ବିଜ୍ଞାନ ଶିକ୍ଷୟିତ୍ରୀ ତଥା ପ୍ରଧାନଶିକ୍ଷିକା ସଂଯୁକ୍ତାରାଣୀ ନାୟକଙ୍କୁ ରାଜ୍ୟ ଶିକ୍ଷକ ସମ୍ମାନ ପ୍ରଦାନ
ଢେଙ୍କାନାଳ : ତା.୦୪.୦୪.୨୦୨୩ ରିଖ :କାମାକ୍ଷାନଗରର ଜଣାଶୁଣା ବିଜ୍ଞାନ ଶିକ୍ଷୟିତ୍ରୀ ତଥା ପ୍ରଧାନଶିକ୍ଷିକା ଶ୍ରୀମତୀ ସଞ୍ଜୁକ୍ତାରାଣୀ ନାୟକଙ୍କୁ ରାଜ୍ୟ ଶିକ୍ଷକ ସମ୍ମାନ ପ୍ରଦାନ କରାଯାଇଛି । ଢେଙ୍କାନାଳ ଠାରେ ସ୍ବତନ୍ତ୍ର ଉତ୍ସବରେ ଜିଲ୍ଲା ପରିଷଦ ଚେୟାରମ୍ୟାନ ଅର୍ଚ୍ଚନା ପୁହାଣ ,ଜିଲ୍ଲାପାଳ ସରୋଜ କୁମାର ସେଠୀ ପ୍ରମୁଖ ଏହି ସମ୍ମାନଜନକ ସମ୍ମାନ ପ୍ରଦାନ କରିଛନ୍ତି । ପୁରସ୍କାର ସ୍ବରୂପ ରାଜ୍ୟ ଗଣଶିକ୍ଷା ବିଭାଗ ପକ୍ଷରୁ କୃତୀ ଶିକ୍ଷକ ଭାବରେ ଏକ ମାନପତ୍ର, ୨୫ ହଜାର ଟଙ୍କାର ଚେକ୍, ଉତ୍ତରୀୟ ସହ ପୁଷ୍ପଗୁଚ୍ଛ ପ୍ରଦାନ କରାଯାଇଥିଲା । ଶ୍ରୀମତୀ ସଂଯୁକ୍ତରାଣୀ ନାୟକ କାମାକ୍ଷାନଗର ଅଞ୍ଚଳରେ ସୁଦକ୍ଷା ବିଜ୍ଞାନ ଶିକ୍ଷୟିତ୍ରୀ ଭାବେ ବେଶ୍ ଜଣାଶୁଣା । ୨୦୧୭ ମସିହା ପାଇଁ ଶିକ୍ଷା କ୍ଷେତ୍ରରେ ବିଶେଷ ଅବଦାନ ପାଇଁ ଜିଲ୍ଲାରୁ ହାଇସ୍କୁଲ ସ୍ତରରୁ ଏକମାତ୍ର ଶିକ୍ଷୟିତ୍ରୀ ଭାବେ ସେ ଏହି ସମ୍ମାନ ପାଇଁ ଚୟନ ହୋଇଥିଲେ । ଅବସର ପରେ ରାଜ୍ୟ ସମ୍ମାନ ଗ୍ରହଣ କରି ମଞ୍ଚରେ ସେ ବେଶ୍ ଭାବୁକ ହୋଇପଡିଥିଲେ । ଢେଙ୍କାନାଳ ଜିଲ୍ଲାର ଭଏରପୁର ଗାଁର ମୁରଲିଧର ନାୟକ ଏବଂ ଅମୂଲ୍ୟପ୍ରଭା ନାୟକଙ୍କ ଝିଅ ସଂଯୁକ୍ତାରାଣୀ ନାୟକ । ତାଙ୍କ ଶିକ୍ଷୟିତ୍ରୀ ଜୀବନ ପ୍ରାୟ ୩୫ ବର୍ଷ ଧରି ଜାରିରହିଥିଲା । ସେଥିରୁ ୪ ବର୍ଷ ଜିରାଳ ହାଇସ୍କୁଲରେ, ଦୀର୍ଘ ୨୨ ବର୍ଷ ଧରି ଆଳତୁମା ହାଇସ୍କୁଲରେ ବିଜ୍ଞାନ ଶିକ୍ଷୟିତ୍ରୀ ରୂପେ ଶିକ୍ଷାଦାନ କରିବା ପରେ ଚାକିରୀର ଶେଷ ଭାଗରେ ୨୦୧୩ ମସିହାରୁ ସେଠାରୁ ସ୍ଥାନାନ୍ତର ହୋଇ କାମାକ୍ଷାନଗର ବାଳିକା ହାଇସ୍କୁଲରେ ଦୀର୍ଘ ୧୦ ବର୍ଷ ପ୍ରଧାନଶିକ୍ଷିକା ଭାବେ ଅବସ୍ଥାପିତ ହୋଇଥିଲେ ଓ ୨୦୨୨ ମସିହା ସେପ୍ଟେମ୍ବର ୩୦ ରେ ଅବସର ନେଇଥିଲେ । ଶିକ୍ଷକତା ଜୀବନରେ ବିଜ୍ଞାନ ପ୍ରକଳ୍ପ ପ୍ରତିଯୋଗିତାରେ ତାଙ୍କର ମାର୍ଗଦର୍ଶନରେ ଛାତ୍ରଛାତ୍ରୀମାନେ ବହୁବାର ଜାତୀୟ ସ୍ତରରେ ଓ ରାଜ୍ୟ ସ୍ତରୀୟ ସମ୍ମାନ ହାସଲ କରି ଗୌରବ ଅର୍ଜ୍ଜନ କରିଥିଲେ । ୨୦୧୩ରେ ଜାତୀୟ ସ୍ତରରେ ତାଙ୍କର ପ୍ରକଳ୍ପ “କନଜରଭେସନ ଅଫ୍ ଏନର୍ଜି ” ସମ୍ମାନୀତ ଓ ଉଚ୍ଚ ପ୍ରଶଂସିତ ହୋଇଥିଲା । ଶିକ୍ଷକତା ଚାଲିଥିବା ସମୟରେ ଏହି ସମ୍ମାନ ମିଳିପାରିଥିଲେ, ଅଧିକ ଖୁସି ଉପଲବ୍ଧ ହୋଇଥାନ୍ତା ବୋଲି ମତ ରଖିଛନ୍ତି ଅବସରପ୍ରାପ୍ତ ପ୍ରଧାନ ଶିକ୍ଷୟିତ୍ରୀ ସଂଯୁକ୍ତାରାଣୀ ନାୟକ । ରାଜ୍ୟ ଶିକ୍ଷକ ସମ୍ମାନ ମିଳିବା ପରେ ଶାଶୁଘର ବାଟଗାଁ, ବର୍ତ୍ତମାନର ବାସସ୍ଥାନ କାମାକ୍ଷାନଗର ଅନନ୍ତପୁର ତଥା ଜନ୍ମମାଟି ଢେଙ୍କାନାଳ ଭଏରପୁର ଗାଁରେ ଖୁସିର ଲହର ଖେଳି ଯାଇଛି। ରାଜ୍ୟ ସମ୍ମାନ ବିଜୟିନୀ ସଂଯୁକ୍ତାରାଣୀଙ୍କୁ ସମସ୍ତେ ଶୁଭେଚ୍ଛା ଓ ଶୁଭକାମନା ଜଣାଉଛନ୍ତି । ୩୫ ବର୍ଷ ଧରି ଶିକ୍ଷାଦାନରେ କରିଥିବା ଶ୍ରମର ଏହା ଫଳ ବୋଲି କହିଛନ୍ତି, ରାଜ୍ୟ ଶିକ୍ଷକ ସମ୍ମାନ ବିଜୟୀ ସଂଯୁକ୍ତାରାଣୀ ନାୟକଙ୍କ ସ୍ବାମୀ ଆଡଭୋକେଟ୍ ଦିଲ୍ଲୀପ ବରାଳ । ଏହି ଅବସରରେ ଶତାୟୁ, ବ୍ରଜନାଥ ବଡ଼ଜେନା ସରକାରୀ ଉଚ୍ଚ ବିଦ୍ୟାଳୟର ଜଣେ ପ୍ରାକ୍ତନ ଛାତ୍ରୀ ହିସାବରେ ରାଜ୍ୟ ଶିକ୍ଷକ ସମ୍ମାନ ପ୍ରାପ୍ତ ହୋଇଥିବା ସଂଯୁକ୍ତା ରାଣୀଙ୍କୁ ବିଦ୍ୟାଳୟର ଗର୍ବ ଓ ଗୌରବ ବୃଦ୍ଧି କରିଥିବାରୁ ବିଦ୍ୟାଳୟର ବରିଷ୍ଠ ବିଜ୍ଞାନଶିକ୍ଷକ ତଥା ଶିଶୁ ବିଜ୍ଞାନ କଂଗ୍ରେସର ରାଜ୍ୟ ପୁରସ୍କାର ପ୍ରାପ୍ତ ଢେଙ୍କାନାଳ ଜିଲ୍ଲା ସଂଯୋଜକ ଡ଼ା. ଦେବୀ ପ୍ରସାଦ ମିଶ୍ର,ପ୍ରଧାନ ଶିକ୍ଷକ ଇତିଶ କୁମାର ବରାଳ, ଡ଼ା. ଓମ୍ ପ୍ରକାଶ ବରାଳଙ୍କ ସମେତ ଅନେକ ପ୍ରାକ୍ତନ ଛାତ୍ରୀ-ଛାତ୍ର , ପ୍ରଧାନ ଶିକ୍ଷିକା- ଶିକ୍ଷକ ଓ ଶିକ୍ଷୟିତ୍ରୀ- ଶିକ୍ଷକ ବଧେଇ ଜଣାଇଛନ୍ତି।
ଡ଼ା. ଦେବୀ ପ୍ରସାଦ ମିଶ୍ର
ବରିଷ୍ଠ ସହକାରୀ ଶିକ୍ଷକ,
ଶତାୟୁ,ବ୍ରଜନାଥ ବଡ଼ଜେନା ଉଚ୍ଚ ବିଦ୍ୟାଳୟ,
ଢେଙ୍କାନାଳ ତଥା ରାଜ୍ୟ ପୁରସ୍କାପ୍ରାପ୍ତ ଶିଶୁ ବିଜ୍ଞାନ କଂଗ୍ରେସର ଢେଙ୍କାନାଳ ଜିଲ୍ଲା ସଂଯୋଜକ।
ଟେଲିଫୋନ :୦୬୭୬୨ -୨୨୪୪୨୭(କାର୍ଯ୍ୟାଳୟ)
ଇ-ମେଲ: dklbbhs@gmail.com
debisirscience@gmail.com
ଦୂରଭାଷ :୯୪୩୭୧୦୬୫୬୯;୯୪୩୮୬୬୫୧୬୯
