ଅନୁଗୋଳ ; ୨୯ ଜୁନ୍ ୨୦୨୬: ଅନୁଗୋଳ ଜିନ୍ଦଲ ନଗର ସ୍ଥିତ ଦେବଭୂମି ଶ୍ରୀ ଜଗନ୍ନାଥ ମନ୍ଦିରରେ ଚତୁର୍ଦ୍ଧାମୂରତୀଙ୍କ ପବିତ୍ର ଦେବସ୍ନାନ ନୀତି, ଭକ୍ତିଭାବ ଓ ଆଧ୍ୟାତ୍ମିକ ପରିବେଶ ମଧ୍ୟରେ ଅନୁଷ୍ଠିତ ହୋଇଯାଇଛି ।
ଏହି ଦିବ୍ୟ ଅବସରରେ ଓ.ପି. ଜିନ୍ଦଲ ଗୋଷ୍ଠୀର ଚେୟାରପର୍ସନ୍ ଏମେରିଟସ୍ ଶ୍ରୀମତୀ ସାବିତ୍ରୀ ଜିନ୍ଦଲ ଏବଂ ମନ୍ଦିରର ଆଦ୍ୟ ସେବିକା ତଥା ଜିନ୍ଦଲ ଫାଉଣ୍ଡେସନର ଅଧ୍ୟକ୍ଷା ଶ୍ରୀମତୀ ଶାଲୁ ଜିନ୍ଦଲ ଉପସ୍ଥିତ ରହି ପ୍ରଭୁ ବଳଭଦ୍ର, ଦେବୀ ସୁଭଦ୍ରା ଏବଂ ମହାପ୍ରଭୁ ଜଗନ୍ନାଥଙ୍କ ନିକଟରେ ପ୍ରାର୍ଥନା କରିବା ସହ ସେବାର୍ଚ୍ଚନା କରିଥିଲେ। ଜିନ୍ଦଲ ନଗର ଏବଂ ଆଖପାଖ ଗ୍ରାମରୁ ବହୁ ସଂଖ୍ୟକ ଶ୍ରଦ୍ଧାଳୁ ଏହି ପବିତ୍ର ଦେବସ୍ନାନ ପୂର୍ଣ୍ଣିମା ପାଳନରେ ସାମିଲ ହୋଇଥିଲେ।
“ଜୟ ଜଗନ୍ନାଥ” ସ୍ୱର ଏବଂ ଘଣ୍ଟିର ତାଳର ଭକ୍ତିମୟ ପରିବେଶ ଭିତରେ, ମନ୍ଦିରର ପ୍ରମୁଖ ସେବକମାନେ ପୁରୀର ଶ୍ରୀ ଜଗନ୍ନାଥ ମନ୍ଦିରର ପୂଜ୍ୟ ପରମ୍ପରା ଏବଂ ପ୍ରଥାକୁ ଅନୁସରଣ କରି ପବିତ୍ର ରୀତିନୀତିଗୁଡ଼ିକୁ ପବିତ୍ରତାର ସହିତ ସମ୍ପାଦିତ କରିଥିଲେ।
ପ୍ରାତଃ ୫ଟାର ଶୁଭ ମୁହୂର୍ତ୍ତରେ ଦ୍ୱାର ଫିଟା, ମଙ୍ଗଳ ଆଳତି, ଶ୍ରୀକର୍ପୂର ଲାଗି, ମଙ୍ଗଳାର୍ପଣ ନୀତି, ପୁଷ୍ପାଞ୍ଜଳି ଏବଂ ସର୍ବାଙ୍ଗ ନୀତି ସହିତ ଦିନର ଧାର୍ମିକ କାର୍ଯ୍ୟକ୍ରମ ଆରମ୍ଭ ହୋଇଥିଲା। ପରବର୍ତ୍ତୀ ସମୟରେ ମନ୍ଦିରର ସେବାୟତମାନଙ୍କ ତତ୍ତ୍ୱାବଧାନରେ ପବିତ୍ର ସ୍ନାନ ନୀତି ଅତ୍ୟନ୍ତ ଭକ୍ତିଭାବର ସହ ସମ୍ପନ୍ନ ହୋଇଥିଲା।
ଦିନର ସବୁଠାରୁ ପ୍ରତୀକ୍ଷିତ ନୀତି ‘ଚତୁର୍ଦ୍ଧାମୂର୍ତ୍ତିଙ୍କ ଧାଡ଼ି ପହଣ୍ଡି’ ମାଧ୍ୟମରେ ସ୍ନାନମଣ୍ଡପକୁ ବିଜେ ହୋଇଥିଲେ। ପବିତ୍ର ଜଳରେ ମହାପ୍ରଭୁମାନଙ୍କର ମହାସ୍ନାନ ସମ୍ପନ୍ନ ହୋଇଥିଲା, ଯାହା ପବିତ୍ରତା, ଆଶୀର୍ବାଦ ଏବଂ ସମଗ୍ର ବିଶ୍ୱର ମଙ୍ଗଳର ପ୍ରତୀକ। ସ୍ନାନପୂର୍ଣ୍ଣିମା ଅବସରରେ ଅନୁଷ୍ଠିତ ଏହି ସବୁ ନୀତିକାନ୍ତି ମନ୍ଦିର ପରିସରକୁ ଶ୍ରଦ୍ଧା ଓ ଭକ୍ତି ଭାବରେ ଭରି ଦେଇଥିଲା ।
ମହାସ୍ନାନ ପରେ ମହାପ୍ରଭୁମାନଙ୍କୁ ଭବ୍ୟ “ହାତୀ ବେଶ” (ଗଜାନନ ବେଶ) ରେ ସଜ୍ଜିତ କରାଯାଇଥିଲା। ଶ୍ରୀଜଗନ୍ନାଥ ଓ ପ୍ରଭୁ ବଳଭଦ୍ର ଗଣେଶ ସ୍ୱରୂପ ହାତୀ ବେଶ ଧାରଣ କରିଥିବାବେଳେ ଦେବୀ ସୁଭଦ୍ରା ଆକର୍ଷଣୀୟ ‘ପଦ୍ମ’ ବେଶରେ ସୁସଜ୍ଜିତ ହୋଇଥିଲେ। ଏହି ବିରଳ ଦର୍ଶନ ଭକ୍ତମାନଙ୍କୁ ବେଶ ବିଭୋର କରିଥିଲା।
ସନ୍ଧ୍ୟାରେ ଅଣସର ପହଣ୍ଡି ନୀତି ଅନୁଷ୍ଠିତ ହୋଇଥିଲା। ଏହା ପରେ ମହାପ୍ରଭୁମାନେ ଅଣସର ଘରକୁ ବିଜେ କରିଥିଲେ, ଏଠାରେ ଆଗାମୀ ଚଉଦ ଦିନ ପର୍ଯ୍ୟନ୍ତ ଗୁପ୍ତ ବାସରେ ରହିବେ। ଏହାପରେ ପବିତ୍ର ନେତ୍ରୋତ୍ସବ (ନେତ୍ର ଉତ୍ସବ) ଅବସରରେ ଭକ୍ତମାନେ ପୁନର୍ବାର ଶ୍ରୀବଳଭଦ୍ର, ଦେବୀ ସୁଭଦ୍ରା ଏବଂ ମହାପ୍ରଭୁ ଶ୍ରୀଜଗନ୍ନାଥଙ୍କର ଦିବ୍ୟ ଦର୍ଶନ ଲାଭ କରିବେ। ଏହି ଦର୍ଶନ ପରେ ମହାପ୍ରଭୁଙ୍କ ବିଶ୍ୱପ୍ରସିଦ୍ଧ ରଥଯାତ୍ରା ଆରମ୍ଭ ହେବ।
