ଜୋର୍ଡାନରେ ଇରାନୀ ଆକ୍ରମଣରେ ଆମେରିକାକୁ ବଡ଼ ଝଟକା: ୨ ସୈନ୍ୟ ନିହତ, ଜଣେ ନିଖୋଜ
ମଧ୍ୟପ୍ରାଚ୍ୟରେ ଆମେରିକା ଓ ଇରାନ ମଧ୍ୟରେ ଚାଲିଥିବା ସଂଘର୍ଷ ଏବେ ଆହୁରି ଉଗ୍ର ରୂପ ନେଉଛି। ଜୋର୍ଡାନରେ ହୋଇଥିବା ଏକ ଇରାନୀ ଆକ୍ରମଣରେ ଦୁଇ ଜଣ ଆମେରିକୀୟ ସୈନ୍ୟ ନିହତ ହୋଇଥିବାବେଳେ ଆଉ ଜଣେ ସୈନ୍ୟଙ୍କର କୌଣସି ସନ୍ଧାନ ମିଳୁନାହିଁ।
ଆମେରିକୀୟ ସେଣ୍ଟ୍ରାଲ କମାଣ୍ଡ (CENTCOM) ପକ୍ଷରୁ କୁହାଯାଇଛି ଯେ ଶୁକ୍ରବାର ଏହି ଆକ୍ରମଣ ଘଟିଥିଲା। ଘଟଣା ପରେ ଅଞ୍ଚଳରେ ଆମେରିକୀୟ ସେନାର ସୁରକ୍ଷା ଓ ସାମରିକ ପ୍ରସ୍ତୁତିକୁ ନେଇ ଚିନ୍ତା ବଢ଼ିଛି।
ସୂଚନା ଅନୁଯାୟୀ, ସଂଘର୍ଷ ଆରମ୍ଭ ହେବା ପରଠାରୁ ଏପର୍ଯ୍ୟନ୍ତ ୧୬ ଜଣ ଆମେରିକୀୟ ସୈନ୍ୟ ପ୍ରାଣ ହରାଇଛନ୍ତି। ଏହି ସମୟ ମଧ୍ୟରେ ୪୨୦ରୁ ଅଧିକ ଆମେରିକୀୟ ସୈନ୍ୟ ଆହତ ହୋଇଥିବା ଜଣାପଡ଼ିଛି। ନୂଆ ଆକ୍ରମଣ ପରେ ମଧ୍ୟପ୍ରାଚ୍ୟରେ ଆମେରିକା-ଇରାନ ସଂଘର୍ଷ ଆହୁରି ଭୟାବହ ହେବାର ଆଶଙ୍କା ଦେଖାଦେଇଛି।
ସପ୍ତମ ଦିନରେ ମଧ୍ୟ ଥମୁନି ଆକ୍ରମଣ: ଆମେରିକାକୁ ଇରାନର କଡ଼ା ଚେତାବନୀ
ମଧ୍ୟପ୍ରାଚ୍ୟରେ ଆମେରିକା ଓ ଇରାନ ମଧ୍ୟରେ ସଂଘର୍ଷ ଆହୁରି ତୀବ୍ର ହୋଇଛି। ଆମେରିକା ପକ୍ଷରୁ ଲଗାତାର ସପ୍ତମ ଦିନ ହୋଇଥିବା ବିମାନ ଆକ୍ରମଣ ପରେ ଇରାନ ମଧ୍ୟ ପ୍ରତିଆକ୍ରମଣକୁ ଜୋରଦାର କରିଛି। ଇରାନୀ ଆକ୍ରମଣର ଲକ୍ଷ୍ୟରେ ସୌଦି ଆରବ, ଜୋର୍ଡାନ ସମେତ ଆମେରିକାର ଅନ୍ୟାନ୍ୟ ଗଲ୍ଫ ସହଯୋଗୀ ଦେଶ ଥିବା ଦାବି କରାଯାଇଛି।
ଏହି ମଧ୍ୟରେ ଆମେରିକୀୟ ପ୍ରତିରକ୍ଷା ମନ୍ତ୍ରୀ ପିଟ୍ ହେଗସେଥ ନିହତ ସୈନ୍ୟମାନଙ୍କୁ ଶ୍ରଦ୍ଧାଞ୍ଜଳି ଜଣାଇ ତାଙ୍କ ବଳିଦାନ ଆମେରିକାର ସଂକଳ୍ପକୁ ଆହୁରି ମଜବୁତ କରିବ ବୋଲି କହିଛନ୍ତି।
ଅନ୍ୟପଟେ ଇରାନର ସର୍ବୋଚ୍ଚ ନେତା ମୋଜତବା ଖାମେନେଇ ଆମେରିକା ବିରୋଧରେ ତୀବ୍ର ଆକ୍ରୋଶ ପ୍ରକାଶ କରିଛନ୍ତି। ଯୁଦ୍ଧକୁ ଉସକାଇବାର ପରିଣାମ ଆମେରିକାକୁ ଭାରୀ ମୂଲ୍ୟ ଦେଇ ଭୋଗିବାକୁ ପଡ଼ିବ ବୋଲି ସେ ଚେତାବନୀ ଦେଇଛନ୍ତି। ଅନ୍ତରୀଣ ଯୁଦ୍ଧବିରତି ଚୁକ୍ତି ଉଲ୍ଲଂଘନ କରି ଆମେରିକା ନିଜ ପ୍ରତିଶ୍ରୁତିର ବିଶ୍ୱସନୀୟତା ହରାଇଛି ବୋଲି ମଧ୍ୟ ଇରାନ ପକ୍ଷରୁ ଅଭିଯୋଗ କରାଯାଇଛି।
ଫେବୃଆରୀରେ ଆମେରିକା ଓ ଇସ୍ରାଏଲ ପକ୍ଷରୁ ଇରାନ ଉପରେ ଆକ୍ରମଣ ପରେ ଆରମ୍ଭ ହୋଇଥିବା ଏହି ସଂଘର୍ଷ ଏବେ ଆହୁରି ଭୟଙ୍କର ରୂପ ନେଉଛି। ଦୁଇ ପକ୍ଷର ଲଗାତାର ଆକ୍ରମଣ ମଧ୍ୟପ୍ରାଚ୍ୟରେ ପୁଣି ଥରେ ବ୍ୟାପକ ଯୁଦ୍ଧର ଆଶଙ୍କାକୁ ଘନୀଭୂତ କରିଛି।
