ଆହତ ପୁଲିସ କର୍ମଚାରୀଙ୍କ ସମର୍ଥନରେ ଜନ୍ତରମନ୍ତରରେ ଧାରଣା ପାଇଁ ଅନୁମତି ଆବେଦନ, ଜୁଲାଇ ୩୧ରେ ପ୍ରତିବାଦ ଯୋଜନା
ନୂଆଦିଲ୍ଲୀ: ଜନ୍ତରମନ୍ତରରେ ସମ୍ପ୍ରତି ଘଟିଥିବା ହିଂସା ଓ ସଂଘର୍ଷରେ ଆହତ ହୋଇଥିବା ଦିଲ୍ଲୀ ପୁଲିସ ଏବଂ ଅର୍ଦ୍ଧସାମରିକ ବାହିନୀର କର୍ମଚାରୀଙ୍କ ପ୍ରତି ସମର୍ଥନ ଜଣାଇବା ପାଇଁ ଅବସରପ୍ରାପ୍ତ ଦିଲ୍ଲୀ ପୁଲିସ ଅଧିକାରୀଙ୍କ ସଂଗଠନ ‘ଦିଲ୍ଲୀ ପୁଲିସ ମହାସଂଘ’ ଜୁଲାଇ ୩୧ରେ ଏକ ଦିନିକିଆ ଶାନ୍ତିପୂର୍ଣ୍ଣ ଧାରଣାର ଯୋଜନା କରିଛି।
ମହାସଂଘ ପକ୍ଷରୁ ଦିଲ୍ଲୀ ପୁଲିସ କମିସନରଙ୍କୁ ଚିଠି ଲେଖି ସକାଳ ୧୧ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ଜନ୍ତରମନ୍ତରରେ ଧାରଣା ପାଇଁ ଅନୁମତି ମାଗାଯାଇଛି। ଜୁଲାଇ ୨୦ ପରଠାରୁ ଜନ୍ତରମନ୍ତର ଅଞ୍ଚଳରେ ଡ୍ୟୁଟି କରୁଥିବା ସମୟରେ ବହୁ ପୁଲିସ ଓ ଅର୍ଦ୍ଧସାମରିକ ବାହିନୀର ଜବାନ ଆହତ ହୋଇଥିବା ଘଟଣାକୁ ଏହି ପ୍ରତିବାଦର ମୁଖ୍ୟ କାରଣ ବୋଲି ସଂଗଠନ କହିଛି।
ଅବସରପ୍ରାପ୍ତ ପୁଲିସ କର୍ମଚାରୀମାନେ ସକ୍ରିୟ ସେବାରେ ଥିବା ନିଜ ସହକର୍ମୀଙ୍କ ପ୍ରତି ଏକତା ଓ ସମର୍ଥନ ପ୍ରକାଶ କରିବାକୁ ଚାହୁଁଥିବା ବେଳେ, ଏହି ଧାରଣା ପାଇଁ ପ୍ରଶାସନ ଅନୁମତି ଦେବ କି ନାହିଁ, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।
ଦିଲ୍ଲୀ ପୁଲିସର ସୂଚନା ଅନୁସାରେ, ସମ୍ପ୍ରତିର ପ୍ରଦର୍ଶନ ସମୟରେ ୨୦୦ରୁ ଅଧିକ ପୁଲିସ କର୍ମଚାରୀ ଏବଂ ୬୫ ଜଣ ପ୍ରଦର୍ଶନକାରୀ ଆହତ ହୋଇଛନ୍ତି। ଏହାସହ ନୂଆଦିଲ୍ଲୀ ଜିଲ୍ଲାର ବିଭିନ୍ନ ଥାନାରେ ୧୫ଟି ଏଫ୍ଆଇଆର୍ ରୁଜୁ ହୋଇଥିବା ବେଳେ, ପଥରମାଡ଼ରେ ସମ୍ପୃକ୍ତ ବ୍ୟକ୍ତିଙ୍କୁ ଚିହ୍ନଟ କରିବା ପାଇଁ ସିସିଟିଭି ଓ ଭିଡିଓ ଫୁଟେଜ୍ ଯାଞ୍ଚ କରାଯାଉଛି।
ଏବେ ଜନ୍ତରମନ୍ତର ଏବଂ ଏହାର ଆଖପାଖ ଅଞ୍ଚଳରେ କଡ଼ା ସୁରକ୍ଷା ବ୍ୟବସ୍ଥା ଲାଗୁ କରାଯାଇଥିବା ବେଳେ, ଯେକୌଣସି ଅପ୍ରୀତିକର ପରିସ୍ଥିତିକୁ ଏଡ଼ାଇବା ପାଇଁ ଅତିରିକ୍ତ ପୁଲିସ ବଳ ମୁତୟନ କରାଯାଇଛି। ବର୍ତ୍ତମାନ ପରିସ୍ଥିତି ନିୟନ୍ତ୍ରଣରେ ଥିବା ସୂଚନା ଦେଇଛି ଦିଲ୍ଲୀ ପୁଲିସ।
