ସ୍ୱଦେଶୀକୁ ଗୁରୁତ୍ୱ ଦିଅନ୍ତୁ, ଅନାବଶ୍ୟକ ସୁନା କିଣନ୍ତୁ ନାହିଁ: ମୋଦୀ

ସ୍ୱଦେଶୀକୁ ଗୁରୁତ୍ୱ ଦିଅନ୍ତୁ, ଅନାବଶ୍ୟକ ସୁନା କିଣନ୍ତୁ ନାହିଁ: ମୋଦୀ

ନୂଆଦିଲ୍ଲୀ: ବିଶ୍ୱରେ ଅସ୍ଥିରତା, ଯୁଦ୍ଧ ସଙ୍କଟ ଓ ଆନ୍ତର୍ଜାତୀୟ ଯୋଗାଣ ଶୃଙ୍ଖଳାରେ ବାଧା ସତ୍ତ୍ୱେ ଭାରତୀୟ ଅର୍ଥନୀତି ଦୃଢ଼ ଭାବେ ଆଗକୁ ବଢ଼ୁଛି। ଚଳିତ ବର୍ଷର ପ୍ରଥମ ତ୍ରୈମାସିକରେ ୭.୮ ପ୍ରତିଶତ ଆର୍ଥିକ ଅଭିବୃଦ୍ଧିକୁ ଭାରତର ଅର୍ଥନୈତିକ ଶକ୍ତିର ପ୍ରମୁଖ ଉଦାହରଣ ବୋଲି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ।

ଉଜବେକିସ୍ତାନ ଓ କିର୍ଗିଜସ୍ତାନ ଗସ୍ତ ସମୟରେ ବିଶକେକ୍‌ରେ ଅନୁଷ୍ଠିତ ସାଂଘାଇ ସହଯୋଗ ସଂଗଠନ ସମ୍ମିଳନୀ ଅବସରରେ ଜାରି କରିଥିବା ଏକ ଭିଡିଓ ବାର୍ତ୍ତାରେ ମୋଦୀ ଦେଶବାସୀଙ୍କୁ ଅଧିକରୁ ଅଧିକ ସ୍ୱଦେଶୀ ସାମଗ୍ରୀ ଓ ସେବା ବ୍ୟବହାର କରିବାକୁ ଆହ୍ୱାନ ଦେଇଛନ୍ତି।

ମୋଦୀ କହିଛନ୍ତି, ବିଶ୍ୱ ୨୦୨୦ର କୋରୋନା ମହାମାରୀଠାରୁ ଆଜି ପର୍ଯ୍ୟନ୍ତ ଅନେକ ସଙ୍କଟ ଦେଇ ଗତି କରୁଛି। ବିଭିନ୍ନ ସ୍ଥାନରେ ଯୁଦ୍ଧ ଓ ଅସ୍ଥିରତା ଜାରି ରହିଛି। ଏଭଳି ପ୍ରତିକୂଳ ପରିସ୍ଥିତି ମଧ୍ୟରେ ଭାରତ ଦ୍ରୁତ ଗତିରେ ଆଗକୁ ବଢ଼ୁଛି। ଏହା ପଛରେ ଦେଶବାସୀଙ୍କ ଦୃଢ଼ ସଂକଳ୍ପ, କଠିନ ପରିଶ୍ରମ, ସ୍ପଷ୍ଟ ଲକ୍ଷ୍ୟ ଓ ଉପଯୁକ୍ତ ନୀତି ରହିଛି ବୋଲି ସେ କହିଛନ୍ତି।

ଏହି ଅବସରରେ ପ୍ରଧାନମନ୍ତ୍ରୀ ଦେଶବାସୀଙ୍କୁ କିଛି ଆର୍ଥିକ ସଂଯମ ଅବଲମ୍ବନ କରିବାକୁ ପରାମର୍ଶ ଦେଇଛନ୍ତି। ଅପରିହାର୍ଯ୍ୟ ନହେଲେ ସୁନା କିଣିବାରୁ ବିରତ ରହିବା ସହ ବିଦେଶ ଭ୍ରମଣ ଏବଂ ବିଦେଶରେ ବିବାହ ଉତ୍ସବ ଆୟୋଜନ ନକରିବାକୁ ସେ ଆହ୍ୱାନ ଦେଇଛନ୍ତି।

ବିଦେଶ ଭ୍ରମଣ ବଦଳରେ ଦେଶର ବିଭିନ୍ନ ପର୍ଯ୍ୟଟନସ୍ଥଳୀ ବୁଲିବା ଏବଂ ବିଦେଶରେ ବିବାହ କରିବା ପରିବର୍ତ୍ତେ ଭାରତରେ ବିବାହ ଆୟୋଜନ କରିବାକୁ ମୋଦୀ ପରାମର୍ଶ ଦେଇଛନ୍ତି। ଏହାଦ୍ୱାରା ଦେଶର ଅର୍ଥନୀତିକୁ ଲାଭ ମିଳିବା ସହ ଦେଶ ମଧ୍ୟରେ ରୋଜଗାର ଓ ବ୍ୟବସାୟର ସୁଯୋଗ ବଢ଼ିବ ବୋଲି ସେ କହିଛନ୍ତି।

ସେହିପରି ଅନାବଶ୍ୟକ ସୁନା କ୍ରୟରୁ ଦୂରେଇ ରହିଲେ ବିଦେଶୀ ମୁଦ୍ରା ଉପରେ ଚାପ କମିବ ଏବଂ ଭାରତ ବିଶ୍ୱ ଅର୍ଥନୈତିକ ଝଟକାକୁ ଅଧିକ ଦୃଢ଼ତାର ସହ ସାମ୍ନା କରିପାରିବ ବୋଲି ପ୍ରଧାନମନ୍ତ୍ରୀ ମତ ଦେଇଛନ୍ତି।

ମୋଦୀ କହିଛନ୍ତି ଯେ ଦେଶର ଲୋକମାନେ ଯେତେ ଅଧିକ ସ୍ୱଦେଶୀ ସାମଗ୍ରୀ ଓ ସେବା ବ୍ୟବହାର କରିବେ, ଭାରତ ସେତେ ଅଧିକ ଆତ୍ମନିର୍ଭର ହେବ। ସ୍ୱଦେଶୀକୁ ପ୍ରାଥମିକତା ଦେବା ଦ୍ୱାରା ଦେଶର ଉତ୍ପାଦନ, ବ୍ୟବସାୟ ଓ ରୋଜଗାର ବୃଦ୍ଧି ପାଇବ।

୨୦୪୭ରେ ଭାରତ ସ୍ୱାଧୀନତାର ୧୦୦ ବର୍ଷ ପୂରଣ କରିବାବେଳେ ଏକ ସମ୍ପୂର୍ଣ୍ଣ ବିକଶିତ ଭାରତ ଆଗାମୀ ପିଢ଼ିକୁ ହସ୍ତାନ୍ତର କରିବାର ଲକ୍ଷ୍ୟ ରହିଛି ବୋଲି ମୋଦୀ କହିଛନ୍ତି। ଏଥିପାଇଁ ପ୍ରତ୍ୟେକ ଭାରତୀୟ ସ୍ୱଦେଶୀ ଉତ୍ପାଦକୁ ପ୍ରାଥମିକତା ଦେଇ ଦେଶର ବିକାଶ ଯାତ୍ରାରେ ସାମିଲ ହେବାକୁ ସେ ଆହ୍ୱାନ ଦେଇଛନ୍ତି।