ଏନଟିପିସି (NTPC) ଓ ଟିଟିପିଏସ(TTPS)ର ୯ମ ଥଇଥାନ ଓ ପାରିପାର୍ଶିକ ଉନ୍ନୟନ ପରାମର୍ଶଦାତା କମିଟି ( ଆରପିଡିଏସି ) ବୈଠକ ଅନୁଷ୍ଠିତ ।
(ଜେ. ବି. ଏନ୍/ସୁଶାନ୍ତ କୁମାର ) ୧୨/୦୧ /୨୦୨୧
ଅନୁଗୋଳ : କଣିହାଁ ଏନଟିପିସି (NTPC) ଓ ତାଳଚେର ଟିଟିପିଏସ(TTPS)ର ୯ମ ଆରପିଡିଏସି ବୈଠକ ଆଜି ପୂର୍ବାହ୍ନରେ ଜିଲ୍ଲା କାର୍ଯ୍ୟାଳୟ ସମ୍ମିଳନୀ ଗୃହରେ ଉତ୍ତରାଞ୍ଚଳ ରାଜସ୍ବ କମିଶନର ତଥା ଆରପିଡିଏସି(RPDS) ଅଧ୍ୟକ୍ଷ ଶ୍ରୀ ନିରଞ୍ଜନ ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ଏହି ବୈଠକରେ ଢେଙ୍କାନାଳ ସାସଂଦ ଶ୍ରୀ ମହେଶ ସାହୁ , ତାଳଚେର ବିଧାୟକ ଶ୍ରୀ ବ୍ରଜକିଶୋର ପ୍ରଧାନ , ପାଳଲହଡା ବିଧାୟକ ଶ୍ରୀ ମୁକେଶ କୁମାର ପାଲ , ଜିଲ୍ଲା ପରିଷଦ ଅଧ୍ୟକ୍ଷା ଶ୍ରୀମତୀ ବାସନ୍ତୀ କିଷାନ , ଉତ୍ତର କେନ୍ଦ୍ରାଞ୍ଚଳ ଡିଆଇଜି ଡାଃ ସାର୍ଥକ କୁମାର ଷଡଙ୍ଗୀ , ଆରକ୍ଷୀ ଅଧିକ୍ଷକ ଶ୍ରୀ ଜଗମୋହନ ମୀନା , ଏନଟିପିସି ଓ ଟିଟିପିଏସ ଅଞ୍ଚଳିକ ନିର୍ଦ୍ଦେଶକ କାର୍ଯ୍ୟାଳୟ ଭୁବନେଶ୍ବରର ମହାପ୍ରବନ୍ଧକ ( ମାନବ ସମ୍ବଳ ) ମିଲନ କୁମାର ପ୍ରମୁଖ ଯୋଗ ଦେଇଥିଲେ । ପ୍ରାରମ୍ଭରେ ଜିଲ୍ଲାପାଳ ଶ୍ରୀ ସିଦ୍ଧାର୍ଥ ଶଙ୍କର ସ୍ବାଇଁ ସମସ୍ତଙ୍କୁ ସ୍ବାଗତ ଜଣାଇବା ସହ ଏହି ବୈଠକର ଉଦ୍ଦେଶ୍ୟ ଓ ଆଭିମୁଖ୍ୟ ସମ୍ପର୍କରେ ଆଲୋକପାତ କରିଥିଲେ । ବିସ୍ଥାପିତ ପରିବାର ଗୁଡିକର ଉପଯୁକ୍ତ ଥଇଥାନ ନିମନ୍ତେ ଉଭୟ ଏନଟିପିସି , ଟିଟିପିଏ , ଜିଲ୍ଲା ପ୍ରଶାସନ ଓ ଲୋକ ପ୍ରତିନିଧି ସମିଳିତ ଭାବେ ଆନ୍ତରିକତାର ସହିତ ସେମାନଙ୍କର ବିଭିନ୍ନ ସମସ୍ୟାକୁ ଆଲୋଚନା ମାଧ୍ୟମରେ ନିର୍ଦ୍ଦିଷ୍ଟ ସମୟ ସୀମା ମଧ୍ୟରେ ସମାଧାନ କରିବାକୁ ରାଜସ୍ବ କମିଶନର ଆହ୍ବାନ କରିଥିଲେ । ଦୀର୍ଘ ଦିନ ପରେ ୯ମ ଆରପିଡିଏସି ବୈଠକ ଅନୁଷ୍ଠିତ ହେଉଥିବାରୁ ବିସ୍ଥାପିତ ପରିବାର ଗୁଡିକର ଥଇଥାନକୁ ନେଇ ଅନେକ ସମସ୍ୟା ରହିଛି ।
୨୦୧୬ ରେ ୭ମ ଆରପିଡିଏସିରେ ନିଆଯାଇଥିବା ବିଭିନ୍ନ ନିଷ୍ପତ୍ତର ସଠିକ୍ କାର୍ଯ୍ୟକାରିତା ହୋଇନଥିବାରୁ ଲୋକପ୍ରତିନିଧିମାନେ କ୍ଷୋଭ ପ୍ରକାଶ କରିଥିଲେ । ଏନଟିପିସିର ୭ମ ଆରପିଡିଏସି ବୈଠକର ନିଷ୍ପତ୍ତି ଅନୁଯାୟୀ ୯୬ ଜଣ ଏସଏପି ଙ୍କୁ ଥଇଥାନ କରାଯିବାକୁ ସ୍ଥିର ହୋଇଥିଲା । ଇତିମଧ୍ୟରେ ୪୩ ଜଣକୁ ନିଯୁକ୍ତି ଦିଆଯାଇଛି ବୋଲି କମ୍ପାନୀ କର୍ତ୍ତୁପକ୍ଷ ସୂଚନା ପ୍ରଦାନ କରିଥିଲେ ।ଥଇଥାନ ଓ ପୁର୍ନବାସ ୧୦ ଜଣଙ୍କ ମଧ୍ୟରୁ ୩ ଏହି ପ୍ୟାକେଜ୍ ଗ୍ରହଣ କରିଛନ୍ତି। ଏହାଛଡ଼ା ଆବେଦନ କରିଥିବା ୧୦ ଜଣଙ୍କ ମଧ୍ୟରୁ ୩ ଜଣ ନୋମିନି ବଦଳାଇଛନ୍ତି । ୧୦ ଜଣ ମାଟ୍ରିକ ପାସ୍ କରିଥିବା ପ୍ରାର୍ଥୀଙ୍କର ନାମ ଆଇଟିଆଇ ତାଲିମ ନିମନ୍ତେ ପଠାଯାଇଥିଲା ଓ ସେମାନଙ୍କ ମଧ୍ୟରୁ ୫ ଜଣ ଆଇଟିଆଇ ତାଲିମ ସମ୍ପନ୍ନ କରି ନିଯୁକ୍ତି ପାଇଛନ୍ତି ବୋଲି କମ୍ପାନୀ କର୍ତ୍ତୃପକ୍ଷ ସୂଚନା ପ୍ରଦାନ କରିଥିଲେ । ଏହି ବୈଠକରେ ବହୁ ଦିନରୁ ପଡି ରହିଥିବା ବିଭିନ୍ନ ବିସ୍ଥାପିତ ସମସ୍ୟା ସମ୍ପର୍କରେ ବିସ୍ତୃତ ଭାବେ ଆଲୋଚନା ହୋଇଥିଲା ।
ଆସନ୍ତା ୧୫ ଦିନ ମଧ୍ୟରେ ବିସ୍ଥାପିତ ପରିବାର ଗୁଡିକର ଯୋଗ୍ୟ ସଦସ୍ୟମାନଙ୍କର ନୋମିନି ପରିବର୍ତ୍ତନ କରି ନିଯୁକ୍ତି ଦିଅ କିମ୍ବା କ୍ଷତିପୂରଣ ରାଶି ପ୍ରଦାନ କରିବାକୁ ରାଜସ୍ବ କମିଶନର ପରାମର୍ଶ ଦେଇଛନ୍ତି । ଇତିମଧ୍ୟରେ ୨୨ଜଣ କ୍ଷତିପୂରଣ ପାଇବାକୁ ସମ୍ମତି ପ୍ରଦାନ କରି ସେମାନଙ୍କ ମଧ୍ୟରୁ ୧୫ଜଣ କ୍ଷତିପୂରଣ ପାଇଛନ୍ତି ବୋଲି କମ୍ପାନୀ କର୍ତ୍ତୁପକ୍ଷ ସୂଚନା ପ୍ରଦାନ କରିଥିଲେ । ଅବଶିଷ୍ଟ ୭ ଜଣଙ୍କ ସମସ୍ୟାକୁ ନେଇ ଅତିରିକ୍ତ ଜିଲ୍ଲାପାଳ ( ରାଜସ୍ୱ ) ସଠିକ୍ ଭାବେ ଅନୁଧ୍ୟାନ କରି ଗୃହକୁ ଅବଗତ କରିବାକୁ ପରାମର୍ଶ ଦିଆଯାଇଛି । ଟିଟିପିଏସ ନିକଟ ଭବିଷ୍ୟତରେ ତାର କାରଖାନାକୁ ବନ୍ଦ କରିବା ବୋଲି କମ୍ପାନୀ କର୍ତ୍ତୁପକ୍ଷ ସୂଚନା ପ୍ରଦାନ କରିଥିଲେ । ବର୍ତ୍ତମାନ ସୁଦ୍ଧା ୬୫ ଜଣ ଏସଏପି ସେମାନଙ୍କର କ୍ଷତିପୂରଣ ରାଶି ଗ୍ରହଣ କରିନାହାନ୍ତି । ସେଥିମଧ୍ୟରୁ ୬୩ ଜଣ ଚୁକ୍ତିଭିତ୍ତିକ ନିଯୁକ୍ତି ପାଇଥିବାବେଳେ ଅନ୍ୟ ୨ ଜଣକୁ ଏଥିରେ ସାମିଲ କରିବାକୁ ରାଜସ୍ବ କମିଶନର ପରାମର୍ଶ ଦେଇଥିଲେ । ଏହି ବୈଠକରେ ଅନ୍ୟମାନଙ୍କ ମଧ୍ୟରେ ଅତିରିକ୍ତ ଜିଲ୍ଲାପାଳ ଶ୍ରୀ ତପନ କୁମାର ଶତପଥୀ , ଅତିରିକ୍ତ ଜିଲ୍ଲାପାଳ ( ରାଜସ୍ୱ ) ଶ୍ରୀ ସନ୍ତୋଷ କୁମାର ପ୍ରଧାନ , ତାଳଚେର ଉପଜିଲ୍ଲାପାଳ ଶ୍ରୀ ରଜନୀ କାନ୍ତ ସ୍ୱାଇଁ , ଭୂ – ଅର୍ଜନ ଅଧିକାରିଣୀ ମନିଷା ଗୁପ୍ତାଙ୍କ ସମେତ ବିଭିନ୍ନ ପଞ୍ଚାୟତ ସମିତିର ଅଧ୍ୟକ୍ଷ ଅଧ୍ୟକ୍ଷା , ସ୍ୱେଚ୍ଛାସେବୀ , ବିସ୍ଥାପିତ ପରିବାରର ପ୍ରତିନିଧି , ବିଭିନ୍ନ ବିଭାଗର ଅଧିକାରୀ ଓ ଏନଟିପିସି , ଟିଟିପିଏସର କର୍ମକର୍ତ୍ତାମାନେ ଯୋଗ ଦେଇଥିଲେ ।
