କେନ୍ଦ୍ରୀୟ କର୍ମଚାରୀଙ୍କ ଦରମା ବଢ଼ିବ? ୮ମ ବେତନ ଆୟୋଗରେ ଜୋରଦାର ଆଲୋଚନା, ଫିଟମେଣ୍ଟ ଫ୍ୟାକ୍ଟର ଉପରେ ନଜର
ନୂଆଦିଲ୍ଲୀ, ୮/୯: କେନ୍ଦ୍ରୀୟ ସରକାରୀ କର୍ମଚାରୀ ଓ ପେନସନ୍ଭୋଗୀଙ୍କ ମଧ୍ୟରେ ୮ମ ବେତନ ଆୟୋଗକୁ ନେଇ ଆଶା ବଢ଼ିବାରେ ଲାଗିଛି। ଦରମା ସଂଶୋଧନ ସହ ପେନସନ୍, ଭତ୍ତା ଓ କର୍ମଚାରୀଙ୍କ କାର୍ଯ୍ୟ ପରିବେଶ ସମ୍ପର୍କରେ ଆୟୋଗ ବିଭିନ୍ନ ପକ୍ଷଙ୍କ ମତାମତ ସଂଗ୍ରହ କରୁଛି।
ସେପ୍ଟେମ୍ବର ୭ ଓ ୮ ତାରିଖରେ ଚେନ୍ନାଇରେ କର୍ମଚାରୀ ସଂଗଠନ, ୟୁନିଅନ୍ ଏବଂ ଅନ୍ୟ ହିତଧାରୀଙ୍କ ସହ ଆୟୋଗ ଆଲୋଚନା କରୁଛି। ଆଗାମୀ ଦିନରେ ପୁଡୁଚେରୀ, ଚଣ୍ଡିଗଡ଼ ଓ ବେଙ୍ଗାଲୁରୁରେ ମଧ୍ୟ ଏଭଳି ଆଲୋଚନା କରାଯିବ।
ଫିଟମେଣ୍ଟ ଫ୍ୟାକ୍ଟରକୁ ନେଇ ଚର୍ଚ୍ଚା
୮ମ ବେତନ ଆୟୋଗରେ ସବୁଠାରୁ ଚର୍ଚ୍ଚିତ ବିଷୟ ମଧ୍ୟରୁ ଫିଟମେଣ୍ଟ ଫ୍ୟାକ୍ଟର ଅନ୍ୟତମ। ନୂଆ ବେସିକ୍ ପେ ନିର୍ଦ୍ଧାରଣରେ ଏହାର ଗୁରୁତ୍ୱ ରହିଥାଏ। ସୋସିଆଲ ମିଡିଆ ଓ ବିଭିନ୍ନ ମହଲରେ ୨.୧୫, ୨.୨୮ ଏବଂ ୨.୫୭ ଭଳି ଫିଟମେଣ୍ଟ ଫ୍ୟାକ୍ଟରକୁ ନେଇ ଆଲୋଚନା ହେଉଛି।
ତେବେ ଏପର୍ଯ୍ୟନ୍ତ କୌଣସି ଫିଟମେଣ୍ଟ ଫ୍ୟାକ୍ଟର ଉପରେ ସରକାର କିମ୍ବା ୮ମ ବେତନ ଆୟୋଗ ପକ୍ଷରୁ ଅନ୍ତିମ ଘୋଷଣା ହୋଇନାହିଁ। ଷଷ୍ଠ ବେତନ ଆୟୋଗରେ ଫିଟମେଣ୍ଟ ଫ୍ୟାକ୍ଟର ୧.୮୬ ଥିବାବେଳେ ସପ୍ତମ ବେତନ ଆୟୋଗରେ ଏହା ୨.୫୭ ଥିଲା।
ପେନସନ୍ଭୋଗୀଙ୍କ ପାଇଁ ମଧ୍ୟ ଗୁରୁତ୍ୱପୂର୍ଣ୍ଣ
ଅବସରପ୍ରାପ୍ତ କର୍ମଚାରୀଙ୍କ ପେନସନ୍ ସଂଶୋଧନ ଓ ଭତ୍ତା ବୃଦ୍ଧି ନେଇ ମଧ୍ୟ ଆୟୋଗ ବିଭିନ୍ନ ପକ୍ଷଙ୍କ ମତାମତ ନେଉଛି। ତେବେ ଦରମା କିମ୍ବା ପେନସନ୍ରେ ପ୍ରକୃତରେ କେତେ ବୃଦ୍ଧି ହେବ, ତାହା ଏବେଠାରୁ କହିବା ସମ୍ଭବ ନୁହେଁ।
ଆୟୋଗ ନିଜର ସୁପାରିସ୍ ଦାଖଲ କରିବା ପରେ ଏହା ଉପରେ କେନ୍ଦ୍ର ସରକାର ଅନ୍ତିମ ନିଷ୍ପତ୍ତି ନେବେ।
ଆଗକୁ ଆହୁରି ଆଲୋଚନା
ଚେନ୍ନାଇ ପରେ ସେପ୍ଟେମ୍ବର ୯ରେ ପୁଡୁଚେରୀରେ ଆଲୋଚନା ହେବ। ଏହାପରେ ସେପ୍ଟେମ୍ବର ୧୬ରୁ ୧୮ ଯାଏଁ ଚଣ୍ଡିଗଡ଼ ଏବଂ ଅକ୍ଟୋବର ୭ରୁ ୮ ଯାଏଁ ବେଙ୍ଗାଲୁରୁରେ ଆଲୋଚନା କାର୍ଯ୍ୟକ୍ରମ ରହିଛି।
ସୂଚନାଯୋଗ୍ୟ, କେନ୍ଦ୍ର ସରକାର ୩ ନଭେମ୍ବର ୨୦୨୫ରେ ୮ମ କେନ୍ଦ୍ରୀୟ ବେତନ ଆୟୋଗ ଗଠନ କରିଥିଲେ। ଆୟୋଗକୁ ଅନ୍ତିମ ରିପୋର୍ଟ ଦାଖଲ ପାଇଁ ୧୮ ମାସର ସମୟ ଦିଆଯାଇଛି। ତେଣୁ ଏବେ କର୍ମଚାରୀ ଓ ପେନସନ୍ଭୋଗୀଙ୍କ ନଜର ରହିଛି ଆୟୋଗର ସୁପାରିସ୍ ଓ ପରବର୍ତ୍ତୀ ସରକାରୀ ନିଷ୍ପତ୍ତି ଉପରେ।
