ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜର ଚତୁର୍ଥ ମ୍ୟାଚ୍ ବିଶାଖାପଟନମ ACA-VDCA କ୍ରିକେଟ ଷ୍ଟାଡିୟମରେ ଖେଳାଯାଇଥିଲା। ଏହି ମ୍ୟାଚରେ ନ୍ୟୁଜିଲାଣ୍ଡ ଚମତ୍କାର ପ୍ରଦର୍ଶନ କରି ସିରିଜର ପ୍ରଥମ ବିଜୟ ହାସଲ କରିଛି। ଅଭିଷେକ ଓ ଅଧିନାୟକ ସୂର୍ଯ୍ୟ ବିଫଳ ହେବାର ପରିଣାମ ଭାରତକୁ ଭୋଗିବାକୁ ପଡ଼ିଛି।
ଟସ୍ ହାରିଥିଲେ ମଧ୍ୟ ନ୍ୟୁଜିଲାଣ୍ଡ ୨୧୫ ରନର ବିଶାଳ ସ୍କୋର କରିଥିଲା। ଏହା ପରେ ବୋଲରଙ୍କ ଦମଦାର ପ୍ରଦର୍ଶନ ବଳରେ କିୱି ଘରୋଇ ଭାରତକୁ ଚତୁର୍ତ ମ୍ୟାଚରେ ୫୦ ରନରେ ହରାଇଛି। ମୁକାବିଲାରେ ଶିବମ ଦୁବେଙ୍କ ୧୫ ବଲରୁ ଅର୍ଦ୍ଧଶତକୀୟ ଇନିଂସ ବୃଥା ହୋଇଛି।
ଟସ୍ ହାରିବା ପରେ, ନ୍ୟୁଜିଲାଣ୍ଡ ପ୍ରଥମେ ବ୍ୟାଟିଂ କରି ୨୦ ଓଭରରେ ୨୧୫ ରନର ଏକ ବଡ଼ ସ୍କୋର କରିଥିଲା। ଓପନର ଟିମ୍ ସେଇଫର୍ଟ ୩୬ ବଲରୁ ୬୨ ରନ ସଂଗ୍ରହ କରିଥିଲେ। ଡେଭନ କନୱେ ୨୩ ବଲରୁ ୪୪ ରନର ଉପଯୋଗୀ ଇନିଂସ ଖେଳିଥିଲେ। ପ୍ରଥମ ୱିକେଟ ପାଇଁ ଦୁହେଁ ଏକ ଦ୍ରୁତ ଆରମ୍ଭ ଦେଇଥିଲେ। ପରେ, ଡାରିଲ ମିଚେଲ ୧୮ ବଲରୁ ଅପରାଜିତ ୩୯ ରନ କରି ସ୍କୋରକୁ ୨୦୦ ଅତିକ୍ରମ କରାଇଥିଲେ। ଭାରତ ପକ୍ଷରୁ ଅର୍ଶଦୀପ ସିଂହ ଏବଂ କୁଲଦୀପ ଯାଦବ ଦୁଇଟି ଲେଖାଏଁ ୱିକେଟ ନେଇଥିଲେ।
୨୧୬ ରନର ବିଜୟ ଲକ୍ଷ୍ୟ ପିଛା କରିଥିବା ଭାରତର ଆରମ୍ଭ ନୈରାଶ୍ୟଜନକ ଥିଲା। ଅଭିଷେକ ଶର୍ମା ପ୍ରଥମ ବଲ୍ରେ ଗୋଲ୍ଡେନ ଡକରେ ଆଉଟ୍ ହୋଇଥିଲେ। ଅଧିନାୟକ ସୂର୍ଯ୍ୟକୁମାର ଯାଦବ ମଧ୍ୟ ଶୀଘ୍ର ବିଦାୟ ନେଇଥିଲେ। ସଞ୍ଜୁ ସାମସନ୍ ୧୫ ବଲ୍ରେ କେବଳ ୨୪ ରନ୍ କରିପାରିଥିଲେ। ଟପ୍ ଅର୍ଡର ଭାଙ୍ଗିବା ପରେ, ଶିବମ୍ ଦୁବେ ପୁଣି ଥରେ ମଧ୍ୟକ୍ରମରେ ବିସ୍ଫୋରକ ବ୍ୟାଟିଂ କରି ୨୩ ବଲ୍ରେ ୬୫ ରନ୍ କରିଥିଲେ। ଏହି ଇନିଂସରେ ତାଙ୍କୁ ଅନ୍ୟ ପାର୍ଶ୍ଵରୁ ସମର୍ଥନ ନ ମିଳିବାରୁ ଦଳ ଚାପରେ ରହିଥିଲା। ରିଙ୍କୁ ସିଂହ ୩୦ ବଲ୍ରେ ୩୯ ରନ୍ କରିଥିଲେ। ଶେଷରେ, ଭାରତୀୟ ଦଳ ୧୮.୪ ଓଭରରେ ୧୬୫ ରନରେ ଅଲ୍ଆଉଟ୍ ହୋଇଯାଇଥିଲା।
ନ୍ୟୁଜିଲାଣ୍ଡ ପକ୍ଷରୁ ଅଧିନାୟକ ମିଚେଲ ସାଣ୍ଟନର ସର୍ବାଧିକ ୩ଟି ୱିକେଟ ନେଇଥିଲେ। ଇଶ ସୋଢି ଏବଂ ଜାକବ ଡଫି ମଧ୍ୟ ଦୁଇଟି ଲେଖାଏଁ ୱିକେଟ ନେଇଥିଲେ। ଏହି ବିଜୟ କେବଳ ସିରିଜରେ ନ୍ୟୁଜିଲାଣ୍ଡର ସମ୍ମାନ ରକ୍ଷା କରିନଥିଲା ବରଂ ସେମାନଙ୍କର ଆତ୍ମବିଶ୍ଵାସକୁ ମଧ୍ୟ ବୃଦ୍ଧି କରିଥିଲା।
