ନିଯୁକ୍ତି ମେଳା-୨୦୨୬: ୧୩୨୬ ଯୁବକ-ଯୁବତୀଙ୍କୁ ସରକାରୀ ଚାକିରି, ନିଯୁକ୍ତି ସଂଖ୍ୟା ୪୫,୪୦୮
ଭୁବନେଶ୍ୱର: ଯୁବଶକ୍ତିକୁ ସରକାରୀ ସେବା ସହ ଯୋଡ଼ିବା ଦିଗରେ ଓଡ଼ିଶା ସରକାରଙ୍କ ନିଯୁକ୍ତି ଅଭିଯାନ ଆଉ ଏକ ପାଦ ଆଗକୁ ବଢ଼ିଛି। ଭୁବନେଶ୍ୱର ରେଳ ଅଡିଟୋରିଅମ୍ରେ ଆୟୋଜିତ ୧୬ତମ ନିଯୁକ୍ତି ମେଳା-୨୦୨୬ରେ ୯ଟି ବିଭାଗର ୧୩୨୬ ଜଣ ନବନିଯୁକ୍ତଙ୍କୁ ନିଯୁକ୍ତିପତ୍ର ପ୍ରଦାନ କରାଯାଇଛି।
କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ନବନିଯୁକ୍ତଙ୍କୁ ଅଭିନନ୍ଦନ ଜଣାଇ କହିଥିଲେ, “ସରକାରୀ ସେବାର ସଫଳତା ପଦବୀ ଦ୍ୱାରା ନୁହେଁ, ନାଗରିକଙ୍କ ଜୀବନରେ ଆଣିପାରୁଥିବା ପରିବର୍ତ୍ତନ ଦ୍ୱାରା ମପାଯାଏ।”
୯ଟି ବିଭାଗରେ ନିଯୁକ୍ତି
ନୂଆ ନିଯୁକ୍ତିରେ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗରେ ୩୬୪ ଜଣ କନିଷ୍ଠ ଯନ୍ତ୍ରୀ, ପଞ୍ଚାୟତିରାଜ ଓ ପାନୀୟ ଜଳ ବିଭାଗରେ ୩୬୧ ଜଣ କନିଷ୍ଠ ଯନ୍ତ୍ରୀ ନିଯୁକ୍ତି ପାଇଛନ୍ତି।
ସେହିପରି ଶକ୍ତି ବିଭାଗ ଓ OHPCରେ ୧୨ ଜଣ କନିଷ୍ଠ ଯନ୍ତ୍ରୀ ଓ ୨୨୮ ଜଣ ଟ୍ରେନି, କୃଷି ଓ କୃଷକ ସଶକ୍ତିକରଣ ବିଭାଗରେ ୧୧୮ ଜଣ ସହକାରୀ କୃଷି ଅଧିକାରୀ, ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗରେ ୧୧୧ ଜଣ ସହକାରୀ ପ୍ରାଧ୍ୟାପକ ନିଯୁକ୍ତ ହୋଇଛନ୍ତି।
ମତ୍ସ୍ୟ ଓ ପ୍ରାଣିସମ୍ପଦ ବିଭାଗରେ ୧୫ ଜଣ କନିଷ୍ଠ ଯନ୍ତ୍ରୀ ଓ ୭୧ ଜଣ ପ୍ରାଣିଧନ ନିରୀକ୍ଷକ, କ୍ରୀଡ଼ା ବିଭାଗରେ ୨୬ ଜଣ ଜୁନିଅର କୋଚ୍, ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗରେ ୧୦ ଜଣ ପ୍ରଶିକ୍ଷକ ଏବଂ ଅବକାରୀ ବିଭାଗରେ ୧୦ ଜଣ ଉପ-ନିରୀକ୍ଷକ ନିଯୁକ୍ତି ପାଇଛନ୍ତି।
୨୦୨୪ରୁ ଏଯାଏ ୪୫ ହଜାରରୁ ଅଧିକ ନିଯୁକ୍ତି
ମୁଖ୍ୟମନ୍ତ୍ରୀଙ୍କ କହିବା ଅନୁଯାୟୀ, ଜୁନ୍ ୨୦୨୪ରୁ ଏଯାଏ ଓଡ଼ିଶାରେ ୪୫,୪୦୮ ଜଣଙ୍କୁ ସରକାରୀ ନିଯୁକ୍ତି ଦିଆଯାଇଛି। ଏଥିସହିତ ଯୁବବର୍ଗଙ୍କ ପାଇଁ ବେସରକାରୀ କ୍ଷେତ୍ରରେ ମଧ୍ୟ ନୂଆ ନିଯୁକ୍ତି ସୁଯୋଗ ସୃଷ୍ଟି ଉପରେ ସରକାର ଗୁରୁତ୍ୱ ଦେଉଥିବା ସେ କହିଛନ୍ତି।
ଶିଳ୍ପାୟନ ମାଧ୍ୟମରେ ବଢ଼ିବ ନିଯୁକ୍ତି
ରାଜ୍ୟରେ ଶିଳ୍ପ ଅଭିବୃଦ୍ଧିକୁ ନେଇ ସରକାରଙ୍କ ପ୍ରୟାସ ସମ୍ପର୍କରେ ମୁଖ୍ୟମନ୍ତ୍ରୀ କହିଥିଲେ ଯେ, ଗତ ଦୁଇ ବର୍ଷରେ ପ୍ରାୟ ୨୧ ଲକ୍ଷ କୋଟି ଟଙ୍କାର ପୁଞ୍ଜିନିବେଶ ଆସିଛି। ଏହା ମାଧ୍ୟମରେ ପ୍ରାୟ ୨୦ ଲକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବାର ଆଶା ରହିଛି।
ନିକଟରେ ନୂଆଦିଲ୍ଲୀ ଓ ନୋଏଡାରେ ଅନୁଷ୍ଠିତ ଓଡ଼ିଶା ଫୁଡ୍ ପ୍ରୋସେସିଂ ରୋଡ୍ ଶୋ’ରେ ୪୬ଟି ବୈଠକରେ ୨୦୮ ଜଣ ନିବେଶକଙ୍କ ସହ ଆଲୋଚନା ହୋଇଥିବା ବେଳେ ୩୮ଟି MoU ସ୍ୱାକ୍ଷରିତ ହୋଇଛି। ଏହି MoU ମାଧ୍ୟମରେ ୬୬,୩୯୨ କୋଟି ଟଙ୍କାର ନିବେଶ ଓ ୫୪,୧୩୫ ନୂଆ ନିଯୁକ୍ତି ସୁଯୋଗ ସୃଷ୍ଟି ହେବ ବୋଲି କୁହାଯାଇଛି।
ନବନିଯୁକ୍ତଙ୍କୁ ଜନସେବାର ମନ୍ତ୍ର
ନବନିଯୁକ୍ତ କର୍ମଚାରୀମାନେ ଲୋକଙ୍କ ସମସ୍ୟା ଓ ଅଭିଯୋଗକୁ ସମୟବଦ୍ଧ ଭାବେ ସମାଧାନ କରିବା ସହିତ ପ୍ରଶାସନରେ ସ୍ୱଚ୍ଛତା ଓ ସେବା ମନୋଭାବ ବଜାୟ ରଖିବାକୁ ମୁଖ୍ୟମନ୍ତ୍ରୀ ପରାମର୍ଶ ଦେଇଥିଲେ। ଦୁର୍ନୀତିଠାରୁ ଦୂରେ ରହି ସଚ୍ଚୋଟତା ଓ ନିଷ୍ଠାର ସହ କାର୍ଯ୍ୟ କରିବାକୁ ମଧ୍ୟ ସେ ଆହ୍ୱାନ ଦେଇଥିଲେ।
କାର୍ଯ୍ୟକ୍ରମରେ ଉପମୁଖ୍ୟମନ୍ତ୍ରୀ ଶ୍ରୀ କନକ ବର୍ଦ୍ଧନ ସିଂ ଦେଓ, ମନ୍ତ୍ରୀ ଶ୍ରୀ ରବି ନାରାୟଣ ନାୟକ, ଡ. ମୁକେଶ ମହାଲିଙ୍ଗ, ଶ୍ରୀ ଗୋକୁଳାନନ୍ଦ ମଲ୍ଲିକଙ୍କ ସମେତ ବହୁ ବରିଷ୍ଠ ଅଧିକାରୀ ଓ ନବନିଯୁକ୍ତମାନେ ଉପସ୍ଥିତ ଥିଲେ।
୨୦୩୬ରେ ସମୃଦ୍ଧ ଓଡ଼ିଶା ଏବଂ ୨୦୪୭ ସୁଦ୍ଧା ବିକଶିତ ଭାରତର ଗ୍ରୋଥ୍ ଇଞ୍ଜିନ୍ ଭାବେ ଓଡ଼ିଶାକୁ ଗଢ଼ିବା ଲକ୍ଷ୍ୟରେ ଯୁବଶକ୍ତିର ଭୂମିକା ଗୁରୁତ୍ୱପୂର୍ଣ୍ଣ, ବୋଲି ମୁଖ୍ୟମନ୍ତ୍ରୀ ଉଲ୍ଲେଖ କରିଥିଲେ।
