ଜିଲ୍ଲା ବୁଦ୍ଧିଜୀବୀ ସଂଗଠନ ତରଫରୁ “ପରିବେଶ ପ୍ରଦୂଷଣ ଜନିତ ସ୍ୱାସ୍ଥ୍ୟ ସମସ୍ୟା” ଉପରେ ଆଲୋଚନା ।
ଢେଙ୍କାନାଳ,୨୯।୫ (ଜାଗ୍ରତ ଭାରତ):
ଜିଲ୍ଲା ବୁଦ୍ଧିଜୀବୀ ସଂଗଠନ ତରଫରୁ ପ୍ରତ୍ୟେକ ଶୁକ୍ରବାର ସ୍ଥାନୀୟ ଗାନ୍ଧୀ ପାର୍କରେ କରାଯାଉଥିଵା ସତ୍ୟାଗ୍ରହ ସଫେଇ କାର୍ଯ୍ୟକ୍ରମ ଅବସରରେ
ଜାତିର ଜନକ ମହାତ୍ମାଗାନ୍ଧୀ ଙ୍କ ପ୍ରତିମୂର୍ତ୍ତି ରେ ପୁଷ୍ପମାଲ୍ୟ ଅର୍ପଣ କରାଯାଇ ଶ୍ରଦ୍ଧାଞ୍ଜଳୀ ଜ୍ଞାପନ କରାଯାଇଥିଲା । ଵର୍ତ୍ତମାନ ରାଜ୍ୟ , ଦେଶ ଏବଂ ବିଶ୍ୱରେ ସାମାଜିକ, ରାଜନୈତିକ ପରିସ୍ଥିତି ଏବଂ ଅର୍ଥନୈତିକ ବୈଷମ୍ୟତା ଯୋଗୁଁ ସମାଜର ଅନେକ ବ୍ୟକ୍ତି ବିଶେଷ ଦାରିଦ୍ର୍ୟ ଅନାଟନ ଦେଇ ଗତି କରୁଥିଵା ନେଇ ସଦସ୍ୟଗଣ ଉଦବେଗ ପ୍ରକାଶ କରିଥିଲେ । ମାତ୍ରାଧିକ ପରିବେଶ ପ୍ରଦୂଷଣ ଜଳ , ବାୟୁ ଏବଂ ମୃତ୍ତିକା କୁ ଦିନକୁଦିନ ବିଷାକ୍ତ କରିବାରେ ଲାଗିଛି । ଢେଙ୍କାନାଳ ଜିଲ୍ଲାରେ କିଡନୀ ରୋଗ ଏବଂ କ୍ୟାନ୍ସର ଅହେତୁକ ଭାବରେ ବଢ଼ିଚାଲିଛି । ଏପଟେ ଅବିଭକ୍ତ ଢେଙ୍କାନାଳ ଜିଲ୍ଲାରେ ଶିଳ୍ପାୟନ ଏବଂ ଖଣି ଖନନ ବୃଦ୍ଧି ପାଇବା ଯୋଗୁଁ ନଦୀ ଜଳ , ଭୂତଳ ଜଳ ପ୍ରଦୁଷିତ ହୋଇ ପିଇବା ଉପଯୋଗୀ ହୋଇ ରହି ନାହିଁ । ବାୟୁ ପ୍ରଦୂଷଣ ଯୋଗୁଁ ଶ୍ୱାସ ରୋଗୀଙ୍କ ସଂଖ୍ୟା ବଢ଼ିବାରେ ଲାଗିଛି । ଏହା ବର୍ତ୍ତମାନ ଏବଂ ଭବିଷ୍ୟତ ପିଢି ପାଇଁ ଏକ ବଡ଼ ଚ୍ୟାଲେଞ୍ଜ ସୃଷ୍ଟି କରିଛି । ଶହ ଶହ କିଡନୀ ରୋଗୀ ମାନଙ୍କୁ ସପ୍ତାହରେ ୨ଥର ଡାଏଲିସିସ୍ ଦେବା ନିମନ୍ତେ ସରକାରୀ ସୁବିଧା ଉପଲବ୍ଧ ନାହିଁ । ଗରୀବ ରୋଗୀ ଚିକିତ୍ସା ଅଭାବରୁ ମୃତ୍ୟୁ ବରଣ କରୁଛନ୍ତି । ଏପରି ଭୟଙ୍କର ରୋଗର ପ୍ରତିଷେଧକ ବ୍ୟବସ୍ଥା ଅତ୍ୟନ୍ତ ଜରୁରୀ ବୋଲି ସଦସ୍ୟ ମାନେ ମତପ୍ରକାଶ କରିଛନ୍ତି । ବିଶୁଦ୍ଧ ପାନୀୟ ଜଳ କିପରି ଯୋଗାଇଦିଆଯିବ ସେ ବିଷୟରେ ପ୍ରଶାସନ ସୁଚିନ୍ତିତତ ଯୋଜନା ପ୍ରସ୍ତୁତ କରି ତୁରନ୍ତ କାର୍ଯ୍ୟକାରୀ କରିବାକୁ ନିକଟରେ ଦାବି କରାଯାଇଛି । ପରିବେଶ ପ୍ରଦୂଷଣ ସମ୍ପର୍କରେ ଆଲୋଚନା ସହିତ ଏହାର ନିରାକରଣ ନିମନ୍ତେ ଜନ ସାଧାରଣଙ୍କୁ ସଚେତନ କରାଇବା ନିମନ୍ତେ ସଂଗଠନ ତରଫରୁ ବିଶେଷ କାର୍ଯ୍ୟକ୍ରମ କରାଯିବା ନିଷ୍ପତ୍ତି ନିଆଯାଇଛି । ସାଧାରଣ ଲୋକ ସରକାରୀ କାର୍ଯ୍ୟାଳୟରେ କିପରି ନିର୍ଭୟରେ ନିଜର ସମସ୍ୟା ଉପସ୍ଥାପନ କରିପାରିଵେ ଏବଂ ସରକାରୀ ପଦାଧିକାରୀ କିପରି ସାଧାରଣ ଲୋକଙ୍କୁ ସମ୍ମାନର ସହିତ ସମସ୍ୟା ସମାଧାନରେ ସହାୟତା କରିଵେ ସେଥି ନିମନ୍ତେ ସଂଗଠନ ସରକାରଙ୍କ ନିକଟରେ ଦାବି କରିଛି । କାର୍ଯ୍ୟକ୍ରମରେ ଅନୁଷ୍ଠାନ ର ସଭାପତି ପ୍ରଫେସର ଡାକ୍ତର ତୁଷାର କାନ୍ତି ନାୟକ, ଉପସଭାପତି ରୁଦ୍ର ପ୍ରକାଶ ଶରଣ,ସରୋଜ କୁମାର ଶତପଥୀ, ସଦସ୍ୟ ଅଜେନ୍ଦ୍ର ସାମଲ , ସ୍ମୀତାରାଣୀ ସାମଲ,ବିନୟ କୁମାର ସାହୁ, ପ୍ରଶାନ୍ତ କୁମାର ତ୍ରିପାଠୀ ପ୍ରମୁଖ ଉପସ୍ଥିତ ଥିଲେ।
