ଦିଲ୍ଲୀରେ ଭୁଶୁଡ଼ିଲା ୫ ମହଲା କୋଠା: ମୃତ୍ୟୁସଂଖ୍ୟା ୫, ଭଗ୍ନାବଶେଷ ତଳେ ଆହୁରି ଅନେକ!
ନୂଆଦିଲ୍ଲୀ: ଦକ୍ଷିଣ-ପଶ୍ଚିମ ଦିଲ୍ଲୀର ସତ୍ୟନିକେତନ ଅଞ୍ଚଳରେ ଘଟିଛି ବଡ଼ ଅଘଟଣ। ରବିବାର ହଠାତ୍ ଏକ ୫ ମହଲା କୋଠା ଭୁଶୁଡ଼ି ପଡ଼ିବାରୁ ଏଯାବତ୍ ୫ ଜଣଙ୍କ ମୃତ୍ୟୁ ହୋଇଛି। ଭଗ୍ନାବଶେଷ ତଳେ ଆହୁରି ଅନେକ ଲୋକ ଫସିଥିବା ଆଶଙ୍କା ଥିବାରୁ ମୃତ୍ୟୁସଂଖ୍ୟା ବଢ଼ିବାର ଆଶଙ୍କା ରହିଛି।
ଦିଲ୍ଲୀ ବିଶ୍ୱବିଦ୍ୟାଳୟ ନିକଟସ୍ଥ ଏହି କୋଠାରେ ଅଧିକାଂଶ ଛାତ୍ର ପେଇଂ ଗେଷ୍ଟ ଭାବେ ରହୁଥିବା ଜଣାପଡ଼ିଛି। ପ୍ରାୟ ୫୦ ବର୍ଷ ପୁରୁଣା ଏହି ଅଟ୍ଟାଳିକାକୁ ପୂର୍ବରୁ ବିପଦସଂକୁଳ ଘୋଷଣା କରାଯାଇଥିଲା। କୋଠାର ବିଭିନ୍ନ ପିଲାର ଦୁର୍ବଳ ହୋଇଯାଇଥିବାରୁ ଏହାକୁ ନେଇ ପୂର୍ବରୁ ମଧ୍ୟ ଚିନ୍ତା ପ୍ରକାଶ ପାଇଥିଲା।
ସୂଚନା ଅନୁଯାୟୀ, କୋଠା ମାଲିକ ହରିରାମ ବନସାଲ ମରାମତି କାମ ଆରମ୍ଭ କରିଥିଲେ। ତେବେ ମରାମତି କାମ ସରିନଥିବା ସତ୍ତ୍ୱେ କୋଠାଟି ଛାତ୍ରମାନଙ୍କୁ ଭଡ଼ାରେ ଦିଆଯାଇଥିବା ଅଭିଯୋଗ ହୋଇଛି।
ବର୍ଷା ପରେ ବଢ଼ିଥିଲା ବିପଦ
ଲଗାଣ ବର୍ଷା ମଧ୍ୟ ଦୁର୍ଘଟଣାର ଏକ ପ୍ରମୁଖ କାରଣ ହୋଇଥାଇପାରେ ବୋଲି ଆଶଙ୍କା କରାଯାଉଛି। ପ୍ରାୟ ଦୁଇ ଦିନ ଧରି କୋଠାର ବେସମେଣ୍ଟ ନିକଟ ଅଞ୍ଚଳ ପାଣିରେ ବୁଡ଼ି ରହିଥିଲା। ଏହାର କିଛି ସମୟ ପରେ ହଠାତ୍ କୋଠାଟି ଭୁଶୁଡ଼ି ପଡ଼ିଥିଲା। ମୃତକଙ୍କ ମଧ୍ୟରେ ଜଣେ ମରାମତି କାମରେ ନିୟୋଜିତ ଶ୍ରମିକ ଥିବା ଜଣାପଡ଼ିଛି।
MCD ବିରୋଧରେ ଛାତ୍ରଙ୍କ ଆକ୍ରୋଶ
ଘଟଣାକୁ ନେଇ ଦିଲ୍ଲୀ ମହାନଗର ନିଗମ (MCD) ବିରୋଧରେ ଅସନ୍ତୋଷ ତୀବ୍ର ହୋଇଛି। ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ABVP)ର ଛାତ୍ରଛାତ୍ରୀମାନେ MCD କାର୍ଯ୍ୟାଳୟରେ ପହଞ୍ଚି ବିକ୍ଷୋଭ ପ୍ରଦର୍ଶନ କରିଥିଲେ। ଏହି ସମୟରେ କାର୍ଯ୍ୟାଳୟରେ ଭଙ୍ଗାରୁଜା ହୋଇଥିବା ଖବର ମଧ୍ୟ ମିଳିଛି।
ବିକ୍ଷୋଭ ସମୟରେ ପୁଲିସ ଓ ଛାତ୍ରଛାତ୍ରୀଙ୍କ ମଧ୍ୟରେ କିଛି ସମୟ ପାଇଁ ମୁହାଁମୁହିଁ ପରିସ୍ଥିତି ଉପୁଜିଥିଲା। ABVP ପକ୍ଷରୁ ଘଟଣା ପାଇଁ MCD କମିଶନରଙ୍କୁ ଦାୟୀ କରାଯାଇ ତାଙ୍କ ଇସ୍ତଫା ଦାବି କରାଯାଇଛି।
ଏପଟେ ଭଗ୍ନାବଶେଷ ତଳେ ଫସିଥିବା ଲୋକଙ୍କୁ ଖୋଜିବା ଓ ଉଦ୍ଧାର ପାଇଁ ଯୁଦ୍ଧକାଳୀନ ଭିତ୍ତିରେ ଅଭିଯାନ ଜାରି ରହିଛି। ଉଦ୍ଧାର କାର୍ଯ୍ୟ ସମ୍ପୂର୍ଣ୍ଣ ହେବା ପରେ ହିଁ ଏହି ଦୁର୍ଘଟଣାରେ ପ୍ରକୃତରେ କେତେ ଜଣ ପ୍ରଭାବିତ ହୋଇଛନ୍ତି, ତାହାର ସ୍ପଷ୍ଟ ଚିତ୍ର ସାମ୍ନାକୁ ଆସିବ।
