସ୍ତଙ୍କୁ ସ୍ୱଚ୍ଛତାକୁ ଜୀବନଶୈଳୀର ଅଂଶ କରିବା ଏବଂ ଏକ ସ୍ୱଚ୍ଛ, ସୁସ୍ଥ ଓ ସ୍ଥାୟୀ ଭାରତ ଗଠନରେ ଅବଦାନ ରଖିବାକୁ ଆହ୍ୱାନ କରିଥିଲେ। ସମସ୍ତ ଅଂଶଗ୍ରହଣକାରୀ ଏକ ସ୍ୱଚ୍ଛ ଓ ସୁସ୍ଥ ଭାରତ ଗଠନ ପ୍ରତି ନିଜମାନଙ୍କର ପ୍ରତିବଦ୍ଧତାକୁ ପୁନର୍ବ୍ୟକ୍ତ କରିଥିଲେ ଏବଂ ଆଗାମୀ ଦିନରେ ମଧ୍ୟ ସ୍ୱଚ୍ଛତା ଓ ପରିବେଶ ସଚେତନତା କାର୍ଯ୍ୟକ୍ରମରେ ସହଯୋଗ ଜାରି ରଖିବାକୁ ସଂକଳ୍ପ ନେଇଥିଲେ।
ସ୍ୱଚ୍ଛ ଭାରତ କାର୍ଯ୍ୟକ୍ରମ ଅନ୍ତର୍ଗତ ଆଗାମୀ ଦିନଗୁଡ଼ିକରେ ପ୍ରକଳ୍ପ ଅଞ୍ଚଳରେ ବିଭିନ୍ନ ସଚେତନତା କାର୍ଯ୍ୟକ୍ରମ, ସ୍ୱଚ୍ଛତା ଅଭିଯାନ ଏବଂ ସମୁଦାୟ ଭିତ୍ତିକ କାର୍ଯ୍ୟକଳାପ ଆୟୋଜନ କରାଯିବ, ଯାହା ଏନଏଲସିଆଇଏଲର ସାମାଜିକ ଦାୟିତ୍ୱ, ପରିବେଶ ସୁରକ୍ଷା ଏବଂ ସ୍ଥାୟୀ ବିକାଶ ପ୍ରତି ଅଙ୍ଗୀକାରକୁ ଆହୁରି ସୁଦୃଢ଼ କରିବ ବୋଲି ନିଷ୍ପତି ନିଆଯାଇଥିଲା l ସ୍ୱଚ୍ଛତା ଅଭିଯାନରେ ଶ୍ରୀ ଜଗଦୀଶ ଚନ୍ଦ୍ର ମଜୁମଦାର, କାର୍ଯ୍ୟନିର୍ବାହୀ ନିର୍ଦ୍ଦେଶକ ଓ ପ୍ରକଳ୍ପ ମୁଖ୍ୟ ଏବଂ ଶ୍ରୀ ରଘୁନାଥ ବେହେରା, ସିଜିଏମ୍ (ଭୂମି)ଙ୍କ ସହ ଏନଏଲସିଆଇଏଲ ତାଳବିରା ଓସିପି- ଦ୍ୱିତୀୟ ଓ ତୃତୀୟ ପ୍ରକଳ୍ପର କର୍ମଚାରୀମାନେ ଅଂଶଗ୍ରହଣ କରି ସ୍ୱଚ୍ଛ, ସୁନ୍ଦର ଓ ସୁସ୍ଥ ପରିବେଶ ଗଠନ ପ୍ରତି ନିଜମାନଙ୍କର ଦୃଢ଼ ପ୍ରତିବଦ୍ଧତା ପ୍ରଦର୍ଶନ କରୁଥିବା ସହ ଆଗାମୀ ଦିନରେ ମଧ୍ୟ୍ ଏହି ସ୍ୱଚ୍ଛତା ପ୍ରତି ସଜାଗ ରହି ଅନ୍ୟ ଲୋକଙ୍କୁ ମଧ୍ୟ୍ ସଜାଗ କରିବା ପାଇଁ ଶପଥ ନେଇଥିଲେ l
