ରାଷ୍ଟ୍ରପତି ଭବନରେ ଗଞ୍ଜାମର ଲୋକକଳାର ଝଲକ: ୯୦ରୁ ଊର୍ଦ୍ଧ୍ୱ କଳାକାରଙ୍କ ସହ ରାଷ୍ଟ୍ରପତିଙ୍କ ଭାବ ବିନିମୟ
ତପ୍ତପାଣିର ଲୋକନୃତ୍ୟରେ ମୁଗ୍ଧ ହୋଇଥିଲେ ରାଷ୍ଟ୍ରପତି; କଳାକାରଙ୍କୁ ଦେଲେ ପରମ୍ପରା ସୁରକ୍ଷାର ବାର୍ତ୍ତା
ବ୍ରହ୍ମପୁର: ଗଞ୍ଜାମର ମାଟିରୁ ରାଜଧାନୀ ଦିଲ୍ଲୀର ରାଷ୍ଟ୍ରପତି ଭବନ ପର୍ଯ୍ୟନ୍ତ ପହଞ୍ଚିଲା ଓଡ଼ିଶାର ସମୃଦ୍ଧ ଲୋକକଳା ଓ ଆଦିବାସୀ ସଂସ୍କୃତିର ଝଲକ। ରାଷ୍ଟ୍ରପତି ଶ୍ରୀମତୀ ଦ୍ରୌପଦୀ ମୁର୍ମୁଙ୍କ ବିଶେଷ ଆମନ୍ତ୍ରଣରେ ଗଞ୍ଜାମ ଜିଲ୍ଲାର ୫ଟି ପ୍ରମୁଖ ସାଂସ୍କୃତିକ ଦଳର ୯୦ରୁ ଊର୍ଦ୍ଧ୍ୱ ଲୋକକଳାକାର ନୂଆଦିଲ୍ଲୀ ଗସ୍ତ କରି ରାଷ୍ଟ୍ରପତି ଭବନ ପରିଦର୍ଶନ କରିଛନ୍ତି।
ନିକଟରେ ଗଞ୍ଜାମ ଗସ୍ତ ସମୟରେ ତପ୍ତପାଣିଠାରେ ଆଦିବାସୀ ଓ ଲୋକନୃତ୍ୟର ମନୋମୁଗ୍ଧକର ପ୍ରଦର୍ଶନ ଦେଖି ରାଷ୍ଟ୍ରପତି ଶ୍ରୀମତୀ ମୁର୍ମୁ ବେଶ୍ ପ୍ରଭାବିତ ହୋଇଥିଲେ। କଳାକାରମାନଙ୍କ ପ୍ରଦର୍ଶନରେ ମୁଗ୍ଧ ହୋଇ ସେମାନଙ୍କୁ ରାଷ୍ଟ୍ରପତି ଭବନକୁ ଆମନ୍ତ୍ରଣ କରିଥିଲେ।
ଏହି ଆମନ୍ତ୍ରଣ ପରେ ଗଞ୍ଜାମର ୫ଟି ସାଂସ୍କୃତିକ ଦଳର ୯୦ରୁ ଅଧିକ କଳାକାର ଦିଲ୍ଲୀ ପହଞ୍ଚିଥିଲେ। ରାଷ୍ଟ୍ରପତି ଭବନରେ ମହାମହିମଙ୍କ ସହ ସେମାନଙ୍କର ଦୀର୍ଘ ସମୟ ଧରି ଭାବ ବିନିମୟ ହୋଇଥିଲା।
‘ପରମ୍ପରାକୁ ବଞ୍ଚାଇ ରଖନ୍ତୁ’—କଳାକାରଙ୍କୁ ରାଷ୍ଟ୍ରପତିଙ୍କ ଆହ୍ୱାନ
କଳାକାରମାନଙ୍କ ସହ ଆଲୋଚନା ସମୟରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ପୂର୍ବପୁରୁଷଙ୍କଠାରୁ ପ୍ରାପ୍ତ କଳା, ଲୋକପରମ୍ପରା ଓ ସାଂସ୍କୃତିକ ଐତିହ୍ୟକୁ ସଂରକ୍ଷଣ କରିବା ସହ ଏହାର ପ୍ରଚାର-ପ୍ରସାର ଉପରେ ଗୁରୁତ୍ୱ ଦେଇଥିଲେ।
ବିଶେଷକରି ଯୁବ କଳାକାରମାନେ ପାଠପଢ଼ା ସହ ନିଜ ନିଜ କଳାକ୍ଷେତ୍ରରେ ଦକ୍ଷତା ହାସଲ କରି ସ୍ୱାବଲମ୍ବୀ ହେବାକୁ ସେ ପରାମର୍ଶ ଦେଇଥିଲେ। ଗଞ୍ଜାମର ସୌରା ଜନଜାତିର ସମୃଦ୍ଧ ସାଂସ୍କୃତିକ ପରମ୍ପରା ଓ ଲୋକକଳାକୁ ମଧ୍ୟ ରାଷ୍ଟ୍ରପତି ପ୍ରଶଂସା କରିଥିଲେ।
କଳାକାରଙ୍କ ପାଇଁ ଅବିସ୍ମରଣୀୟ ଅନୁଭୂତି
ରାଷ୍ଟ୍ରପତି ଭବନ ପରିଦର୍ଶନ, ମହାମହିମ ରାଷ୍ଟ୍ରପତିଙ୍କ ସହ ଅଧଘଣ୍ଟାରୁ ଅଧିକ ସମୟ ଧରି ଆଲୋଚନା ଓ ଭାବ ବିନିମୟ କରିବାର ସୁଯୋଗ କଳାକାରମାନଙ୍କ ପାଇଁ ଏକ ଅବିସ୍ମରଣୀୟ ଅନୁଭୂତି ପାଲଟିଛି।
ଏହା ସହ ନୂଆଦିଲ୍ଲୀର ବିଭିନ୍ନ ଐତିହାସିକ ଓ ଦର୍ଶନୀୟ ସ୍ଥାନ ପରିଦର୍ଶନର ସୁଯୋଗ ମଧ୍ୟ କଳାକାରମାନେ ପାଇଥିଲେ। ଏଭଳି ଏକ ଐତିହାସିକ ଅନୁଭୂତିର ସୁଯୋଗ ଦେଇଥିବାରୁ କଳାକାରମାନେ ଗଞ୍ଜାମ ଜିଲ୍ଲା ପ୍ରଶାସନ ପ୍ରତି କୃତଜ୍ଞତା ଜଣାଇଛନ୍ତି।
ସୌର ପାରମ୍ପରିକ ସାଂସ୍କୃତିକ ନାଟ୍ୟ ସଂଘର ଶ୍ରୀ ଜଗନ୍ନାଥ ନାୟକ ଏହି ଅନୁଭୂତିକୁ ତାଙ୍କ ଜୀବନର ଏକ ସ୍ମରଣୀୟ ଅଧ୍ୟାୟ ବୋଲି ବର୍ଣ୍ଣନା କରିଛନ୍ତି।
ଏହି ପ୍ରତିନିଧି ଦଳ ସହ ଅତିରିକ୍ତ ଉପଜିଲ୍ଲାପାଳ, ଛତ୍ରପୁର ଶ୍ରୀ ପାର୍ଥ ସାରଥୀ ହାଁସଦା, ଜିଲ୍ଲା ସଂସ୍କୃତି ଅଧିକାରୀ ଶ୍ରୀମତୀ ଅଦିତି ଆଚାର୍ଯ୍ୟ, ଶ୍ରୀ ମନୋଜ କୁମାର ପ୍ରଧାନଙ୍କ ସମେତ ଜିଲ୍ଲା ପ୍ରଶାସନର ଅନ୍ୟାନ୍ୟ ଅଧିକାରୀ ମଧ୍ୟ ଦିଲ୍ଲୀ ଗସ୍ତ କରିଥିଲେ।
ଗଞ୍ଜାମର ଲୋକକଳାକୁ ରାଷ୍ଟ୍ରପତି ଭବନରେ ମିଳିଥିବା ଏହି ସମ୍ମାନ କେବଳ କଳାକାରଙ୍କ ପାଇଁ ନୁହେଁ, ବରଂ ଜିଲ୍ଲାର ସମୃଦ୍ଧ ଲୋକପରମ୍ପରା ପାଇଁ ମଧ୍ୟ ଏକ ଗୌରବର ବିଷୟ ପାଲଟିଛି।
