ମହାନ ଜନନାୟକ ନବକୃଷ୍ଣ ଚୌଧୁରୀଙ୍କ ଜିଲ୍ଲା ସ୍ତରୀୟ 124 ତମ ଜୟନ୍ତୀ ପାଳିତ ,ମୁଖ୍ୟମନ୍ତ୍ରୀ ଭାବେ ଅନନ୍ୟ ଥିଲେ ନବକୃଷ୍ଣ
.ଅନୁଗୁଳ,ତା 23/11: ବାଜି ରାଉତ ଛାତ୍ରାବାସ, ଉତ୍କଳ ନବଜୀବନ ମଣ୍ଡଳ ଓ ଅନୁଗୁଳ ଜିଲ୍ଲା ପ୍ରଶାସନର ମିଳିତ ଆନୁକୂଲ୍ୟରେ ବିଶିଷ୍ଟ ସ୍ବାଧୀନତା ସଂଗ୍ରାମୀ ତଥା ମହାନ ଜନନାୟକ ନବକୃଷ୍ଣ ଚୌଧୁରୀଙ୍କ 124ତମ ଜୟନ୍ତୀ ଉତ୍ସବ ବାଜିରାଉତ ଛାତ୍ରାବାସ ଠାରେ ପାଳିତ ହୋଇଯାଇଛି . ଅନୁଗୁଳ ଜିଲ୍ଲାପାଳ ଅବଦାଲ ଏମ ଅଖତାର ଏହି ଉତ୍ସବରେ ମୁଖ୍ୟ ଅତିଥି ଭାବରେ ଯୋଗଦେଇ ସ୍ମୃତିପୀଠରେ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ। ଛାତ୍ରାବାସର ଉପସଭାନେତ୍ରୀ ଡ଼ ଇନ୍ଦିରା ଦାଶଙ୍କ ଅଧ୍ୟକ୍ଷତାରେ ଆୟୋଜିତ ଏହି ଉତ୍ସବରେ ଉଦଘାଟକ ଭାବରେ ଯୋଗ ଦେଇ ଓଡ଼ିଶାର ବିଶିଷ୍ଟ ସାହିତ୍ୟିକ ତଥା କଳା ବିକାଶ କେନ୍ଦ୍ରର ସଭାପତି ଡ଼ ବିଜୟାନନ୍ଦ ସିଂହ କହିଲେ ଯେ, ଓଡ଼ିଆ ଜନମାନସରେ ଆଜିବି ବଂଚି ରହିଛନ୍ତି ନବକୃଷ୍ଣ । ଯେ ଅନ୍ୟର ଦୁଃଖରେ ଦୁଃଖୀ ଓ ସୁଖରେ ସୁଖୀ ହୁଏ, ସେ ହିଁ ମଣିଷ ଭାବରେ ଗଣା ହୁଏ. ନବକୃଷ୍ଣ ବାସ୍ତବରେ ସେହିଭଳି ଜଣେ ମଣିଷ ଥିଲେ . ରାଜ୍ୟରେ ଅନେକ ମୁଖ୍ୟମନ୍ତ୍ରୀ ଥିଲେ ଓ ଅଛନ୍ତି . ହେଲେ ନିଜ ଜାତିର ମଙ୍ଗଳ ନିମନ୍ତେ ସ୍ବାଧୀନତା ପୂର୍ବରୁ ଚାରିଥର ଓ ସ୍ବାଧୀନତା ପରେ ଥରେ କାରାବରଣ କରିଥିବା ନବକୃଷ୍ଣ ବାସ୍ତବରେ ଅନନ୍ୟ . ଓଡ଼ିଶାରେ ଓଡ଼ିଆ ଭାଷାର ଶାସନ ପାଇଁ ସେ ଆମ ସମାଜରେ ସବୁଦିନ ବଞ୍ଚିରହିଥିବେ ବୋଲି ସେ ତାଙ୍କ ବକ୍ତବ୍ୟରେ କହିଥିଲେ ।
ଅନୁଗୁଳ ଜିଲ୍ଲାପାଳ ଅବଦାଲ ଏମ ଅଖତାର ଏହି ଉତ୍ସବରେ ମୁଖ୍ୟ ଅତିଥି ଭାବରେ ଯୋଗଦେଇ କହିଲେ ଯେ, ବାସ୍ତବରେ ନବବାବୁ ଜଣେ ମାନବତାବାଦୀ ଓ ଗାନ୍ଧିବାଦୀ ହିଁ ଥିଲେ . ଆଜି ସମଗ୍ର ବିଶ୍ୱ ଉପଭୋକ୍ତାବାଦର କବଳିତ ହୋଇପଡିଥିବା ବେଳେ ନବକୃଷ୍ଣଙ୍କ ସମଗ୍ର ଜୀବନ ତ୍ୟାଗ ଓ ବଳିଦାନର ଥିଲା . ମୁଖ୍ୟମନ୍ତ୍ରୀ ଭାବରେ ସ୍ୱଳ୍ପ କାଳର ଅବଧି ମଧ୍ୟରେ ଗାନ୍ଧୀଙ୍କ ଗ୍ରାମ ସ୍ଵରାଜ୍ୟ ଢାଞ୍ଚାରେ ଵିକେନ୍ଦ୍ରୀକରଣ ଲକ୍ଷରେ ଅଂଚଳ ଶାସନ ଆଇନ ପ୍ରଣୟନ ତାଙ୍କର ଦୂରାଭିମୁଖୀ ଲକ୍ଷକୁ ପରିଚିତ କରାଇଥାଏ . ଜିଲ୍ଲାପାଳ ଆହୁରି ମଧ୍ୟ କହିଲେ ଯେ, ଛାତ୍ରାବାସର ମୂଳ ଚରିତ୍ରକୁ ନବଦଳାଇ ଏହାର ସର୍ବାଙ୍ଗୀନ ଉନ୍ନତି ନିମନ୍ତେ ଯୋଜନା ପ୍ରସ୍ତୁତ କରାଯାଇଛି . ଏହା ଗାନ୍ଧୀଙ୍କ ସେବାଗ୍ରାମ କି ସାବରମତୀ ବା ଟଲଷ୍ଟୟ ଫାର୍ମ ଭଳି ଏକ ଜୀବନ୍ତ ଆଶ୍ରମ ଅଟେ . ମୁଖ୍ୟବକ୍ତା ଭାବରେ ଯୋଗଦେଇ ଫକୀର ମୋହନ ବିଶ୍ୱବିଦ୍ୟାଳୟର ପ୍ରାକ୍ତନ କୁଳପତି ପ୍ରଫେସର କୁମରବର ଦାସ କହିଲେ ଯେ, ଗୁଣରୁ ରୂପ ତିଆରି ହୁଏ, ନବକୃଷ୍ଣ ହେଉଛନ୍ତି ଏହାର ବଳିଷ୍ଠ ଉଦାହରଣ .
ବିଶିଷ୍ଟ ଗାନ୍ଧୀବାଦୀ ଚିନ୍ତକ ଡାକ୍ତର ବିଶ୍ୱଜିତ ଏହି ଉତ୍ସବରେ ସ୍ୱାଗତ ଭାଷଣ ପ୍ରଦାନ କରିଥିବା ବେଳେ ଛାତ୍ରାବାସର ସମ୍ପାଦକ ଇଂ ଧନେଶ୍ୱର ସାହୁ ସ୍ୱାଗତ ଭାଷଣ ପ୍ରଦାନ କରିଥିଲେ . ନବକୃଷ୍ଣ ଚୌଧୁରୀ ଓ ମାଳତୀ ଦେବୀଙ୍କର ସୁକନ୍ୟା କୃଷ୍ଣା ମହାନ୍ତି ଚରଖାରେ ସୂତା କାଟି ପିତାଙ୍କୁ ଶ୍ରଦ୍ଧାଞ୍ଜଳି ପ୍ରଦାନ କରିଥିଲେ।ଏହି ଅବସରରେ ଡ଼ ଚୈତନ୍ୟ ସାହୁଙ୍କ ଯୁଗସ୍ରଷ୍ଟା ମଧୁସୂଦନ ଅତିଥିମାନଙ୍କ ଦ୍ୱାରା ଉନ୍ମୋଚିତ ହୋଇଥିଲା . ଜିଲ୍ଲା ପ୍ରଶାସନ ପକ୍ଷରୁ ନବକୃଷ୍ଣ ଜୟନ୍ତୀ ଅବସରରେ ହୋଇଥିବା ବିଭିନ୍ନ ପ୍ରତିଯୋଗୀତାରେ ଉତ୍ତୀର୍ଣ୍ଣ ଛାତ୍ରଛାତ୍ରୀମାନଙ୍କୁ ସମ୍ମାନିତ କରାଯାଇଥିଲା . ଜିଲ୍ଲା ସୂଚନା ଲୋକସମ୍ପର୍କ ଅଧିକାରୀ ଜୟଜିତ ଧଳ କାର୍ଯ୍ୟକ୍ରମର ସଂଚାଳନ କରିଥିଲେ . ଅନ୍ୟମାନଙ୍କ ମଧ୍ୟରେ କୈଳାଶ ଚନ୍ଦ୍ର ସାହୁ, ସୂର୍ଯ୍ୟ ନାରାୟଣ ନାଥ, ଆନନ୍ଦ ଚନ୍ଦ୍ର ମହାପାତ୍ର, ଆଦ୍ୟଶ୍ଳୋକ ମିଶ୍ର, ଡ଼ ବିକ୍ରମ କେଶରୀ ଦାଶ, ଅକ୍ଷୟ ପଟ୍ଟନାୟକ, ଡ଼ କୁଳମଣି ନାୟକ, ଶିବରାମ ମିଶ୍ର ପ୍ରମୁଖ କାର୍ଯ୍ୟକ୍ରମରେ ସହଯୋଗ କରିଥିଲେ . ଶେଷରେ ନବଜୀବନ ମଣ୍ଡଳର ସମ୍ପାଦକ ମୁରଲୀଧର ମୂଳିଆ ଧନ୍ୟବାଦ ଅର୍ପଣ କରିଥିଲେ .
ପୂର୍ବାହ୍ନରେ ସ୍ଥାନୀୟ ସଭାଘର ଠାରେ ଅତିରିକ୍ତ ଜିଲ୍ଲାପାଳ ଶ୍ରୀ ଉଦୟ କୁମାର ମହାପାତ୍ର ମହାନ ଜନନାୟକ ନବକୃଷ୍ଣ ଚୌଧୁରୀଙ୍କ ପ୍ରତିମୂର୍ତ୍ତି ରେ ମାଲ୍ୟାର୍ପଣ କରିଥିଲେ।ଏହି କାର୍ଯ୍ୟକ୍ରମରେ ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ଶ୍ରୀ ଜୟଜିତ ଧଳ , ଜିଲ୍ଲା କ୍ରୀଡା ଅଧିକାରୀ ଶ୍ରୀ ଅକ୍ଷୟ କୁମାର ସିଠ ଙ୍କ ସମେତ ଜିଲ୍ଲା ସ୍ତରୀୟ ଅଧିକାରୀ ଓ ବାଜିରାଉତ ଛାତ୍ରାବାସ ର ଅନ୍ତେବାସୀ ପ୍ରମୁଖ ଉପସ୍ଥିତ ଥିଲେ।
