ପ୍ୟାରିସ ମହାକାଶ ସମ୍ମିଳନୀରେ ମୋଦୀଙ୍କ ଆହ୍ୱାନ: ସହଯୋଗରେ ହେଉ ମହାକାଶ ଅନୁସନ୍ଧାନ
ନୂଆଦିଲ୍ଲୀ: ଫ୍ରାନ୍ସର ପ୍ୟାରିସରେ ଆୟୋଜିତ ଅନ୍ତର୍ଜାତୀୟ ମହାକାଶ ସମ୍ମିଳନୀକୁ ଭିଡିଓ କନଫରେନ୍ସିଂ ମାଧ୍ୟମରେ ସମ୍ବୋଧନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ମହାକାଶର ଶାନ୍ତିପୂର୍ଣ୍ଣ, ସୁରକ୍ଷିତ ଓ ଦୀର୍ଘସ୍ଥାୟୀ ବ୍ୟବହାର ପାଇଁ ବିଶ୍ୱ ସମୁଦାୟକୁ ସହଯୋଗର ମାର୍ଗ ଆପଣାଇବାକୁ ସେ ଆହ୍ୱାନ ଦେଇଛନ୍ତି।
ସମ୍ମିଳନୀରେ ଯୋଗଦେବା ପାଇଁ ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରନଙ୍କ ନିମନ୍ତ୍ରଣକୁ ଧନ୍ୟବାଦ ଜଣାଇ ଶ୍ରୀ ମୋଦୀ କହିଥିଲେ ଯେ, ମହାକାଶ ପ୍ରତି ମାନବଜାତିର ଆକର୍ଷଣ ଶତାବ୍ଦୀ ଧରି ରହିଆସିଛି। ବର୍ତ୍ତମାନ ମହାକାଶ ପ୍ରଯୁକ୍ତି ପାଣିପାଗ, କୃଷି, ସମୁଦ୍ର, ନୌବହନ ଓ ବିପର୍ଯ୍ୟୟ ପରିଚାଳନା ଭଳି କ୍ଷେତ୍ରରେ ଦୈନନ୍ଦିନ ଜୀବନକୁ ପ୍ରଭାବିତ କରୁଛି।
ମହାକାଶ କ୍ଷେତ୍ରରେ ବଢ଼ୁଥିବା ପ୍ରତିସ୍ପର୍ଦ୍ଧା ଓ ଗ୍ରହ କକ୍ଷପଥରେ ବଢ଼ୁଥିବା ଭିଡ଼ ଉପରେ ଚିନ୍ତା ପ୍ରକାଶ କରି ପ୍ରଧାନମନ୍ତ୍ରୀ କହିଥିଲେ, ଅଳ୍ପକାଳୀନ ଲାଭ ଅପେକ୍ଷା ଦୀର୍ଘସ୍ଥାୟୀତ୍ୱକୁ ଅଧିକ ଗୁରୁତ୍ୱ ଦେବା ଆବଶ୍ୟକ। ବିଶ୍ୱ ସମୁଦାୟକୁ ମୁକାବିଲା ବଦଳରେ ସହଯୋଗ, ବିଚ୍ଛିନ୍ନତା ବଦଳରେ ଅନ୍ତର୍ଭୁକ୍ତିକରଣ ଏବଂ ସ୍ୱାର୍ଥ ବଦଳରେ ସାମୂହିକ ହିତକୁ ବାଛିବାକୁ ସେ କହିଥିଲେ।
ମହାକାଶ ପ୍ରତି ଭାରତର ଦୃଷ୍ଟିକୋଣ ‘ବସୁଧୈବ କୁଟୁମ୍ବକମ୍’ ନୀତି ଉପରେ ଆଧାରିତ ବୋଲି ମୋଦୀ କହିଥିଲେ। ଏହାର ଅର୍ଥ ‘ଏକ ପୃଥିବୀ, ଏକ ପରିବାର ଓ ଏକ ଭବିଷ୍ୟତ’। ଅନ୍ତର୍ଜାତୀୟ ଆଇନ, ବହୁପାକ୍ଷିକ ସହଯୋଗ ଓ ଆଲୋଚନା ମାଧ୍ୟମରେ ଏକ ସୁରକ୍ଷିତ ଓ ଶାନ୍ତିପୂର୍ଣ୍ଣ ମହାକାଶ ପରିବେଶ ଗଠନ ଉପରେ ସେ ଗୁରୁତ୍ୱାରୋପ କରିଥିଲେ।
ଭାରତର ମହାକାଶ କାର୍ଯ୍ୟକ୍ରମର ସଫଳତା ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ, ଇସ୍ରୋ ନିଜର ଉତ୍କର୍ଷତା, କମ୍ ଖର୍ଚ୍ଚରେ ମିଶନ ସଫଳ କରିବାର କ୍ଷମତା ଏବଂ ଅନ୍ତର୍ଜାତୀୟ ସହଯୋଗ ପାଇଁ ବିଶ୍ୱସ୍ତରରେ ପ୍ରଶଂସା ପାଇଛି। ଭାରତୀୟ ରକେଟ୍ ମାଧ୍ୟମରେ ୩୪ଟି ଦେଶର ୪୩୦ରୁ ଅଧିକ ପେଲୋଡ୍ ଉତକ୍ଷେପଣ କରାଯାଇଥିବା ସେ ସୂଚନା ଦେଇଥିଲେ।
ମହାକାଶ ପ୍ରଯୁକ୍ତିର ଲାଭ ସାଧାରଣ ଲୋକଙ୍କ ପାଖରେ ପହଞ୍ଚୁଛି ବୋଲି କହି ମୋଦୀ ଚାଷୀ, ମତ୍ସ୍ୟଜୀବୀ ଓ ଅନ୍ୟାନ୍ୟ ବର୍ଗଙ୍କ ଜୀବନରେ ଉପଗ୍ରହ ପ୍ରଯୁକ୍ତିର ଉପକାରିତା ଉପରେ ଆଲୋକପାତ କରିଥିଲେ। ଆଦିତ୍ୟ-ଏଲ୍୧ ମିଶନ ସୂର୍ଯ୍ୟ ସମ୍ପର୍କିତ ତଥ୍ୟ ସଂଗ୍ରହ କରୁଥିବା ବେଳେ ଚନ୍ଦ୍ରଯାନ-୩ ଭାରତକୁ ଚନ୍ଦ୍ରର ଦକ୍ଷିଣ ମେରୁ ନିକଟରେ ସଫଳ ଅବତରଣ କରିଥିବା ପ୍ରଥମ ଦେଶର ମାନ୍ୟତା ଦେଇଛି ବୋଲି ସେ କହିଥିଲେ।
ଭବିଷ୍ୟତ ଯୋଜନା ବିଷୟରେ ମୋଦୀ କହିଥିଲେ ଯେ, ୨୦୩୫ ସୁଦ୍ଧା ଭାରତ ନିଜସ୍ୱ ମହାକାଶ ଷ୍ଟେସନ ସ୍ଥାପନ କରିବା ଏବଂ ୨୦୪୦ ସୁଦ୍ଧା ଚନ୍ଦ୍ରକୁ ମାନବ ପଠାଇବା ଲକ୍ଷ୍ୟ ରଖିଛି। ଏହା ସହିତ ଭାରତର ଘରୋଇ ମହାକାଶ ଶିଳ୍ପ ଓ ଷ୍ଟାର୍ଟଅପ୍ଗୁଡ଼ିକ ମଧ୍ୟ ଦ୍ରୁତ ଗତିରେ ଆଗକୁ ବଢ଼ୁଥିବା ସେ କହିଥିଲେ।
ଫ୍ରାନ୍ସ ସହ ଭାରତର ଦୀର୍ଘସ୍ଥାୟୀ ମହାକାଶ ସହଯୋଗକୁ ପ୍ରଶଂସା କରି ପ୍ରଧାନମନ୍ତ୍ରୀ କହିଥିଲେ ଯେ, ଥୁମ୍ବାରେ ଭାରତୀୟ ମହାକାଶ କାର୍ଯ୍ୟକ୍ରମ ଆରମ୍ଭ ହେବା ସମୟରୁ ଫ୍ରାନ୍ସ ଏକ ବିଶ୍ୱସ୍ତ ସହଯୋଗୀ ଭାବେ ରହିଆସିଛି। ଭବିଷ୍ୟତରେ ମହାକାଶ ଅନୁସନ୍ଧାନ ଓ ନବସୃଜନରେ ଅଧିକ ଦେଶ ଭାରତ ସହ ଯୋଡ଼ିହେବାକୁ ସେ ଆମନ୍ତ୍ରଣ ଦେଇଥିଲେ।
ସମ୍ବୋଧନ ଶେଷରେ ମୋଦୀ କହିଥିଲେ, ମହାକାଶ ଅନୁସନ୍ଧାନ, ନବସୃଜନ ଓ ଏହାର ସୁରକ୍ଷା ପାଇଁ ସମଗ୍ର ବିଶ୍ୱକୁ ଏକାଠି କାମ କରିବାକୁ ହେବ। ମାନବଜାତି ଓ ଆଗାମୀ ପିଢ଼ିର ହିତ ପାଇଁ ମହାକାଶର ସମ୍ଭାବନାକୁ ସାମୂହିକ ଭାବେ ବ୍ୟବହାର କରିବା ହିଁ ସମୟର ଆହ୍ୱାନ ବୋଲି ସେ କହିଥିଲେ।
