ଜିଲ୍ଲା ପରିଷଦର ୫୧ତମ ସାଧାରଣ ବୈଠକ ।
(ଜେ ବି ଏନ /ସୁଶିଲ କୁମାର) ୨୩/୧୨/୨୦୨୦ ଅନୁଗୋଳ : ଅନୁଗୋଳ ଜିଲ୍ଲା ଶିକ୍ଷା , ସ୍ବାସ୍ଥ୍ୟ ସେବା , ପାନୀୟ ଜଳ ଯୋଗାଣ ଓ କୃଷିଭିତ୍ତକ ଯୋଜନାର କାର୍ଯ୍ୟକାରିତା ଉପରେ ଗୁରୁତ୍ୱ । ଅନୁଗୋଳ ଜିଲ୍ଲା ପରିଷଦର ୫୧ତମ ସାଧାରଣ ବୈଠକ ଆଜି ପୂର୍ବାହ୍ନରେ ଜିଲ୍ଲା ପରିଷଦ ସମ୍ମିଳନୀ କକ୍ଷରେ ଜିଲ୍ଲା ପରିଷଦର ଅଧ୍ୟକ୍ଷା ଶ୍ରୀମତୀ ବାସନ୍ତୀ କିଷାନଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ବିଭିନ୍ନ ସରକାରୀ ଯୋଜନାକୁ ସଫଳତାର ସହିତ କାର୍ଯ୍ୟକାରୀ କରିବା ନିମନ୍ତେ ନିର୍ବାଚିତ ଲୋକ ପ୍ରତିନିଧି ମାନଙ୍କ ସହିତ ଉତ୍ତମ ସମନ୍ବୟ ରଖି କାର୍ଯ୍ୟ କରିବାକୁ ଅଧ୍ୟକ୍ଷା ବିଭାଗୀୟ ଅଧିକାରୀମାନଙ୍କୁ ପରାମର୍ଶ ଦେଇଥିଲେ । ଏହି ବୈଠକରେ ଢେଙ୍କାନାଳ ସାଂସଦ ଶ୍ରୀ ମହେଶ ସାହୁ , ତାଳଚେର ବିଧାୟକ ଶ୍ରୀ ବ୍ରଜ କିଶୋର ପ୍ରଧାନ , ଛେଣ୍ଡିପଦା ବିଧାୟକ ଶ୍ରୀ ସୁଶାନ୍ତ କୁମାର ବେହେରା , ଆଠମଲ୍ଲିକ ବିଧାୟକ ଶ୍ରୀ ରମେଶ ଚନ୍ଦ୍ର ସାଏ , ପାଲହଡା ବିଧାୟକ ଶ୍ରୀ ମୁକେଶ କୁମାର ପାଲ , ଅନୁଗୋଳ ବିଧାୟକ ତଥା ବିଧାନସଭାର ଉପ ବାଚସ୍ପତିଙ୍କ ପ୍ରତିନିଧି ଶ୍ରୀ ବାଉରୀବନ୍ଧୁ ସାହୁ ଓ ଜିଲ୍ଲା ପରିଷଦ ଉପାଧକ୍ଷ୍ୟ ଶ୍ରୀ ଇନ୍ଦ୍ରମଣୀ ଗଡନାୟକ ପ୍ରମୁଖ ଯୋଗ ଦେଇଥିଲେ । କରୋନା ମହାମାରୀ ଯୋଗୁଁ ନିର୍ବାଚିତ ପ୍ରତିନିଧି ଏବଂ ସରକାରୀ ଅଧିକାରୀଙ୍କ ମଧ୍ୟରେ ସଠିକ୍ ଭାବରେ ସମନ୍ଵୟ ହୋଇପାରିନାହିଁ । ଏଣୁ ଆଗାମୀ ଜାନୁୟାରୀ ମାସ ଶେଷ ସୁଦ୍ଧା ଜିଲ୍ଲା ପରିଷଦର ସମସ୍ତ ଷ୍ଟାଣ୍ଡି କମିଟିର ବୈଠକ ଶେଷ କରିବାକୁ ବୈଠକରେ ନିଷ୍ପତ୍ତି ନିଆଯାଇଥିଲା । ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ଶ୍ରୀ ଦିଲିପ କୁମାର ସାହୁ କାର୍ଯ୍ୟସୂଚୀ ଉପସ୍ଥାପନା କରିଥିଲେ । ପ୍ରାରମ୍ଭରେ ଜିଲ୍ଲାପାଳ ଶ୍ରୀ ସିଦ୍ଧାର୍ଥ ଶଙ୍କର ସ୍ବାଇଁ ସରକାରଙ୍କ ଦ୍ଵାରା କାର୍ଯ୍ୟକାରୀ ହେଉଥିବା ସମସ୍ତ ଉନ୍ନୟନ ମୂଳକ ଯୋଜନାକୁ ସାଧୁତା ଓ ସ୍ଵଚ୍ଛତାର ସହିତ କାର୍ଯ୍ୟକାରୀ କରିବାକୁ ପରାମର୍ଶ ଦେଇଥିଲେ । ଜିଲ୍ଲା ପରିଷଦର ସଦସ୍ୟମାନେ ଧାନ ସଂଗ୍ରହ , ଘରପୋଡି ଜିଲ୍ଲା ଯୋଜନା କମିଟି (ଡି ପି ସି) ନିର୍ବାଚନ , ଫିଜିବିଲିଟି ରିପୋର୍ଟ ବିଜୁ ପକ୍କାଘର ଯୋଜନାର ଅନିୟମିତତା , ଅଯୋଗ୍ୟ ହିତାଧିକାରୀ ସମ୍ପର୍କୀତ ସମସ୍ୟା ଉପରେ ଆଲୋକପାତ କରିଥିଲେ । ଚଳିତ ଆର୍ଥିକ ବର୍ଷରେ ମହାତ୍ମାଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନାରେ ୪୫ , ୫୯ , ୩୫୪ ଶ୍ରମ ଅଟକଳ ଲକ୍ଷ ଧାର୍ଯ୍ୟ ସରକାରଙ୍କ ଠାରୁ ମିଳିଅଛି । ୧୯ ଡିସେମ୍ବର ୨୦୨୦ ସୁଦ୍ଧା ରାଜ୍ୟ ଜର୍ମନିଯୁକ୍ତି ନିଶ୍ଚିତ ପାଣ୍ଡିରୁ ୩୦୧୪.୩୯ ଲକ୍ଷ ଟଙ୍କା ଖର୍ଚ୍ଚ କରାଯାଇ ୩୩୬୪୭୦୭ ଟି ଶ୍ରମ ଦିବସ ସୃଷ୍ଟି କରାଯାଇଛି । ଯାହା ଲକ୍ଷ୍ୟ ଧାର୍ଯ୍ୟ ଶ୍ରମ ଅଟକଳର ୭୩.୮୦ ପ୍ରତିଶତ ଅଟେ । ୨୦୧୯ – ୨୦ ଆର୍ଥିକ ବର୍ଷରେ କାମ ପାଇଁ ଆବେଦନ କରିଥିବା ସମସ୍ତ ୯୨ ହଜାର ୪୦୭ଟି ପରିବାରକୁ ଏହି ଯୋଜନାରେ କାମ ଯୋଗାଇ ଦିଆଯାଇ ତନ୍ମଧରୁ ୨୭୧୬ଟି ପରିବାରକୁ ୧୦୦ ଦିନର କାମ ଯୋଗାଇ ଦିଆଯାଇଛି । ପ୍ରଧାନମନ୍ତ୍ରୀ ଆବାସ ( ଗ୍ରାମୀଣ) ଯୋଜନାରେ ୨୦୧୬ – ୧୭ ରୁ ୨୦୧୯ – ୨୦ ର ଅସମ୍ପୂର୍ଣ୍ଣ ଗୃହ ସଂଖ୍ୟା ସ୍ଥିର ଏବଂ ୨୦୨୦ – ୨୧ ଆର୍ଥୀକ ବର୍ଷର ମୋଟ ୧୭ , ୪୦୯ ଟି ଗୃହନିର୍ମାଣ ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଛି । ତାହା ମଧ୍ୟରୁ ମୋଟ ୫୯୭୬ଟି ଗୃହର ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ କରାଯାଇଛି । ଏହା ଶତକଡା ୩୪.୩୩ ପ୍ରତିଶତ ଅଟେ । ପବିତ୍ର ବଡଦିନ ଅବସରରେ ରାଜ୍ୟ ସରକାରଙ୍କ ଠାରୁ ୧୪୬୪ଟି ଘରର ଗୃହ ପ୍ରବେଶ ନିମନ୍ତେ ଲକ୍ଷ୍ୟ ଧାର୍ଯ୍ୟ କରାଯାଇଛି । ବର୍ତ୍ତମାନ ରାଜ୍ୟ ସ୍ତରରେ ଅନୁଗୋଳ ଜିଲ୍ଲା ଚତୁର୍ଥ ସ୍ଥାନ ଅଧିକାର କରିଅଛି । ଚଳିତ ଆର୍ଥିକ ବର୍ଷରେ ଅନୁଗୋଳ ଜିଲ୍ଲାକୁ ୧୦ ହଜାର ୩୬୫ଟି ସ୍ବୟଂ ସହାୟକ ଗୋଷ୍ଠୀକୁ ବ୍ୟାଙ୍କ ସହିତ ସଂଯୋଗୀକରଣ କରାଯିବା ନିମନ୍ତେ ଲକ୍ଷ୍ୟ ପ୍ରାପ୍ତ ହୋଇଅଛି ଏବଂ ସେମାନଙ୍କୁ ୧୧୪୮୭.୯୭ ଲକ୍ଷ ଟଙ୍କା ଋଣ ଯୋଗାଇ ଦିଆଯିବ । ୫୮୬୬ଟି ସ୍ବୟଂ ସହାୟକ ଗୋଷ୍ଠୀକୁ ୯୮୧୭.୨୬ ଲକ୍ଷ ଟଙ୍କା ର ଋଣ ପ୍ରଦାନ କରାଯାଇଛି । ରାଜ୍ୟ ସରକାରଙ୍କ ଦ୍ଵାରା ୩୪୬୬ଜଣ ହିତାଧିକାରୀଙ୍କୁ ଦିଆଯାଉଥିବା କୋଭିଡ ସହାୟତା ରାଶି ଯୋଗାଇ ଦିଆଯିବା ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଅଛି । ସେଥିମଧ୍ୟରୁ ବର୍ତ୍ତମାନ ସୁଦ୍ଧା ୩୬୦୬ ଜଣ ହିତାଧିକାରୀଙ୍କୁ ୧୦.୬୬ କୋଟି ଟଙ୍କା ସହାୟତା ରାଶି ଯୋଗାଇ ଦିଆଯାଇଛି । ଏ କ୍ଷେତ୍ରରେ ରାଜ୍ୟରେ ଆମ ଜିଲ୍ଲା ୨ୟ ସ୍ଥାନ ରହିଛି । ଚଳିତ ବର୍ଷ ୫୯୫ ଜଣ ବିପିଏଲ (ବିପିଏଲ) ହିତାଧିକାରୀଙ୍କୁ ତାଲିମ ପ୍ରଦାନ ପାଇଁ ଲକ୍ଷ୍ୟ ଧାର୍ଯ୍ୟ ହୋଇଅଛି । ସେଥିମଧ୍ୟରୁ ୧୩୨ ଜଣକୁ ଇତି ମଧ୍ୟରେ ତାଲିମ ପ୍ରଦାନ କରାଯାଇଛି । ଜିଲ୍ଲାରେ ୧୭୦ ଗୋଟି ବିଦ୍ୟାଳୟ ମିଶ୍ରଣ ପାଇଁ ଅନୁମୋଦନ ହୋଇ ପ୍ରକ୍ରିୟା କାର୍ଯ୍ୟ ଚାଲୁରହିଛି । ମହାମାରୀ କରୋନାର ସଠିକ ମୁକାବିଲା ନିମନ୍ତେ ଜିଲ୍ଲାରେ ଚଳିତ ବର୍ଷ ମାର୍ଚ୍ଚ ୨୧ ତାରିଖ ଠାରୁ କୋଭିଡ ପରିକ୍ଷା ଚାଲୁ ରହିଛି । ଗତକାଲି ସୁଦ୍ଧା ୧ ଲକ୍ଷ ୫୪ ହଜାର ୪୭୫ ଜଣଙ୍କର ସ୍ବାବ ସଂଗ୍ରହ କରାଯାଇ ଆର ଟି ପି ସି ଆର ପରିକ୍ଷା କରାଯାଇଛି । ସେଥିରୁ ୧୧ ହଜାର ୮୭୭ ଜଣକୁ କୋଭିଡ ପଜିଟିଭ ଚିହ୍ନଟ କରାଯାଇଛି । ଜିଲ୍ଲାରେ ୩୭ ଜଣ କୋଭିଡରେ ମୃତ୍ୟୁବରଣ କରିଛନ୍ତି । ଏହି ବୈଠକରେ ଜିଲ୍ଲାରେ ଡାକ୍ତର ଅଭାବ ସମ୍ପର୍କରେ ଆଲୋଚନା ହୋଇଥିଲା । ଉପାନ୍ତ ଅଞ୍ଚଳରେ ଥିବା ଡାକ୍ତରଖାନା ଗୁଡିକରେ ଡାକ୍ତରମାନେ ନିୟମିତ ସ୍ଵାସ୍ଥ୍ୟ ସେବା ଯୋଗାଇ ଦେବା ଉପରେ ସଦସ୍ୟମାନେ ଗୁରୁତ୍ବାରୋପ କରିଥିଲେ । ଜିଲ୍ଲାରେ ୧୫୪ଟି ଡାକ୍ତର ପଦବୀ ମଧ୍ୟରୁ ୮୮ଟି ପଦବୀ ଖାଲିଅଛି ବୋଲି ଜିଲ୍ଲା ମୁଖ୍ୟ ଚିକିତ୍ସାଧିକାରୀ ସୂଚନା ପ୍ରଦାନ କରିଥିଲେ । ଏହାଛଡା ସ୍ବାସ୍ଥ୍ୟ ବିଭାଗରେ ଚୁକ୍ତିଭିତ୍ତିକ କାର୍ଯ୍ୟରତ କର୍ମଚାରୀମାନଙ୍କୁ ନିୟମିତ ଦରମା ପ୍ରଦାନ ଉପରେ ସଦସ୍ୟମାନେ ପ୍ରସ୍ତାବ ଦେଇଥିଲେ । ବୈଠକରେ ପାନୀୟ ଜଳ ଯୋଗାଣ ଉପରେ ଗୁରୁତ୍ବାରୋପ କରାଯାଇଥିଲା । ପ୍ରତି ଘରକୁ ପାନୀୟ ଜଳ ଯୋଗାଣ ସହ ପ୍ରତ୍ୟେକ ବିଦ୍ୟାଳୟରେ ୫ ଷ୍ଟାର ଶୌଚାଳୟ ନିର୍ମାଣ କରିବା ପାଇଁ ଯୋଜନା ପ୍ରସ୍ତୁତ ହୋଇଛି ବୋଲି ଜିଲ୍ଲାପାଳ ପ୍ରକାଶ କରିଥିଲେ । ବୈଠକରେ କୃଷି ଓ ଏହାର ଆନୁସଙ୍ଗିକ ବିଭାଗ ଦ୍ୱାରା ରିହାତି ଦରରେ ଯୋଗାଇ ଦିଆଯାଉଥିବା ବିଭିନ୍ନ କାର୍ଯ୍ୟକ୍ରମ ଓ ଉପକରଣ ସମ୍ପର୍କରେ ସଚେତନତା ସୃଷ୍ଟି ଉପରେ ଜିଲ୍ଲାପାଳ ଗୁରୁତ୍ବାରୋପ କରିଥିଲେ । ଚଳିତ ଆର୍ଥିକ ବର୍ଷ ପାଇଁ ୯୬ ହଜାର ୬୯୫ ହେକ୍ଟର ଜମିରେ ରବି ଫସଲ ଉତ୍ପାଦନର ଲକ୍ଷ୍ୟ ଧାର୍ଯ୍ୟ ହୋଇଥିବାବେଳେ ୭୧ହଜାର ୯୪୯ ହେକ୍ଟର ଜମିରେ ଏହି ଫସଲ ହୋଇଅଛି । ଜିଲ୍ଲାରେ ୮ଟି ଫସଲ ଯଥା ଧାନ , ମୁଗ , ବିରି , ଚିନାବାଦାମ , ବୁଟ , ସୋରିଷ , ସୂର୍ଯ୍ୟମୁଖୀ ଓ ଆଳୁ ଫସଲକୁ ପ୍ରଧାନମନ୍ତ୍ରୀ ବୀମା ଯୋଜନାରେ ଅନ୍ତର୍ଭୁକ୍ତ କରାଯାଇଛି ବୋଲି ଜିଲ୍ଲା ମୁଖ୍ୟ କୃଷି ଅଧିକାରୀ ସୂଚନା ପ୍ରଦାନ କରିଥିଲେ । ସେହିପରି ୨୦୨୦ ବର୍ଷ ପାଇଁ ୨ ଲକ୍ଷ ୧୦ ହଜାର ୭୫୬ ହେକ୍ଟର ଜମିରେ ଖରିଫ ଫସଲର ଲକ୍ଷ୍ୟ ଧାର୍ଯ୍ୟ ହୋଇଥିବା ବେଳେ ୨ ଲକ୍ଷ ୧୦ ହଜାର ୭୭୫ ଲକ୍ଷ୍ୟ ହାସଲ ହୋଇଛି । ୬୮ ହଜାର ୪୫୮ ହେକ୍ଟର ଜମିରେ ଜଳସେଚନ ଲକ୍ଷ୍ୟ ଧାର୍ଯ୍ୟ ହୋଇଥିବାବେଳେ ଏହି ଲକ୍ଷ୍ୟ ହାସଲ ହୋଇଅଛି । ସେହିପରି ୧୪ ହଜାର ୨୦୦ ମେଟ୍ରିକ୍ ଟନ୍ ସାର ଯୋଗାଇ ଦେବାର ଲକ୍ଷ୍ୟ ଥିବା ବେଳେ ୧୩ , ୯୨୩.୮୭ ମେଟ୍ରିକ୍ ଟନ ସାର ଯୋଗାଇ ଦିଆଯାଇଅଛି । ଏହି ବୈଠକରେ ଅନ୍ୟମାନଙ୍କ ମଧ୍ୟରେ ବିଭିନ୍ନ ସମିତିର ଅଧ୍ୟକ୍ଷ ଓ ଅଧ୍ୟକ୍ଷା , ଜିଲ୍ଲା ପରିଷଦର ସଦସ୍ୟ ଓ ସଦସ୍ୟା ତଥା ବିଭିନ୍ନ ବିଭାଗର ଜିଲ୍ଲା ସ୍ତରୀୟ ଅଧିକାରୀମାନେ ଉପସ୍ଥିତ ଥିଲେ ।
