ଫାଇଲେରିଆ ରୋଗର ସାର୍ବଜନୀନ ଔଷଧ ସେବନକୁ ନେଇ ଜିଲ୍ଲା ସ୍ତରୀୟ ସମନ୍ଵୟ କମିଟୀ ବୈଠକ ଅନୁଷ୍ଠିତ ।

ଫାଇଲେରିଆ ରୋଗର ସାର୍ବଜନୀନ ଔଷଧ ସେବନକୁ ନେଇ ଜିଲ୍ଲା ସ୍ତରୀୟ ସମନ୍ଵୟ କମିଟୀ ବୈଠକ ଅନୁଷ୍ଠିତ ।

(ଜେ ବି ଏନ /ସୁଶିଲ କୁମାର) ୦୬/୦୧ /୨୦୨୧ ଅନୁଗୋଳ : ଜିଲ୍ଲାରୁ ଫାଇଲେରିଆ ରୋଗର ନିରାକରଣ ନିମନ୍ତେ ସାର୍ବଜନୀନ ଔଷଧ ସେବନକୁ ନେଇ ଆଜି ମଧ୍ୟାହ୍ନରେ ଏକ ଜିଲ୍ଲା ସ୍ତରୀୟ ସମନ୍ବୟ କମିଟୀ ବୈଠକ ଜିଲ୍ଲାପାଳ ଶ୍ରୀ ସିଦ୍ଧାର୍ଥ ଶଙ୍କର ସ୍ବାଇଁଙ୍କ ଅଧ୍ୟକ୍ଷତାରେ ତାଙ୍କ କାର୍ଯ୍ୟାଳୟ ପ୍ରକୋଷ୍ଠରେ ଅନୁଷ୍ଠିତ ହୋଇଯାଇଛି । ଏହି ରୋଗର ଲକ୍ଷଣକୁ ଚିହ୍ନଟ କରି ନିଜେ ସଚେତନ ରହିଲେ ଏହାର ପ୍ରତିରୋଧ ଓ ନିରାକରଣ କରାଯାଇପାରିବ ବୋଲି ଜିଲ୍ଲାପାଳ ପ୍ରକାଶ କରିଥିଲେ । ଏହି ଔଷଧ ବିତରଣରେ ମୁଖ୍ୟ ଭୁମିକା ଗ୍ରହଣ କରୁଥିବା ଆଶା ଓ ଅଙ୍ଗନବାଡି କର୍ମୀମାନେ କାର୍ଯ୍ୟକ୍ରମକୁ ସଫଳ କରିବାରେ ଆବଶ୍ୟକ ସହଯୋଗ କରିବା ଉପରେ ଜିଲ୍ଲାପାଳ ଗୁରୁତ୍ବାରୋପ କରିଥିଲେ । ଜିଲ୍ଲା ମ୍ୟାଲେରିଆ ଅଧୁକାରୀ ଡାଃ ବିଶ୍ଵ ବିହାରି ମହାନ୍ତି ଏହି ରୋଗର ଲକ୍ଷଣ ଓ ସଂକ୍ରମଣ ସମ୍ପର୍କରେ ତଥ୍ୟ ଉପସ୍ଥାପନ କରିବା ସହ ଏହାର ନିୟନ୍ତ୍ରଣ ନିମନ୍ତେ ସାର୍ବଜନୀନ ଔଷଧ ସେବନ ଉପରେ ଆଲୋକପାତ କରିଥିଲେ । ଯଦିଓ ଏହି ରୋଗ ପାଇଁ କୌଣସି ଟୀକା ବାହାରିନାହିଁ କେବଳ ସମୂହ ଔଷଧ ସେବନ ଦ୍ଵାରା ଏହି ରୋଗକୁ ନିୟନ୍ତ୍ରଣ କରାଯାଇପାରିବ ବୋଲି ସେ ପ୍ରକାଶ କରିଥିଲେ । ଜିଲ୍ଲା ମୁଖ୍ୟଚିକିତ୍ସାଳୟ ତରଫରୁ ପ୍ରସ୍ତୁତ ହୋଇଥିବା ଅଣୁ ଯୋଜନା ଅନୁଯାୟୀ ଆସନ୍ତାମାସ ୧୦ ରୁ ୧୨ ତାରିଖରେ ଔଷଧ ବିତରଣ ନିମନ୍ତେ ୨୫୫୦ ଜଣ ଔଷଧ ବିତରକ ଏବଂ ୨୫୫ ଜଣ ସୁପରଭାଇଜର ନିୟୋଜିତ ହୋଇଛନ୍ତି । ଯେଉଁମାନେ ରହିଯିବେ ସେମାନଙ୍କୁ ଏହି ସପ୍ତାହର ପରବର୍ତ୍ତୀ ଦିନ ଗୁଡିକରେ ଔଷଧ ବିତରଣ କରାଯିବ । ସମୁଦାୟ ୧୭୫ ଟି ଉପସ୍ଵାସ୍ଥ୍ୟ କେନ୍ଦ୍ରରେ ୧୨ ଲକ୍ଷ ୫୭ ହଜାର ୪୪୦ଟି ଆବେଣ୍ଡାଜୋଲ (Albendazole) ବଟିକା ଓ ୩୧ ଲକ୍ଷ ୪୩ ହଜାର ୬୦୦ଟି ଡି ଇ ସି (DEC) ବଟିକା ପ୍ରଦାନ କରାଯିବ । ଏହି ବଟିକା ଖାଇବା ପାଇଁ ଜିଲ୍ଲାର ସମୁଦାୟ ୧୨ଲକ୍ଷ ୫୭ ହଜାର ୪୪୦ ଜଣଙ୍କୁ ସ୍ଥିର କରାଯାଇଛି । ଏହି ଔଷଧ ସେବନର କୌଣସି ପାର୍ଶ୍ୱ ପ୍ରତିକ୍ରିୟା ନାହିଁ । ୨ବର୍ଷରୁ କମ୍ ଶିଶୁ , ଗର୍ଭବତୀ ମହିଳା ଓ ଦୀର୍ଘଦିନ ରୋଗରେ ପିଡିତ ଥିବା ବ୍ୟକ୍ତିମାନଙ୍କୁ ଛାଡି ଅନ୍ୟ ସମସ୍ତେ ଏହି ଔଷଧ ସେବନ କରିପାରିବେ । ଖାଲି ପେଟରେ ଏହି ଔଷଧ ସେବନ କରାଯିବ ନାହିଁ । ୨ – ୫ ବର୍ଷର ଶିଶୁମାନଙ୍କୁ ଗୋଟିଏ ଡି ଇ ସି ବଟିକା ଓ ଗୋଟିଏ ଆଲବେଣ୍ଡାଜୋଲ ବଟିକା ଖାଇବାକୁ ଦିଆଯାଉଥିବା ବେଳେ ୬ – ୧୪ ବର୍ଷ ପିଲାମାନଙ୍କ ପାଇଁ ୨ଟି ଡି ଇ ସି ବଟିକା ଓ ଗୋଟିଏ ଆଲବେଣ୍ଡାକୋଲ ବଟିକା ଦିଆଯିବ । ସେହିପରି ୧୫ ବର୍ଷରୁ ଊଦ୍ଧ ସମସ୍ତ ବୟସ୍କ ମାନଙ୍କ ପାଇଁ ୩ଟି ଡି ଇ ସି ବଟିକା ଓ ଗୋଟିଏ ଆଲବେଣ୍ଡାଜଲ ବଟିକା ଦିଆଯିବ ବୋଲି ଏହି ଅଣୁ ଯୋଜନାରେ ସ୍ଥିର କରାଯାଇଛି ବୈଠକର ପ୍ରାରମ୍ଭରେ ଜିଲ୍ଲା ମୁଖ୍ୟଚିକିତ୍ସା ଓ ଜନସ୍ବାସ୍ଥ୍ୟ ଅଧିକାରୀ ଡାଃ ଅଭୟ କୁମାର ଦାସ ସମସ୍ତଙ୍କୁ ସ୍ଵାଗତ ଜଣାଇବା ସହ ଫାଇଲେରିଆ ରୋଗର ନିୟନ୍ତ୍ରଣ ଓ ସାର୍ବଜନୀନ ଔଷଧ ସେବନ ସମ୍ପର୍କରେ ଆଲୋକପାତ କରିଥିଲେ । ଏହି ବୈଠକରେ ଅନ୍ୟ ମାନଙ୍କ ମଧ୍ୟରେ ଅନୁଗୋଳ ଉପଜିଲ୍ଲାପାଳ ଶ୍ରୀ ବାସୁଦେବ ଶତପଥୀ , ଟେକନିକାଲ ଏକ୍ସପର୍ଟ ( ଭୁବନେଶ୍ଵର ) ଡାଃ ମଦନ ମୋହନ ପ୍ରଧାନ , ରାଜ୍ୟ କୀଟାଣୁ ବିତ୍ ଡାଃ ରବି ଶଙ୍କର ପଣ୍ଡିତ , ବିଶ୍ଵ ସ୍ଵାସ୍ଥ୍ୟ ସଂଗଠନର ଡାଃ ବି ପି ଦତ୍ତ , ଜିଲ୍ଲା ସ୍ତରର ମଶାବାହିତ ରୋଗର ପରାମର୍ଶଦାତା ନିରୁପମା ଦାସଙ୍କ ସମେତ ବିଭିନ୍ନ ସ୍ୱାସ୍ଥ୍ୟ କେନ୍ଦ୍ରର ଡାକ୍ତର , ସ୍ଵାସ୍ଥ୍ୟ କର୍ମୀ , ଜିଲ୍ଲା ସ୍ତରୀୟ ଅଧିକାରୀ ଓ ଶିକ୍ସ ସଂସ୍ଥା ଗୁଡିକର କର୍ମକର୍ତ୍ତାମାନେ ଯୋଗ ଦେଇଥିଲେ । |