ହ୍ୟୁଷ୍ଟନ୍ରେ IIT ଖଡ଼ଗପୁର ଆଉଟ୍ରିଚ୍ ନେଟୱର୍କର ‘ଟେକ୍ସାସ୍ AI ଲର୍ଣ୍ଣିଂ ସେଣ୍ଟର’ ଉଦ୍ଘାଟିତ
ହ୍ୟୁଷ୍ଟନ୍, ଅଗଷ୍ଟ ୨୩: କୃତ୍ରିମ ବୁଦ୍ଧିମତ୍ତା (AI) ଶିକ୍ଷା, ଦକ୍ଷତା ବିକାଶ ଏବଂ ଶିଳ୍ପ କ୍ଷେତ୍ର ପାଇଁ ନୂଆ ପ୍ରଯୁକ୍ତିଭିତ୍ତିକ ସମାଧାନକୁ ଆଗକୁ ବଢ଼ାଇବା ଲକ୍ଷ୍ୟରେ ଆମେରିକାର ହ୍ୟୁଷ୍ଟନ୍ରେ ‘ଟେକ୍ସାସ୍ AI ଲର୍ଣ୍ଣିଂ ସେଣ୍ଟର’ ଉଦ୍ଘାଟିତ ହୋଇଛି। IIT ଖଡ଼ଗପୁର ଆଉଟ୍ରିଚ୍ ନେଟୱର୍କ ସହଯୋଗରେ ଟାଗୋର ସେଣ୍ଟରରେ ଏହି କେନ୍ଦ୍ର ପ୍ରତିଷ୍ଠା କରାଯାଇଛି।
ଭାରତର ୮୦ତମ ସ୍ୱାଧୀନତା ଦିବସ ଏବଂ IIT ଖଡ଼ଗପୁରର ୭୫ତମ ପ୍ରତିଷ୍ଠା ବର୍ଷ ଅବସରରେ ଏହି କେନ୍ଦ୍ରର ଶୁଭାରମ୍ଭ କରାଯାଇଥିଲା। ହ୍ୟୁଷ୍ଟନ୍ସ୍ଥିତ ଭାରତୀୟ କନ୍ସୁଲ୍ ଜେନେରାଲ୍ ଡି.ସି. ମନୋଜନାଥ, ଟାଗୋର ସେଣ୍ଟର ଫାଉଣ୍ଡେସନ୍ର ସହ-ପ୍ରତିଷ୍ଠାତା ତଥା IIT ଖଡ଼ଗପୁର ଫାଉଣ୍ଡେସନ୍ର ସଭାପତି ଡ. ଅଶୋକ ଡେସାରକର ଏବଂ IIT ଖଡ଼ଗପୁରର ନିର୍ଦ୍ଦେଶକ ପ୍ରଫେସର ସୁମନ ଚକ୍ରବର୍ତ୍ତୀ ମିଳିତ ଭାବେ ଏହାର ଉଦ୍ଘାଟନ କରିଥିଲେ।
ଏହି ଅବସରରେ ଡି.ସି. ମନୋଜନାଥ ଭାରତ-ଆମେରିକା ମଧ୍ୟରେ ବଢ଼ୁଥିବା ପ୍ରଯୁକ୍ତି ସହଯୋଗ ଉପରେ ଗୁରୁତ୍ୱାରୋପ କରିଥିଲେ। AI କ୍ଷେତ୍ରରେ ଉଭୟ ଦେଶର ସହଯୋଗ ଶିକ୍ଷାନୁଷ୍ଠାନ, ଗବେଷଣା ଓ ଶିଳ୍ପ ମଧ୍ୟରେ ନୂଆ ସହଯୋଗର ସୁଯୋଗ ସୃଷ୍ଟି କରୁଥିବା ସେ କହିଥିଲେ।
ଏହି ପ୍ରକଳ୍ପ ପାଇଁ ଗତ ଏକ ବର୍ଷ ଧରି ଚାଲିଥିବା ପ୍ରସ୍ତୁତି ଓ ପ୍ରୟାସକୁ ସ୍ମରଣ କରି ସେ ଆଶା ପ୍ରକାଶ କରିଥିଲେ ଯେ, ଆଗାମୀ ଦିନରେ ଏହି କେନ୍ଦ୍ର ଆହୁରି ବିସ୍ତାରିତ ହୋଇ ଏକ ପୂର୍ଣ୍ଣାଙ୍ଗ ବିଦେଶୀ IIT ଆଉଟ୍ରିଚ୍ ସେଣ୍ଟର ଭାବେ ବିକଶିତ ହେବ।
ନୂଆ AI ଲର୍ଣ୍ଣିଂ ସେଣ୍ଟର ଭାରତ ଓ ଆମେରିକାର ଶିକ୍ଷା, ପ୍ରଯୁକ୍ତି ଏବଂ ଶିଳ୍ପ କ୍ଷେତ୍ର ମଧ୍ୟରେ ସହଯୋଗକୁ ଆହୁରି ମଜବୁତ କରିବାରେ ଏକ ଗୁରୁତ୍ୱପୂର୍ଣ୍ଣ ମଞ୍ଚ ଭାବେ କାର୍ଯ୍ୟ କରିବ ବୋଲି ଆଶା କରାଯାଉଛି।
