ଖିଣ୍ଡାରୁ ଉଦ୍ଧାର ହେଲା ୮ ଫୁଟିଆ ଅଜଗର, ପମ୍ପାସର ବନ୍ୟଜନ୍ତୁ ଅଞ୍ଚଳରେ ଛଡ଼ାଗଲା
ଅନୁଗୋଳ: ବନ୍ୟଜନ୍ତୁ ସୁରକ୍ଷା ଦିଗରେ ଅନୁଗୋଳ ବନଖଣ୍ଡର ଆଉ ଏକ ପ୍ରଶଂସନୀୟ ପଦକ୍ଷେପ। ବନ୍ତଳା ରେଞ୍ଜ୍ ଅଧୀନ ଖିଣ୍ଡା ସେକ୍ସନର ଖିଣ୍ଡା ଗ୍ରାମ ଅଞ୍ଚଳରୁ ଏକ ବିଶାଳ ଭାରତୀୟ ଅଜଗରକୁ ସୁରକ୍ଷିତ ଭାବେ ଉଦ୍ଧାର କରାଯାଇଛି।
ଖିଣ୍ଡା ଅଞ୍ଚଳରେ ଅଜଗରଟି ଥିବା ଖବର ପାଇ ବନ ବିଭାଗର ଟିମ୍ ତୁରନ୍ତ ପହଞ୍ଚି ଏହାକୁ ସାବଧାନତାର ସହ ଉଦ୍ଧାର କରିଥିଲେ। ଏହି ଉଦ୍ଧାର ଅଭିଯାନରେ ଫରେଷ୍ଟ ଗାର୍ଡ ଦେବୀ ପ୍ରସାଦ ମହାନ୍ତିଙ୍କ ସମେତ ଅଭିମନ୍ୟୁ ବେହେରା, ସୁଜିତ ରାଉତ, ଶୁଭ୍ରକାନ୍ତ ସାହୁ ଏବଂ ଗଜମିତ୍ର ଅମୂଲ୍ୟ ଦେହୁରୀ ସହଯୋଗ କରିଥିଲେ।
ଉଦ୍ଧାର ହୋଇଥିବା ଅଜଗରର ଓଜନ ପ୍ରାୟ ୧୩ରୁ ୧୪ କିଲୋଗ୍ରାମ ଥିବାବେଳେ ଏହାର ଲମ୍ବ ପ୍ରାୟ ୮ ଫୁଟ୍ ଏବଂ ଗିର୍ଥ ପ୍ରାୟ ୨୫ ସେଣ୍ଟିମିଟର ଥିଲା।
ଉଦ୍ଧାର ପରେ ଅଜଗରଟିକୁ ଖିଣ୍ଡା ସେକ୍ସନ ଅଧୀନ ପମ୍ପାସର ବନ୍ୟଜନ୍ତୁ ଅଞ୍ଚଳରେ ନିରାପଦ ଭାବେ ପୁନଃ ଅବମୁକ୍ତ କରାଯାଇଥିଲା। ଫଳରେ ଅଜଗରଟି ପୁଣି ନିଜ ପ୍ରାକୃତିକ ପରିବେଶକୁ ଫେରିଛି।
ବନ ବିଭାଗର ଏଭଳି ତ୍ୱରିତ ଉଦ୍ଧାର ଓ ପୁନଃ ଅବମୁକ୍ତି ପଦକ୍ଷେପ ବନ୍ୟଜନ୍ତୁ ସୁରକ୍ଷା ସହ ମଣିଷ ଓ ବନ୍ୟଜନ୍ତୁଙ୍କ ମଧ୍ୟରେ ସୁସ୍ଥ ସହାବସ୍ଥାନର ବାର୍ତ୍ତା ଦେଉଛି।
ଯତ୍ନରେ ଉଦ୍ଧାର, ଦାୟିତ୍ୱରେ ପୁନଃ ଅବମୁକ୍ତି—ବନ୍ୟଜନ୍ତୁ ସୁରକ୍ଷା ପାଇଁ ଏହି ପଦକ୍ଷେପ ନିଶ୍ଚିତ ଭାବେ ପ୍ରଶଂସନୀୟ।
