ଭୂବନେଶ୍ୱର, ୧୭/୦୩ : ଆଜି କମ୍ପିବ ବିଧାନସଭା । ଆଇନ ଶୃଙ୍ଖଳା ପ୍ରସଙ୍ଗକୁ ନେଇ ଗର୍ଜିବେ ବିରୋଧୀ । ହୋଲି ଦିନରେ ସାରା ରାଜ୍ୟରେ ହୋଇଥିବା ହିଂସାକାଣ୍ଡକୁ ନେଇ ବିରୋଧୀ ସରକାରଙ୍କୁ ଘେରିବାକୁ ରଣନୀତି କରିଛନ୍ତି । ହୋଲି ଦିନ ରାଜଧାନୀରେ ଦୁଇ ଦୁଇଟି ହତ୍ୟାକାଣ୍ଡ, କଟକରେ ଗୁଳିମାଡ ସମେତ ସାରା ରାଜ୍ୟରେ ହିଂସାକାଣ୍ଡ ଘଟିଛି ।
ଏହି ପ୍ରସଙ୍ଗକୁ ବିଧାନସଭାରେ ଉଠାଇବେ ବୋଲି ଉଭୟ ବିଜେଡି ଓ କଂଗ୍ରେସ ବିଧାୟକ ଗଣମାଧ୍ୟମରେ କହିଛନ୍ତି । ପୂର୍ବରୁ ମହିଳା ନିର୍ଯାତନା ଓ ଜୟନାରାୟଣଙ୍କ ବିବାଦୀୟ ବୟାନକୁ ପ୍ରସଙ୍ଗ କରି ଗୃହକୁ ଅଚଳ କରିଦେଇଥିଲେ ବିରୋଧୀ । ଏବେ ଆଇନ ଶୃଙ୍ଖଳାକୁ ପ୍ରସଙ୍ଗ କରି ବିଧାନସଭାରେ ସରକାରଙ୍କୁ ଅକଲରେ ପକାଇବାକୁ ବିରୋଧୀ ଯୋଜନା କରିଛନ୍ତି ।
