ଆଫଗାନିସ୍ତାନ ସିରିଜ୍ ପୂର୍ବରୁ ଟିମ୍ ଇଣ୍ଡିଆରେ ବଡ଼ ଫେରବଦଳ: ୮ ନୂଆ ମୁହଁ, ବୁମରାହଙ୍କ ସମେତ ବରିଷ୍ଠ ଖେଳାଳିଙ୍କ ପ୍ରତ୍ୟାବର୍ତ୍ତନ

byjagratbharat
-September 2, 2026

ଆଫଗାନିସ୍ତାନ ସିରିଜ୍ ପୂର୍ବରୁ ଟିମ୍ ଇଣ୍ଡିଆରେ ବଡ଼ ଫେରବଦଳ: ୮ ନୂଆ ମୁହଁ, ବୁମରାହଙ୍କ ସମେତ ବରିଷ୍ଠ ଖେଳାଳିଙ୍କ ପ୍ରତ୍ୟାବର୍ତ୍ତନ

ନୂଆଦିଲ୍ଲୀ: ଆଫଗାନିସ୍ତାନ ବିପକ୍ଷ ଆଗାମୀ ଟି-୨୦ ସିରିଜ୍ ପାଇଁ ଭାରତୀୟ ଦଳ ଘୋଷଣା କରିଛି ବିସିସିଆଇ। ୧୫ ଜଣିଆ ଦଳରେ ହୋଇଛି ବଡ଼ ପରିବର୍ତ୍ତନ। ଜିମ୍ବାୱେ ବିପକ୍ଷ ପୂର୍ବ ସିରିଜ୍ ତୁଳନାରେ ଏଥର ଦଳରେ ୮ ଜଣ ନୂଆ ଖେଳାଳିଙ୍କୁ ସାମିଲ କରାଯାଇଛି। ବିଶେଷକରି ଜସପ୍ରିତ ବୁମରାହଙ୍କ ପ୍ରତ୍ୟାବର୍ତ୍ତନ ଓ ସଞ୍ଜୁ ସାମସନଙ୍କ ଦଳରେ ସ୍ଥାନ ନେଇ ଚର୍ଚ୍ଚା ଜୋର୍ ଧରିଛି।

ଆଫଗାନିସ୍ତାନ ସିରିଜ୍ ପାଇଁ ଘୋଷିତ ଦଳରେ ଜସପ୍ରିତ ବୁମରାହ, ହର୍ଷିତ ରାଣା, ୱାଶିଂଟନ ସୁନ୍ଦର, ସଞ୍ଜୁ ସାମସନ, ନୀତିଶ କୁମାର ରେଡ୍ଡୀ, ଅକ୍ସର ପଟେଲ, ବରୁଣ ଚକ୍ରବର୍ତ୍ତୀ ଓ ଅର୍ଶଦୀପ ସିଂହ ଫେରିଛନ୍ତି। ଅନ୍ୟପଟେ ଜିମ୍ବାୱେ ଗସ୍ତରେ ସୁଯୋଗ ପାଇଥିବା ପ୍ରିନ୍ସ ଯାଦବ, ଯଶ ଠାକୁର, ମୟଙ୍କ ଯାଦବ, ଅଶୋକ ଶର୍ମା, ପ୍ରଭସିମରନ ସିଂହ, ହର୍ଷ ଦୁବେ ଓ ସୂର୍ଯ୍ୟାଂଶ ଶେଡଗେଙ୍କୁ ଏଥର ଦଳରୁ ବାଦ୍ ଦିଆଯାଇଛି।

ବୈଭବଙ୍କ ଉପରେ ନଜର

ଦଳର ସବୁଠାରୁ ଚର୍ଚ୍ଚିତ ନାମ ମଧ୍ୟରୁ ଜଣେ ହେଉଛନ୍ତି ଯୁବ ବ୍ୟାଟର ବୈଭବ ସୂର୍ଯ୍ୟବଂଶୀ। ଦୁଲୀପ ଟ୍ରଫି ସେମିଫାଇନାଲରେ ଦମଦାର ପ୍ରଦର୍ଶନ ପରେ ସେ ଦଳରେ ନିଜ ସ୍ଥାନ ବଜାୟ ରଖିଛନ୍ତି। ଅଭିଷେକ ଶର୍ମାଙ୍କ ସହ ବୈଭବ ଓପନିଂ କଲେ ଟିମ୍ ଇଣ୍ଡିଆର ଟପ୍ ଅର୍ଡର କିପରି ଗଠନ ହେବ, ତାହା ନେଇ ଉତ୍ସୁକତା ବଢ଼ିଛି।

ଏଭଳି ସ୍ଥିତିରେ ସଞ୍ଜୁ ସାମସନଙ୍କୁ ପ୍ଲେଇଂ ଏକାଦଶରେ ସୁଯୋଗ ମିଳିବ କି ନାହିଁ, ତାହା ମଧ୍ୟ ଚୟନକର୍ତ୍ତାଙ୍କ ପାଇଁ ଏକ ବଡ଼ ପ୍ରଶ୍ନ ହୋଇପାରେ। ଦଳରେ ଇଶାନ କିଶନ ମଧ୍ୟ ୱିକେଟକିପର ଭାବେ ରହିଛନ୍ତି।

ବୁମରାହଙ୍କ ପ୍ରତ୍ୟାବର୍ତ୍ତନ

ଦୀର୍ଘ ବିରତି ପରେ ଜସପ୍ରିତ ବୁମରାହ ଟି-୨୦ ଫର୍ମାଟକୁ ଫେରିବାକୁ ଯାଉଛନ୍ତି। ତାଙ୍କ ସହ ୱାଶିଂଟନ ସୁନ୍ଦର, ହର୍ଷିତ ରାଣା ଓ ନୀତିଶ କୁମାର ରେଡ୍ଡୀଙ୍କୁ ମଧ୍ୟ ଦଳରେ ସ୍ଥାନ ମିଳିଛି। ଏମାନଙ୍କ ମଧ୍ୟରୁ କିଛି ଖେଳାଳି ଫିଟନେସ୍ ପରୀକ୍ଷା ପରେ ହିଁ ମ୍ୟାଚ୍ ଖେଳିବାର ସୁଯୋଗ ପାଇବେ।

ଆଫଗାନିସ୍ତାନ ବିପକ୍ଷରେ ଭାରତୀୟ ଦଳ

ଶ୍ରେୟସ ଆୟର (ଅଧିନାୟକ), ଅଭିଷେକ ଶର୍ମା, ବୈଭବ ସୂର୍ଯ୍ୟବଂଶୀ, ସଞ୍ଜୁ ସାମସନ (ୱିକେଟକିପର), ଇଶାନ କିଶନ (ୱିକେଟକିପର), ତିଲକ ବର୍ମା, ଶିବମ ଦୁବେ, ନୀତିଶ କୁମାର ରେଡ୍ଡୀ, ଅକ୍ସର ପଟେଲ, ୱାଶିଂଟନ ସୁନ୍ଦର, ବରୁଣ ଚକ୍ରବର୍ତ୍ତୀ, ରବି ବିଷ୍ଣୋଇ, ଜସପ୍ରିତ ବୁମରାହ, ଅର୍ଶଦୀପ ସିଂହ ଓ ହର୍ଷିତ ରାଣା।