ରାଷ୍ଟ୍ରପତିଙ୍କ ସହ ଗ୍ରାସରୁଟ୍ ଇନୋଭେଟରଙ୍କ ସାକ୍ଷାତ: ‘ବିକଶିତ ଭାରତ’ର ମୂଳ ଶକ୍ତି ହେଉଛି ନବସୃଜନ
ନୂଆଦିଲ୍ଲୀ, ୩୧ ଜୁଲାଇ: ଦେଶର ତୃଣମୂଳ ସ୍ତରର ନବସୃଜନକୁ ଅଧିକ ଗତି ଦେବା ଦିଗରେ ରାଷ୍ଟ୍ରପତି ଶ୍ରୀମତୀ ଦ୍ରୌପଦୀ ମୁର୍ମୁ ଆଜି ରାଷ୍ଟ୍ରପତି ଭବନ ସାଂସ୍କୃତିକ କେନ୍ଦ୍ରରେ ଅଟଳ ଇନୋଭେସନ୍ ମିଶନ (AIM)ର ଗ୍ରାସରୁଟ୍ ଇନୋଭେଟରମାନଙ୍କ ସହ ମତବିନିମୟ କରିଛନ୍ତି। ଏହି ଅବସରରେ ସେ ଇନୋଭେଟରମାନଙ୍କ ଦ୍ୱାରା ପ୍ରଦର୍ଶିତ ବିଭିନ୍ନ ଅଭିନବ ଉଦ୍ଭାବନର ପ୍ରଦର୍ଶନୀ ପରିଦର୍ଶନ କରି ସେମାନଙ୍କ କାର୍ଯ୍ୟର ପ୍ରଶଂସା କରିଥିଲେ।
ରାଷ୍ଟ୍ରପତି କହିଥିଲେ ଯେ, ଭାରତର ବିଶାଳ ପ୍ରତିଭା ଓ ନବସୃଜନର ମନୋଭାବ ଦେଶକୁ ବିଶ୍ୱରେ ଗ୍ରାସରୁଟ୍ ଇନୋଭେସନ୍ର ଏକ ପ୍ରମୁଖ କେନ୍ଦ୍ରରେ ପରିଣତ କରିପାରିବ। ସ୍ଥାନୀୟ ଅଭିଜ୍ଞତା, ବୈଜ୍ଞାନିକ ଚିନ୍ତାଧାରା ଓ ସାମାଜିକ ଦାୟିତ୍ୱବୋଧର ସମନ୍ୱୟରେ ହେଉଥିବା ଏହି ଉଦ୍ଭାବନ ସମାଜର ବାସ୍ତବ ଆବଶ୍ୟକତା ପୂରଣ କରୁଛି।
ସେ କହିଥିଲେ ଯେ, ବର୍ଜ୍ୟବସ୍ତୁକୁ ସମ୍ପଦରେ ପରିଣତ କରିବା, ଶକ୍ତି ସଂରକ୍ଷଣ, ମହିଳା ଓ ଦିବ୍ୟାଙ୍ଗଙ୍କ ସୁବିଧା ବୃଦ୍ଧି, ପରିବେଶ ସୁରକ୍ଷା, କୃଷି ଓ କଳାର ସଂରକ୍ଷଣ ଭଳି କ୍ଷେତ୍ରରେ ଦେଶର ବିଭିନ୍ନ ପ୍ରାନ୍ତର ନବସୃଜନକାରୀମାନେ ଉଲ୍ଲେଖନୀୟ କାମ କରୁଛନ୍ତି।
ରାଷ୍ଟ୍ରପତି ମୁର୍ମୁ କହିଥିଲେ ଯେ, କେବଳ ଭଲ ଧାରଣା ଥିଲେ ସମାଜରେ ପରିବର୍ତ୍ତନ ଆସେନାହିଁ। ଏଥିପାଇଁ ଆବଶ୍ୟକ ସଠିକ୍ ମାର୍ଗଦର୍ଶନ, ପ୍ରଯୁକ୍ତିଗତ ସହଯୋଗ ଓ ଉପଯୁକ୍ତ ମଞ୍ଚ। ଅଟଳ କମ୍ୟୁନିଟି ଇନୋଭେସନ୍ ସେଣ୍ଟରଗୁଡ଼ିକ ଏହି ଦିଗରେ ଗ୍ରାସରୁଟ୍ ଇନୋଭେଟରଙ୍କୁ ସହଯୋଗ କରି ସେମାନଙ୍କ ଧାରଣାକୁ ସଫଳ ଉଦ୍ୟମରେ ପରିଣତ କରିବାରେ ସାହାଯ୍ୟ କରୁଛି।
ସେ ଆହୁରି କହିଥିଲେ ଯେ, ପ୍ରତ୍ୟେକ ନାଗରିକ ସମସ୍ୟାର ସମାଧାନ ପାଇଁ ନବସୃଜନମୂଳକ ଚିନ୍ତାଧାରା ଅବଲମ୍ବନ କଲେ ହିଁ ‘ବିକଶିତ ଭାରତ’ର ସ୍ୱପ୍ନ ସାକାର ହେବ। ସୀମିତ ସମ୍ବଳ ଓ ବିଭିନ୍ନ ବାଧା ସତ୍ତ୍ୱେ ନିଜ ଉଦ୍ଭାବନକୁ ଜାରି ରଖିଥିବା ଇନୋଭେଟରମାନଙ୍କ ଦୃଢ଼ ଇଚ୍ଛାଶକ୍ତିକୁ ସେ ପ୍ରଶଂସା କରିଥିଲେ। ସେମାନଙ୍କୁ ଗବେଷଣା ସଂସ୍ଥା, ଶିଳ୍ପ କ୍ଷେତ୍ର ଓ ଅନ୍ୟ ନବସୃଜନକାରୀଙ୍କ ସହ ସହଯୋଗ ବଢ଼ାଇ ନିଜ ଉଦ୍ଭାବନକୁ ଅଧିକ ବ୍ୟାପକ ସ୍ତରରେ ପହଞ୍ଚାଇବାକୁ ପରାମର୍ଶ ଦେଇଥିଲେ।
