ଅନୁଗୋଳ ବନଖଣ୍ଡରେ ସ୍ୱଚ୍ଛତା ଅଭିଯାନ: ଭଙ୍ଗା କାଚ ସଫେଇ ସହ ପଲିଥିନମୁକ୍ତ ଜଙ୍ଗଲ ପାଇଁ ପଦକ୍ଷେପ
ଅନୁଗୋଳ: ବନ୍ୟଜନ୍ତୁ ସୁରକ୍ଷା ସହ ପରିବେଶକୁ ସ୍ୱଚ୍ଛ ଓ ସୁରକ୍ଷିତ ରଖିବା ଲକ୍ଷ୍ୟରେ ଅନୁଗୋଳ ବନଖଣ୍ଡ ପକ୍ଷରୁ ଏକ ବ୍ୟାପକ ସ୍ୱଚ୍ଛତା ଓ ପରିବେଶ ସଚେତନତା ଅଭିଯାନ ଆୟୋଜିତ ହୋଇଛି। ବନଖଣ୍ଡ ଅଧୀନ ସମସ୍ତ ରେଞ୍ଜରେ କ୍ଷେତ୍ର କର୍ମଚାରୀଙ୍କ ସହ ସ୍ଥାନୀୟ ସମୁଦାୟର ସକ୍ରିୟ ସହଭାଗିତାରେ ଭଙ୍ଗା କାଚ ସଫେଇ କାର୍ଯ୍ୟକ୍ରମ ଓ ପଲିଥିନମୁକ୍ତ ଅଭିଯାନ କରାଯାଇଥିଲା।
ଅଭିଯାନ ସମୟରେ ଜଙ୍ଗଲ ଓ ଏହାର ଆଖପାଖ ଅଞ୍ଚଳରେ ପଡ଼ିଥିବା ଭଙ୍ଗା କାଚ, ପଲିଥିନ ଏବଂ ଅନ୍ୟାନ୍ୟ ବିପଜ୍ଜନକ ବର୍ଜ୍ୟବସ୍ତୁ ସଂଗ୍ରହ କରି ହଟାଯାଇଥିଲା। ଏଥିସହ ଜଙ୍ଗଲ ଅଞ୍ଚଳରେ ବର୍ଜ୍ୟବସ୍ତୁ ନ ଫିଙ୍ଗିବା ଏବଂ ପ୍ଲାଷ୍ଟିକ୍ ବ୍ୟବହାର କମାଇବା ନେଇ ଲୋକଙ୍କୁ ସଚେତନ କରାଯାଇଥିଲା।
ବନାଞ୍ଚଳରେ ପଡ଼ିଥିବା ଭଙ୍ଗା କାଚ ବନ୍ୟଜନ୍ତୁଙ୍କ ପାଇଁ ଆହତ ହେବାର ଆଶଙ୍କା ସୃଷ୍ଟି କରୁଥିବାବେଳେ ପଲିଥିନ ଓ ପ୍ଲାଷ୍ଟିକ୍ ପ୍ରାକୃତିକ ପରିବେଶ ଏବଂ ବନ୍ୟଜୀବଙ୍କ ପାଇଁ ଗୁରୁତର ବିପଦ ସୃଷ୍ଟି କରିଥାଏ। ତେଣୁ ଏପରି ବର୍ଜ୍ୟବସ୍ତୁ ହଟାଇବା ଦ୍ୱାରା ବନ୍ୟଜନ୍ତୁଙ୍କ ସୁରକ୍ଷା ସହ ପ୍ରାକୃତିକ ବାସସ୍ଥଳୀକୁ ମଧ୍ୟ ସୁରକ୍ଷିତ ରଖାଯାଇପାରିବ।
ବନ ସୁରକ୍ଷା କେବଳ ବନ ବିଭାଗର ଦାୟିତ୍ୱ ନୁହେଁ, ସ୍ଥାନୀୟ ସମୁଦାୟର ସହଭାଗିତା ମଧ୍ୟ ଏଥିରେ ଗୁରୁତ୍ୱପୂର୍ଣ୍ଣ। ଏହି ଅଭିଯାନ ମାଧ୍ୟମରେ ସ୍ୱଚ୍ଛତା, ଦାୟିତ୍ୱପୂର୍ଣ୍ଣ ବର୍ଜ୍ୟ ପରିଚାଳନା ଓ ପରିବେଶ ଅନୁକୂଳ ଜୀବନଶୈଳୀ ପ୍ରତି ଲୋକଙ୍କ ମଧ୍ୟରେ ସଚେତନତା ବୃଦ୍ଧି ପାଇବା ସହ ଜଙ୍ଗଲ ସୁରକ୍ଷାରେ ସାମୂହିକ ଭାଗିଦାରିକୁ ମଧ୍ୟ ପ୍ରୋତ୍ସାହନ ମିଳିଛି।
ସ୍ୱଚ୍ଛ ଜଙ୍ଗଲ, ସୁରକ୍ଷିତ ବନ୍ୟଜନ୍ତୁ ଓ ସୁସ୍ଥ ପରିବେଶ ପାଇଁ ଅନୁଗୋଳ ବନଖଣ୍ଡର ଏହି ପଦକ୍ଷେପ ଏକ ସକାରାତ୍ମକ ବାର୍ତ୍ତା ଦେଇଛି।
