ଗଣେଶ ବଜାରରେ ଭକ୍ତିମୟ ପରିବେଶ, ଧୁମଧାମରେ ଚାଲିଛି ଗଜାନନଙ୍କ ପୂଜା

🪔 ଗଣେଶ ବଜାରରେ ଭକ୍ତିମୟ ପରିବେଶ, ଧୁମଧାମରେ ଚାଲିଛି ଗଜାନନଙ୍କ ପୂଜା

ଅନୁଗୋଳ/ବଅଁରପାଳ: ଅଗ୍ରପୂଜ୍ୟ ପ୍ରଭୁ ଶ୍ରୀଗଣେଶଙ୍କ ଆରାଧନାରେ ଉତ୍ସବମୁଖର ହୋଇଉଠିଛି ବଅଁରପାଳର ଗଣେଶ ବଜାର। ପ୍ରତିବର୍ଷ ଭଳି ଚଳିତବର୍ଷ ମଧ୍ୟ ବଜାର କମିଟି ପକ୍ଷରୁ ଶ୍ରଦ୍ଧା ଓ ଭକ୍ତିର ସହ ଗଣେଶ ପୂଜା ଆୟୋଜନ କରାଯାଇଛି। ମଣ୍ଡପର ଆକର୍ଷଣୀୟ ସାଜସଜ୍ଜା ସାଙ୍ଗକୁ ରଙ୍ଗବେରଙ୍ଗ ଆଲୋକମାଳାରେ ସମଗ୍ର ବଜାର ଝଲସି ଉଠୁଛି।

ପୂଜା ଦିନ ପୂର୍ବାହ୍ନ ପ୍ରାୟ ୧୦ଟାରେ ବଜାର କମିଟିର କର୍ମକର୍ତ୍ତା ଓ ସଦସ୍ୟମାନେ ନିକଟସ୍ଥ ସାପ୍ତାହିକ ହାଟ ପୁଷ୍କରିଣୀରେ ପୂଜାପାଠ କରି କଳସରେ ପବିତ୍ର ଜଳ ସଂଗ୍ରହ କରିଥିଲେ। ପରେ ଶୋଭାଯାତ୍ରାରେ ମଣ୍ଡପକୁ ଆସି କଳସ ସ୍ଥାପନ କରାଯାଇଥିଲା।

ସ୍ଥାନୀୟ ଜଗନ୍ନାଥ ମନ୍ଦିରର ପୂଜକ ପଣ୍ଡିତ ଅଶୋକ ଦାସଙ୍କ ଦ୍ୱାରା ବୈଦିକ ରୀତିନୀତି ଅନୁଯାୟୀ ଗଜାନନଙ୍କ ପୂଜାର୍ଚ୍ଚନା ଓ ହୋମଯଜ୍ଞ ସମ୍ପନ୍ନ ହୋଇଥିଲା। ବଜାର କମିଟିର ସମସ୍ତ ସଦସ୍ୟ ପୂଜାରେ ସାମିଲ ହୋଇ ପ୍ରଭୁଙ୍କୁ ପୁଷ୍ପାଞ୍ଜଳି ଅର୍ପଣ କରିଥିଲେ। କମିଟି ସଭାପତି ସଞ୍ଜୟ କୁମାର ବିଶୋଇ କର୍ତ୍ତା ଭାବେ ପୂଜାକାର୍ଯ୍ୟ ସମ୍ପାଦନ କରିଥିଲେ।

ଗଣେଶ ବଜାରର ପୂଜାମଣ୍ଡପର ଭିତର ଓ ବାହାର ପାର୍ଶ୍ୱକୁ ସୁନ୍ଦର ଭାବେ ସଜାଯାଇଛି। ଏଥିସହ ବଜାର ମଧ୍ୟ ଦେଇ ଯାଇଥିବା ୫୫ ନମ୍ବର ଜାତୀୟ ରାଜପଥର ଉଭୟ ପାର୍ଶ୍ୱ ରଙ୍ଗୀନ ଆଲୋକମାଳାରେ ଆଲୋକିତ ହୋଇଛି। ବଅଁରପାଳର ୧୩ଟି ବଜାର ମଧ୍ୟରୁ କେବଳ ଗଣେଶ ବଜାରରେ ଗଣେଶ ପୂଜା ଆୟୋଜିତ ହେଉଥିବାରୁ ସନ୍ଧ୍ୟା ସମୟରେ ମଣ୍ଡପରେ ଭକ୍ତ ଓ ଦର୍ଶକଙ୍କ ଭିଡ଼ ବଢ଼ୁଛି।

ପୂଜା ଅବସରରେ ପ୍ରତିଦିନ ଭକ୍ତମାନଙ୍କ ପାଇଁ ଅନ୍ନପ୍ରସାଦର ବ୍ୟବସ୍ଥା ମଧ୍ୟ କରାଯାଇଛି। ପୂଜା ପରିଚାଳନାରେ କମିଟିର ଉପଦେଷ୍ଟା ଉପେନ୍ଦ୍ର ପ୍ରଧାନ, ସମ୍ପାଦକ ଟୁନା ବରାହ, କୋଷାଧ୍ୟକ୍ଷ ବିଜୟ ପ୍ରଧାନଙ୍କ ସମେତ ସରୋଜ ସାହୁ, ରୋହିତ ବାରିକ, ରାଜେଶ ପାଇକ, କୁଞ୍ଜବିହାରୀ ପ୍ରଧାନ, ଅଭୟ ବରାହ, କନ୍ଦର୍ପ ସାମଲ, ସୁବ୍ରତ ସାହୁ ଓ ବଜାରବାସୀ ସହଯୋଗ କରୁଛନ୍ତି।

ଆସନ୍ତା ଶୁକ୍ରବାର ଶ୍ରୀଗଣେଶଙ୍କ ବିସର୍ଜନ ଉତ୍ସବ ଅନୁଷ୍ଠିତ ହେବ।