ଭୁବନେଶ୍ୱର: ଆଗାମୀ ପିଢ଼ିକୁ ମାର୍ଗଦର୍ଶନ କରିବାରେ ପୂର୍ବତନ ଛାତ୍ର ସଂଘର ବିଶେଷ ଭୂମିକା ରହିଛି ଏବଂ ସେମାନଙ୍କର ଅଭିଜ୍ଞତା, ଜ୍ଞାନ ଓ ଦୃଷ୍ଟିକୋଣ ଯୁବ ଛାତ୍ରଛାତ୍ରୀଙ୍କ ପାଇଁ ଅମୂଲ୍ୟ ସମ୍ପଦ ବୋଲି ମାନ୍ୟବର ରାଜ୍ୟପାଳ ଡ଼. ହରି ବାବୁ କମ୍ଭମପାଟି କହିଛନ୍ତି I ଆଜି ଓୟୁଏଟିର ପଶୁ ଚିକିତ୍ସା ଓ ପଶୁପାଳନ ମହାବିଦ୍ୟାଳୟର ସମ୍ମିଳନୀ କକ୍ଷରେ ଜେଏନୟୁ ଓଡ଼ିଶା ଆଲୁମ୍ନି ସଂଘର ବାର୍ଷିକ ସମ୍ମିଳନୀରେ ମୁଖ୍ୟ ଅତିଥି ଭାବେ ଯୋଗ ଦେଇ ରାଜ୍ୟପାଳ ଏହି ବାର୍ତ୍ତା ଦେଇଛନ୍ତି I ଏହି ଅବସରରେ ରାଜ୍ୟର ମାନ୍ୟବର ପ୍ରଥମ ମହିଳା ଶ୍ରୀମତୀ ଜୟଶ୍ରୀ କମ୍ଭମପାଟି ମଧ୍ୟ ଉପସ୍ଥିତ ଥିଲେ I ଏହି ଅବସରରେ ଉଦବୋଧନ ଦେଇ ରାଜ୍ୟପାଳ କହିଥିଲେ ଯେ, ଜବାହରଲାଲ ନେହେରୁ ବିଶ୍ୱବିଦ୍ୟାଳୟ (ଜେଏନୟୁ) ଦଶନ୍ଧି ଦଶନ୍ଧି ଧରି ଭାରତର ପ୍ରମୁଖ ଉଚ୍ଚଶିକ୍ଷା ପ୍ରତିଷ୍ଠାନ ଭାବେ ପ୍ରତିଷ୍ଠିତ ହୋଇଛି।
ଏହା କେବଳ ଶିକ୍ଷାଗତ ଶ୍ରେଷ୍ଠତ୍ୱ ପାଇଁ ନୁହେଁ ବରଂ ସମାଲୋଚନାତ୍ମକ ଚିନ୍ତାଧାରା, ବିଚାରର ଉନ୍ମୁକ୍ତତା ଏବଂ ଗଭୀର ସାମାଜିକ ଦାୟିତ୍ୱବୋଧ ପାଇଁ ମଧ୍ୟ ପରିଚିତ। ଜେଏନୟୁ ସର୍ବଦା ଛାତ୍ରଛାତ୍ରୀମାନଙ୍କୁ ପ୍ରଶ୍ନ କରିବା, ଚିନ୍ତନ କରିବା ଏବଂ ବିଶ୍ୱ ସହିତ ଅର୍ଥପୂର୍ଣ୍ଣ ଭାବେ ଯୋଡ଼ି ହେବାକୁ ପ୍ରୋତ୍ସାହିତ କରିଆସିଛି। ଏହି ଗୁଣାବଳୀ ଯେକୌଣସି ମହାନ ପ୍ରତିଷ୍ଠାନର ପ୍ରକୃତ ଶକ୍ତି ଏବଂ ଜେଏନୟୁ ଏହାକୁ ନିରନ୍ତର ବଜାୟ ରଖିଆସିଛି।
ରାଜ୍ୟପାଳ ଏହା ମଧ୍ୟ କହିଥିଲେ ଯେ, ଜେଏନୟୁର ପୂର୍ବତନ ଛାତ୍ରଛାତ୍ରୀମାନେ ଏହି ସମୃଦ୍ଧ ଐତିହ୍ୟର ସାକ୍ଷୀ ସ୍ୱରୂପ। ବିଶ୍ୱବ୍ୟାପୀ ଜେଏନୟୁ ସ୍ନାତକମାନେ ବିଭିନ୍ନ କ୍ଷେତ୍ର ଯଥା ଶିକ୍ଷା, ଲୋକ ସେବା, ଲୋକନୀତି, ବିଜ୍ଞାନ, ଗଣମାଧ୍ୟମ, ସାହିତ୍ୟ, କୂଟନୀତି ଆଦି କ୍ଷେତ୍ରରେ ଉଲ୍ଲେଖନୀୟ ଅବଦାନ ରଖିଛନ୍ତି । ସେମାନଙ୍କର ସଫଳତା କେବଳ ବ୍ୟକ୍ତିଗତ ଶ୍ରେଷ୍ଠତ୍ୱ ନୁହେଁ ବରଂ ବୃହତ୍ତର ସାମାଜିକ ଲକ୍ଷ୍ୟ ପ୍ରତି ପ୍ରତିବଦ୍ଧତାକୁ ପ୍ରତିଫଳିତ କରେ। ଏହି ଗୋଷ୍ଠୀ ରାଷ୍ଟ୍ର ନିର୍ମାଣ, ବିଚାରଧାରା ଗଠନ ଏବଂ ଜାତୀୟ ତଥା ଆନ୍ତର୍ଜାତିୟସ୍ତରରେ ଅଗ୍ରଗତିରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରି ଆସିଛନ୍ତି ବୋଲି ରାଜ୍ୟପାଳ ଅବତାରଣା କରିଥିଲେ। ଓଡ଼ିଶାରେ ଏପରି ଏକ ପ୍ରତିଷ୍ଠିତ ଏବଂ ଜୀବନ୍ତ ପୂର୍ବତନ ଛାତ୍ର ସଂଘର ଉପସ୍ଥିତି ଗର୍ବର ବିଷୟ ବୋଲି ରାଜ୍ୟପାଳ କହିଥିଲେ। ସେମାନଙ୍କ ଭଳି ପୂର୍ବତନ ଛାତ୍ର ସଂଘ ଅତୀତ ଓ ଭବିଷ୍ୟତ ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ସେତୁ ଭାବେ କାର୍ଯ୍ୟ କରେ। ଏହି ସଂଘ ସହଯୋଗ, ମାର୍ଗଦର୍ଶନ ଏବଂ ସେବା ପାଇଁ ସୁଯୋଗ ସୃଷ୍ଟି କରିବା ସହିତ ଅଭିଜ୍ଞତା ଓ ଆକାଂକ୍ଷା, ଜ୍ଞାନ ଓ ଊର୍ଜାକୁ ଏକତ୍ରିତ କରେ। ଭବିଷ୍ୟତ ପିଢ଼ିକୁ ମାର୍ଗଦର୍ଶନ କରିବାରେ ପୂର୍ବତନ ଛାତ୍ର ସଂଘର ଅଭିଜ୍ଞତା, ଜ୍ଞାନ ଏବଂ ଅନ୍ତର୍ଦୃଷ୍ଟି ଯୁବ ଛାତ୍ରମାନଙ୍କ ପାଇଁ ଅମୂଲ୍ୟ ସମ୍ପଦ। ସେମାନଙ୍କୁ ପରାମର୍ଶ ଦେଇ ପୂର୍ବତନ ଛାତ୍ର ସଂଘ କେବଳ ବ୍ୟକ୍ତିଗତ ବୃତ୍ତି ନୁହେଁ ବରଂ ସମାଜର ଭବିଷ୍ୟତକୁ ମଧ୍ୟ ଗଢ଼ିବାରେ ସାହାଯ୍ୟ କରନ୍ତି। ଏପରି ସମ୍ପର୍କ ଶିକ୍ଷାର ମୂଳଦୁଆକୁ ମଜବୁତ କରେ ଏବଂ ଶିକ୍ଷାକୁ ଶ୍ରେଣୀଗୃହ ବାହାରେ ବାସ୍ତବ ଜୀବନର ପ୍ରଭାବ ପର୍ଯ୍ୟନ୍ତ ପହଞ୍ଚାଇବା ସୁନିଶ୍ଚିତ କରେ।
ଓଡ଼ିଶା ଆଜି ବିକାଶ ଯାତ୍ରାର ଏକ ଗୁରୁତ୍ୱପୂର୍ଣ୍ଣ ପର୍ଯ୍ୟାୟରେ ପହଂଚିଛି। ଏହାର ସମୃଦ୍ଧ ସାଂସ୍କୃତିକ ଐତିହ୍ୟ ଏବଂ ଉନ୍ନୀତ ଆକାଂକ୍ଷା ସହିତ ଶିକ୍ଷା, ଭିତ୍ତିଭୂମି, ପ୍ରଯୁକ୍ତିବିଦ୍ୟା ଏବଂ ସାମାଜିକ କଲ୍ୟାଣ ଭଳି କ୍ଷେତ୍ରରେ ପ୍ରଗତି କରୁଛି। ତଥାପି ସମାବେଶୀ ଏବଂ ସ୍ଥାୟୀ ବିକାଶର ପଥ ପାଇଁ ସାମୂହିକ ପ୍ରୟାସ ଆବଶ୍ୟକ ବୋଲି ରାଜ୍ୟପାଳ କହିଥିଲେ। ଏହି ଦିଗରେ ପୂର୍ବତନ ଛାତ୍ର ସଂଘର ସଦସ୍ୟମାନଙ୍କୁ ରାଜ୍ୟର ବିକାଶରେ ସକ୍ରିୟ ଭାବରେ ଯୋଗଦାନ ଦେବାକୁ ରାଜ୍ୟପାଳ ଆହ୍ୱାନ ଦେଇଥିଲେ। ସେମାନଙ୍କର ଯୋଗଦାନ ସୁଯୋଗ ସୃଷ୍ଟି କରିବା ସହିତ ଯୁବ ଗୋଷ୍ଠୀକୁ ପ୍ରେରଣା ଦେବ ଏବଂ ଅଭିନବ ସମାଧାନ ସହିତ ସମୟର ଆହ୍ୱାନକୁ ମୁକାବିଲା କରିବାରେ ସାହାଯ୍ୟ କରିପାରିବ ବୋଲି ରାଜ୍ୟପାଳ ଆଶା ବ୍ୟକ୍ତ କରିଥିଲେ। ଏହି ଅବସରରେ ଓଡ଼ିଶାର ମୁଖ୍ୟ ସୂଚନା କମିଶନର ଶ୍ରୀ ମନୋଜ କୁମାର ପରିଡ଼ା ଓ ଓୟୁଏଟିର କୁଳପତି ଡ଼. ପ୍ରଭାତ କୁମାର ରାଉଳ ବକ୍ତବ୍ୟ ପ୍ରଦାନ କରିଥିଲେ । ସଂଘର ସଭାପତି ଶ୍ରୀ ସଂଗ୍ରାମ କେଶରୀ ମହାପାତ୍ର ସ୍ୱାଗତ ଭାଷଣ ପ୍ରଦାନ କରିଥିବା ବେଳେ ସାଧାରଣ ସମ୍ପାଦକ ଡ଼. ମାନସ ରଞ୍ଜନ ନନ୍ଦ ଧନ୍ୟବାଦ ଅର୍ପଣ କରିଥିଲେ I ଉକ୍ତ ସଭାରେ ଅତିଥିଙ୍କ ଦ୍ୱାରା ସଂଘର ସ୍ମରଣିକା ମଧ୍ୟ ଉନ୍ମୋଚନ କରାଯାଇଥିଲା I
