ପକ୍ଷୀଙ୍କ କଳରବରେ ମୁଖର ଭିତରକନିକା: ଆଜିଠୁ ଆରମ୍ଭ ୩ ଦିନିଆ ଦେଶୀୟ ପକ୍ଷୀ ଗଣନା
ମଠଆଡ଼ିଆ, ଦୁର୍ଗାପ୍ରସାଦ ଡିଆ ଓ ଲକ୍ଷ୍ମୀପ୍ରସାଦ ଡିଆରେ ଚାଲିବ ଗଣନା; ୪ଟି ଟିମ୍ ନିୟୋଜିତ
କେନ୍ଦ୍ରାପଡ଼ା: ଭିତରକନିକାର ସବୁଜ ପରିବେଶ ଏବେ ଦେଶୀୟ ପକ୍ଷୀଙ୍କ କଳରବରେ ମୁଖରିତ। ଏହି ପକ୍ଷୀମାନଙ୍କ ସଂଖ୍ୟା ଓ ପ୍ରଜାତି ସମ୍ପର୍କରେ ତଥ୍ୟ ସଂଗ୍ରହ ପାଇଁ ଆଜିଠାରୁ ଆରମ୍ଭ ହୋଇଛି ତିନିଦିନିଆ ଦେଶୀୟ ପକ୍ଷୀ ଗଣନା। ଭିତରକନିକାର ମଠଆଡ଼ିଆ, ଦୁର୍ଗାପ୍ରସାଦ ଡିଆ ଓ ଲକ୍ଷ୍ମୀପ୍ରସାଦ ଡିଆ ଅଞ୍ଚଳରେ ଏହି ଗଣନା ଅନୁଷ୍ଠିତ ହେବ।
ଗଣନା କାର୍ଯ୍ୟକୁ ସୁଚାରୁ ଭାବେ ସମ୍ପାଦନ ପାଇଁ ବନ ବିଭାଗ ପକ୍ଷରୁ ୪ଟି ଟିମ୍ ନିୟୋଜିତ ହୋଇଛି। ପ୍ରତ୍ୟେକ ଟିମ୍ରେ ୪ରୁ ୫ ଜଣ ବନ କର୍ମଚାରୀ ରହିଛନ୍ତି। ପକ୍ଷୀ ବିଶେଷଜ୍ଞଙ୍କ ନେତୃତ୍ୱରେ ଟିମ୍ଗୁଡ଼ିକ ନିର୍ଦ୍ଧାରିତ ଅଞ୍ଚଳରେ ପକ୍ଷୀଙ୍କ ଗତିବିଧି ଓ ସଂଖ୍ୟା ନିରୀକ୍ଷଣ କରିବେ। ଏନେଇ ଗତକାଲି ବନ କର୍ମଚାରୀମାନଙ୍କୁ ସ୍ୱତନ୍ତ୍ର ତାଲିମ ମଧ୍ୟ ପ୍ରଦାନ କରାଯାଇଥିଲା।
୧୦ ପ୍ରମୁଖ ପ୍ରଜାତି ଉପରେ ନଜର
ଏହି ଗଣନା ସମୟରେ ଭିତରକନିକାରେ ଦେଖାଯାଉଥିବା ବିଭିନ୍ନ ଦେଶୀୟ ପକ୍ଷୀଙ୍କ ଉପରେ ନଜର ରଖାଯିବ। ବିଶେଷ କରି ଗେଣ୍ଡାଳିଆ, ଅଞ୍ଜନା, ଖଇରା, ରାଣିବଗ, କପାରଖାଇ ସମେତ ପ୍ରାୟ ୧୦ ପ୍ରକାର ପ୍ରଜାତିର ପକ୍ଷୀଙ୍କ ଗଣନା କରାଯିବ।
ଗଣନାରୁ ପକ୍ଷୀଙ୍କ ସଂଖ୍ୟା, ପ୍ରଜାତି ଓ ସେମାନଙ୍କ ଆବାସ ସମ୍ପର୍କରେ ଗୁରୁତ୍ୱପୂର୍ଣ୍ଣ ତଥ୍ୟ ମିଳିବ। ଏହା ଭିତରକନିକାର ଜୈବବିବିଧତା ଓ ଦେଶୀୟ ପକ୍ଷୀଙ୍କ ସୁରକ୍ଷା ନେଇ ଆଗାମୀ ଦିନର ଯୋଜନା ପ୍ରସ୍ତୁତିରେ ସହାୟକ ହେବ।
ସକାଳ ୬ଟାରୁ ମଧ୍ୟାହ୍ନ ୧୨ଟା ଯାଏଁ ଗଣନା
ପକ୍ଷୀ ଗଣନା ପ୍ରତିଦିନ ସକାଳ ୬ଟାରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ଚାଲିବ। ପକ୍ଷୀମାନଙ୍କ ସକ୍ରିୟତା ଅଧିକ ଥିବା ସମୟକୁ ଦୃଷ୍ଟିରେ ରଖି ଏହି ସମୟରେ ଗଣନା କରାଯାଉଛି।
ଭିତରକନିକାର ମାଟି, ଜଳ ଓ ଜଙ୍ଗଲ ସହ ଏହି ଦେଶୀୟ ପକ୍ଷୀମାନଙ୍କ ନିବିଡ଼ ସମ୍ପର୍କ ରହିଛି। ତେଣୁ ପ୍ରତିବର୍ଷ ହେଉଥିବା ଏହି ପକ୍ଷୀ ଗଣନା କେବଳ ସଂଖ୍ୟା ଜାଣିବାର ଏକ ପ୍ରକ୍ରିୟା ନୁହେଁ, ବରଂ ଭିତରକନିକାର ପରିବେଶ ଓ ଜୈବବିବିଧତାର ସ୍ୱାସ୍ଥ୍ୟ ମାପିବାର ଏକ ଗୁରୁତ୍ୱପୂର୍ଣ୍ଣ ମାଧ୍ୟମ।
