ଭୁବନେଶ୍ବର – ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ଗତ ଦୁଇ ଦଶନ୍ଧି ମଧ୍ୟରେ ଓଡିଶା ସ୍ୱାସ୍ଥ୍ୟ କ୍ଷେତ୍ରରେ ଅଦ୍ଭୁତପୂର୍ବ ପରିବର୍ତ୍ତନ ଆଣିଛି। ୨୦୦୦ ମସିହାରେ ଓଡ଼ିଶା ସ୍ୱାସ୍ଥ୍ୟ କ୍ଷେତ୍ରରେ ପଛୁଆ ଓ ଅପହଞ୍ଚ ରହିଥିଲା। ରାଜ୍ୟରେ ସେ ସମୟରେ ଶିଶୁ ଓ ମାତୃ ମୁୃତ୍ୟୁହାର ସର୍ବାଧିକ ରହିଥିଲା। କିନ୍ତୁ ୨୦୦୫ ମସିହାରୁ ୨୦୨୦ ମଧ୍ୟରେ ଓଡ଼ିଶାରୁ ଶିଶୁ ମୃତ୍ୟୁ ହାର ଅନ୍ୟ ରାଜ୍ୟ ତୁଳନାରେ ସର୍ବାଧିକ ହ୍ରାସ ହୋଇଛି ।
ସେହିପରି ୫ମ ଜାତୀୟ ପରିବାର ସ୍ୱାସ୍ଥ୍ୟ ସର୍ବେକ୍ଷଣ ରିପୋର୍ଟ ଅନୁସାରେ ଦେଶରେ ସର୍ବକାଳୀନ ଟିକାଦାନ କାର୍ଯ୍ୟକ୍ରମ ୯୦.୫ ପ୍ରତିଶତ ଲକ୍ଷ୍ୟ ହାସଲ କରି ରାଜ୍ୟ ସର୍ବୋଚ୍ଚ ସ୍ଥାନରେ ରହିଛି । ସେହିଭଳି ମାଲେରିଆ ଓ ଯଷ୍ମା ନିକାରଣରେ ରାଜ୍ୟ ଯଥାକ୍ରମରେ ପ୍ରଥମ ଓ ୨ୟ ସ୍ଥାନରେ ରହିଛି । ୯୨.୨ ପ୍ରତିଶତ ଗର୍ଭବତୀ ଆନୁଷ୍ଠାନିକ ପ୍ରସବ ଡାକ୍ତରଖାନାରେ କରାଯାଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟ ବାସୀଙ୍କୁ ଉନ୍ନତ ସ୍ବାସ୍ଥ୍ୟ ସେବା ଯୋଗାଇ ଦେବା ପାଇଁ ପ୍ରତିଶ୍ରୁତିବଦ୍ଧ ରହିଛନ୍ତି। ଆଜି ଚଳିତ ବଜେଟରେ ସ୍ବାସ୍ଥ୍ୟ ବିଭାଗକୁ ହୋଇଥିବା ବ୍ୟୟବରାଦକୁ ନେଇ ସୂଚନା ଦେଇ ଏହା କହିଛନ୍ତି ସ୍ଵାସ୍ଥ୍ୟମନ୍ତ୍ରୀ ନିରଞ୍ଜନ ପୂଜାରୀ।
୨୦୨୩-୨୪ ବଜେଟରେ ସ୍ଵାସ୍ଥ୍ୟସେବା କ୍ଷେତ୍ରକୁ ୧୬ ହଜାର କୋଟି ଟଙ୍କା ବ୍ୟୟ ବରାଦ ହୋଇଛି। ଏହା ଗତ ବଜେଟ ତୁଳନାରେ ୨୭% ଅଧିକ ଏବଂ ୨୦୧୭-୧୮ ବଜେଟ ତୁଳନାରେ ପ୍ରାୟ ୩ ଗୁଣ। ରାଜ୍ୟର ସାମଗ୍ରିକ ବଜେଟର ଏହା ୭%। ଏଥି ସହିତ ଚଳିତ ବଜେଟରେ ରାଜ୍ୟ ସରକାର ‘ଆମ ହସ୍ପିଟାଲ’ ଯୋଜନା ଆରମ୍ଭ କରିଛନ୍ତି। ରାଜ୍ୟର ୧୪୭ ନିର୍ବାଚନ ମଣ୍ଡଳୀରେ ଖୋଲିବ ‘ଆମ ହସ୍ପିଟାଲ’ । ଆସନ୍ତା ୯ ମାସ ମଧ୍ୟରେ ଏହି ଯୋଜନା କାର୍ଯ୍ୟକାରୀ ହେବ । ଚଳିତ ଆର୍ଥିକ ବର୍ଷରେ ୫ ହଜାର ଏମ୍ବିବିଏସ୍ ଡାକ୍ତର ଓ ୯ ହଜାର ଷ୍ଟାଫ୍ ନର୍ସ ନିଯୁକ୍ତି ପାଇବେ । ଆସନ୍ତା ବର୍ଷ ଶେଷ ସୁଦ୍ଧା ସବୁ ପ୍ରାଥମିକ ଓ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଏମ୍ବିବିଏସ୍ ଡାକ୍ତର ନିଯୁକ୍ତ ହେବେ ।
ସେହିଭଳି ଆମ୍ବୁଲାନ୍ସଗୁଡ଼ିକ ଏଣିକି ୩୦ ମିନିଟ୍ ବଦଳରେ ୨୦ ମିନିଟ୍ ମଧ୍ୟରେ ରୋଗୀଙ୍କ ପାଖରେ ପହଞ୍ଚିବ । ପାଇଲଟ୍ ବ୍ୟବସ୍ଥା ଭାବେ ରାଜ୍ୟର ସମସ୍ତ ଚିକିତ୍ସାଳୟରେ ଡାକ୍ତର ଓ ସ୍ୱାସ୍ଥ୍ୟ ସହଯୋଗୀଙ୍କ ଉପସ୍ଥାନ ଯାଞ୍ଚ ପାଇଁ ଆଧାର ଏନେବୁଲ ବାୟୋମେଟ୍ରିକ୍ ବ୍ୟବସ୍ଥା ଲାଗୁ ହେବ । ଡାକ୍ତରଖାନାକୁ ଡାକ୍ତରମାନେ ସମୟରେ ଆସୁନଥିବା ଓ ଡ୍ୟୁଟି ସମୟରେ ଅନୁପସ୍ଥିତ ରହି ଠକୁଥିବାର ଅଭିଯୋଗ ରାଜ୍ୟର ବିଭିନ୍ନ ଅଞ୍ଚଳରୁ ଦେଖିବାକୁ ମିଳୁଥିଲା । ଏଣୁ ଏଭଳି ସମସ୍ୟାର ସମାଧାନ ପାଇଁ ବାୟୋମେଟ୍ରିକ୍ ବ୍ୟବସ୍ଥା ଲାଗୁ ହେବ । ଏହାସହ ୨୦୨୩-୨୪ ଆର୍ଥିକ ବର୍ଷରେ କଳାହାଣ୍ଡି ମେଡିକାଲ କଲେଜ କାର୍ଯ୍ୟକ୍ଷମ ହେବ । ପର୍ଯ୍ୟାୟକ୍ରମେ ତାଳଚେର, ଫୁଲବାଣୀ ଓ ଯାଜପୁର ମେଡିକାଲ କଲେଜକୁ କାର୍ଯ୍ୟକ୍ଷମ କରିବାକୁ ଲକ୍ଷ୍ୟ ରଖାଯାଇଛି ବୋଲି କହିଛନ୍ତି ସ୍ୱାସ୍ଥ୍ୟ ମନ୍ତ୍ରୀ ନିରଞ୍ଜନ ପୂଜାରୀ । ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଆଗତ ୨୦୨୩-୨୪ ବଜେଟ୍ର ମୁଖ୍ୟାଂଶ ସମ୍ପର୍କରେ ସୂଚନା ପ୍ରଦାନ ପାଇଁ ଆୟୋଜିତ ସାମ୍ବାଦିକ ସମ୍ମିଳନୀରେ ଏଭଳି ସୂଚନା ଦେଇଛନ୍ତି ମନ୍ତ୍ରୀ ଶ୍ରୀପୂଜାରୀ ।
ସେହିଭଳି ଡାକ୍ତର ସ୍ୱାସ୍ଥ୍ୟ ସହାୟକ କର୍ମଚାରୀ ନିଯୁକ୍ତ ଉପରେ ରାଜ୍ୟ ସରକାର ଧ୍ୟାନ କେନ୍ଦ୍ରୀଭୂତ କରୁଛନ୍ତି । ଗତ ୫ ବର୍ଷ ମଧ୍ୟରେ ୪ ହଜାର ଡାକ୍ତର ଓ ୩ ବର୍ଷ ମଧ୍ୟରେ ୯ ହଜାରରୁ ଅଧିକ ଷ୍ଟାଫ୍ ନର୍ସ ଓ ପାରାମେଡିକାଲ୍ କର୍ମଚାରୀଙ୍କୁ ନିଯୁକ୍ତି ଦେଇଛନ୍ତି । ଏଥିପାଇଁ ପ୍ରଶାସନିକ ବ୍ୟୟବରାଦ ବାବଦକୁ ୨୨୯ କୋଟି ଟଙ୍କାର ଅତିରିକ୍ତ ଅର୍ଥ ବ୍ୟବସ୍ଥା ହୋଇଛି । ଏହାସହ କେନ୍ଦ୍ରୀୟ ପ୍ରୟୋଜିତ ଯୋଜନାଗୁଡ଼ିକର କାର୍ଯ୍ୟନ୍ୱୟନ ବାବଦକୁ ୨ ହଜାର ୨ଶହ ୮୯ କୋଟି ଟଙ୍କା ଯୋଗାଇ ଦିଆଯାଇଛି ।
ଓଡ଼ିଶାରେ କାହିଁକି ଲାଗୁହେବନି ‘ଆୟୁଷ୍ମାନ୍ ଭାରତ’ : ସ୍ପଷ୍ଟୀକରଣ ଦେଲେ ସ୍ଵାସ୍ଥ୍ୟ ସଚିବ
ଆଗାମୀ ବର୍ଷରେ କେନ୍ଦ୍ର ସରକାରଙ୍କର ସ୍ୱାସ୍ଥ୍ୟ ବିମା ଯୋଜନା ‘ଆୟୁଷ୍ମାନ୍ ଭାରତ’ ଓଡ଼ିଶାରେ ଲାଗୁ ହେବ ନାହିଁ । କାହିଁକି ରାଜ୍ୟରେ ଲାଗୁ ହେବନି ଆୟୁଷ୍ମାନ ଭାରତ ସେନେଇ ସ୍ପଷ୍ଟୀକରଣ ଦେଇଛନ୍ତି ସ୍ଵାସ୍ଥ୍ୟ ସଚିବ। ସେ କହିଛନ୍ତି, କେନ୍ଦ୍ର ସରକାରଙ୍କ ଆୟୁଷ୍ମାନ ଭାରତ ଯୋଜନାରେ ରୋଗୀର ଚିକିତ୍ସା ବିଲ୍ ସରକାରୀ ହସ୍ପିଟାଲ ସ୍ତରରୁ ଆରମ୍ଭ କରିବାକୁ ନିର୍ଦ୍ଦେଶ ରହିଛି। କିନ୍ତୁ ରାଜ୍ୟ ସରକାର ସରକାରୀ ହସ୍ପିଟାଲରେ ରୋଗୀ ସେବା ସମ୍ପୂର୍ଣ୍ଣ ମାଗଣା କରିଛନ୍ତି। ତେଣୁ ଘରୋଇ ହସ୍ପିଟାଲ ବିଲରୁ ଆୟୁଷ୍ମାନ ଭାରତ ଯୋଜନା ବିଲ୍ ଆରମ୍ଭ କରିବାକୁ ଦାବି କରୁଛନ୍ତି। ଏହାଛଡ଼ା ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ମହିଳାଙ୍କ ଲାଗି ୧୦ ଲକ୍ଷ ଟଙ୍କାର ଚିକିତ୍ସା ଖର୍ଚ୍ଚ ଯୋଗାଇ ଦେଉଛନ୍ତି ରାଜ୍ୟ ସରକାର, ଯାହା ଆୟୁଷ୍ମାନ ଭାରତ ଯୋଜନାରେ ନାହିଁ। ଏସବୁ ପ୍ରସଙ୍ଗ ନେଇ କେନ୍ଦ୍ର – ରାଜ୍ୟ ମଧ୍ୟରେ ସହମତି ଆସିନଥିବାରୁ ରାଜ୍ୟ ଆୟୁଷ୍ମାନ ଭାରତରେ ସାମିଲ ହୋଇନି।
ସୋର୍ସ news
