ମତ୍ସ୍ୟ କ୍ଷେତ୍ରକୁ ୨୦,୭୫୦ କୋଟିର ବଡ଼ ସହାୟତା: ସମୁଦ୍ରଜାତ ଉତ୍ପାଦ ରପ୍ତାନି ୮.୪୬ ବିଲିୟନ ଡଲାର
ନୂଆଦିଲ୍ଲୀ: ଦେଶର ମତ୍ସ୍ୟ ଓ ଜଳଚାଷ କ୍ଷେତ୍ରକୁ ଅଧିକ ସୁଦୃଢ଼ କରିବା ସହ ମତ୍ସ୍ୟଜୀବୀ ଓ ଉଦ୍ୟୋଗୀଙ୍କ ଆୟ ବୃଦ୍ଧି ଉପରେ କେନ୍ଦ୍ର ସରକାର ଗୁରୁତ୍ୱ ଦେଉଛନ୍ତି। ଏଥିପାଇଁ ପ୍ରଧାନମନ୍ତ୍ରୀ ମତ୍ସ୍ୟ ସମ୍ପଦ ଯୋଜନା (PMMSY) ଅଧୀନରେ ୨୦,୭୫୦ କୋଟି ଟଙ୍କାର ବ୍ୟାପକ ପରିବ୍ୟୟ ରଖାଯାଇଛି।
ମତ୍ସ୍ୟ ବନ୍ଦର, ମାଛ ଅବତରଣ କେନ୍ଦ୍ର, ଶୀତଳ ଭଣ୍ଡାର, ବରଫ କାରଖାନା, ମାଛ ବଜାର, ହ୍ୟାଚେରୀ ଓ ବ୍ରିଡିଂ ବ୍ୟାଙ୍କ ଭଳି ଭିତ୍ତିଭୂମି ବିକାଶକୁ ଯୋଜନାରେ ପ୍ରାଥମିକତା ଦିଆଯାଉଛି। ଏହା ସହିତ ମତ୍ସ୍ୟ ଓ ଜଳଚାଷ ଭିତ୍ତିଭୂମି ବିକାଶ ପାଇଁ FIDF ମାଧ୍ୟମରେ ମଧ୍ୟ ରିଆତି ଋଣ ସୁବିଧା ଯୋଗାଇ ଦିଆଯାଉଛି।
ହଜାର ହଜାର ଭିତ୍ତିଭୂମି ପ୍ରକଳ୍ପକୁ ମଞ୍ଜୁରି
PMMSY ଓ FIDF ଅଧୀନରେ ୧୮୪ଟି ମତ୍ସ୍ୟ ବନ୍ଦର ଓ ଅବତରଣ କେନ୍ଦ୍ର, ୭୭୫ଟି ଶୀତଳ ଭଣ୍ଡାର ଓ ବରଫ ପ୍ଲାଣ୍ଟ, ୧,୩୯୪ଟି ଜୀବନ୍ତ ମାଛ ବିକ୍ରୟ ୟୁନିଟ୍ ଏବଂ ୬,୦୧୮ଟି ମାଛ କିଓସ୍କ ଭଳି ପ୍ରକଳ୍ପକୁ ଅନୁମୋଦନ ମିଳିଛି।
ମାଛ ପରିବହନ ବ୍ୟବସ୍ଥାକୁ ମଧ୍ୟ ବଳିଷ୍ଠ କରାଯାଉଛି। ଏହି କ୍ଷେତ୍ରରେ ୨୮,୪୮୯ଟି ପରିବହନ ୟୁନିଟ୍କୁ ଅନୁମୋଦନ ମିଳିଥିବାବେଳେ ଏଥିରେ ଆଇସ୍ ବକ୍ସ ସହିତ ମୋଟରସାଇକେଲ୍, ସାଇକେଲ୍, ଅଟୋ ରିକ୍ସା ଓ ରେଫ୍ରିଜରେଟେଡ୍ ଟ୍ରକ୍ ମଧ୍ୟ ସାମିଲ ଅଛି।
୧୨୮ରୁ ଅଧିକ ଦେଶକୁ ଭାରତୀୟ ସମୁଦ୍ରଜାତ ଉତ୍ପାଦ
ବିଶ୍ୱ ବଜାରରେ ଭାରତୀୟ ସମୁଦ୍ରଜାତ ଉତ୍ପାଦର ଚାହିଦା ମଧ୍ୟ ବଢ଼ିଛି। ୨୦୨୫-୨୬ ଆର୍ଥିକ ବର୍ଷରେ ଭାରତ ୧୯.୭୨ ଲକ୍ଷ ମେଟ୍ରିକ୍ ଟନ୍ ସମୁଦ୍ରଜାତ ଉତ୍ପାଦ ରପ୍ତାନି କରିଛି। ଏହାର ମୂଲ୍ୟ ପ୍ରାୟ ୭୩,୮୯୦ କୋଟି ଟଙ୍କା ବା ୮.୪୬ ବିଲିୟନ ଆମେରିକୀୟ ଡଲାର।
ଭାରତର ସମୁଦ୍ରଜାତ ରପ୍ତାନି ୧୨୮ରୁ ଅଧିକ ଦେଶରେ ପହଞ୍ଚୁଛି। ଆମେରିକା ଭାରତର ସବୁଠାରୁ ବଡ଼ ବଜାର ରହିଥିବାବେଳେ ଚୀନ୍, ୟୁରୋପୀୟ ସଂଘ, ଦକ୍ଷିଣ-ପୂର୍ବ ଏସିଆ, ଜାପାନ ଓ ମଧ୍ୟପ୍ରାଚ୍ୟ ମଧ୍ୟ ପ୍ରମୁଖ ବଜାର ଭାବେ ଉଭା ହୋଇଛନ୍ତି।
ମୂଲ୍ୟଯୁକ୍ତ ଉତ୍ପାଦ ଉପରେ ଫୋକସ୍
ସମୁଦ୍ରଜାତ ରପ୍ତାନିରେ ମୂଲ୍ୟଯୁକ୍ତ ଉତ୍ପାଦର ଅଂଶ ୨୦୧୩-୧୪ରେ ମାତ୍ର ୨ ପ୍ରତିଶତ ଥିବାବେଳେ ୨୦୨୪-୨୫ରେ ଏହା ୧୧ ପ୍ରତିଶତକୁ ବୃଦ୍ଧି ପାଇଛି। ନୂଆ ରପ୍ତାନି ବଜାର ଖୋଜିବା, ଆନ୍ତର୍ଜାତୀୟ ବାଣିଜ୍ୟ ମେଳା, କ୍ରେତା-ବିକ୍ରେତା ବୈଠକ ଓ ବାଣିଜ୍ୟ ପ୍ରତିନିଧିମଣ୍ଡଳ ମାଧ୍ୟମରେ ରପ୍ତାନି ବଢ଼ାଇବାକୁ ପଦକ୍ଷେପ ନିଆଯାଉଛି।
ଏହା ସହିତ ସିବାସ୍, କୋବିଆ, ପମ୍ପାନୋ, ମଡ୍ କ୍ରାବ୍, GIFT ତିଲାପିଆ, ଗ୍ରୁପର୍, ସ୍କାମ୍ପି ଓ ସାମୁଦ୍ରିକ ଶୈବାଳ ଭଳି ଉଚ୍ଚମୂଲ୍ୟ ପ୍ରଜାତିର ଚାଷକୁ ପ୍ରୋତ୍ସାହନ ଦିଆଯାଉଛି।
ପଶୁରୋଗ ନିୟନ୍ତ୍ରଣରେ ମଧ୍ୟ ସଫଳତା
ପଶୁପାଳନ କ୍ଷେତ୍ରରେ ମଧ୍ୟ କେନ୍ଦ୍ର ସରକାର ରୋଗ ନିୟନ୍ତ୍ରଣ ଓ ଟିକାକରଣକୁ ଗୁରୁତ୍ୱ ଦେଉଛନ୍ତି। FMD, ବ୍ରୁସେଲୋସିସ୍, PPR ଓ କ୍ଲାସିକାଲ୍ ସ୍ୱାଇନ୍ ଫିଭର୍ ବିରୋଧରେ ଟିକାକରଣ ପାଇଁ ରାଜ୍ୟଗୁଡ଼ିକୁ ୧୦୦% କେନ୍ଦ୍ରୀୟ ଆର୍ଥିକ ସହାୟତା ଦିଆଯାଉଛି।
ସରକାରୀ ତଥ୍ୟ ଅନୁସାରେ, ପଶୁରୋଗ ଆକ୍ରାନ୍ତ ଘଟଣା ୨୦୧୯ରେ ୧୩୨ରୁ ୨୦୨୫ରେ ୪୦କୁ ହ୍ରାସ ପାଇଛି। ଏହାକୁ ପଶୁ ସ୍ୱାସ୍ଥ୍ୟ କ୍ଷେତ୍ରରେ ଏକ ଉଲ୍ଲେଖନୀୟ ସଫଳତା ଭାବେ ଦେଖାଯାଉଛି।
ଲୋକସଭାରେ ପଚରାଯାଇଥିବା ପ୍ରଶ୍ନର ଉତ୍ତରରେ ମତ୍ସ୍ୟପାଳନ, ପଶୁପାଳନ ଓ ଦୁଗ୍ଧ ଉତ୍ପାଦନ ମନ୍ତ୍ରୀ ଶ୍ରୀ ରାଜୀବ ରଞ୍ଜନ ସିଂହ ଓରଫ୍ ଲଲନ ସିଂହ ଏହି ସୂଚନା ଦେଇଛନ୍ତି।
