ହେଡଲାଇନ୍:
ଅବକାରୀ ମାମଲାରେ CBIର ଚ୍ୟାଲେଞ୍ଜକୁ ଖାରଜ ଦାବି, ଦିଲ୍ଲୀ ହାଇକୋର୍ଟଙ୍କ ଦ୍ୱାରସ୍ଥ କେଜ୍ରିୱାଲ-ସିସୋଦିଆ
ନୂଆଦିଲ୍ଲୀ: ଦିଲ୍ଲୀର ତଥାକଥିତ ଅବକାରୀ ନୀତି ମାମଲାରେ ନୂଆ ମୋଡ଼ ଆସିଛି। ମାମଲାରେ ଡିସ୍ଚାର୍ଜ ଆଦେଶକୁ ଚ୍ୟାଲେଞ୍ଜ କରି CBI ଦାଖଲ କରିଥିବା ରିଭିଜନ୍ ପିଟିସନ୍କୁ ଖାରଜ କରିବାକୁ ଦିଲ୍ଲୀ ହାଇକୋର୍ଟଙ୍କ ନିକଟରେ ଦାବି କରିଛନ୍ତି ଆମ୍ ଆଦମୀ ପାର୍ଟିର ନେତା ଅରବିନ୍ଦ କେଜ୍ରିୱାଲ ଓ ମନୀଷ ସିସୋଦିଆ।
ଦୁଇ ନେତା ପୃଥକ ଆବେଦନ ଦାଖଲ କରି CBIର ରିଭିଜନ୍ ପିଟିସନ୍ର ଗ୍ରହଣୀୟତା ଉପରେ ପ୍ରଶ୍ନ ଉଠାଇଛନ୍ତି। CBI ଏହି ଆବେଦନକୁ ଅତ୍ୟନ୍ତ ତରବରିଆ ଏବଂ ଗୁରୁତ୍ୱହୀନ ଭାବେ ଦାଖଲ କରିଥିବା ସେମାନେ ଅଭିଯୋଗ କରିଛନ୍ତି।
କେଜ୍ରିୱାଲ ଓ ସିସୋଦିଆଙ୍କ ଆବେଦନରେ କୁହାଯାଇଛି ଯେ, ବିଶେଷ ଅଦାଲତ ଡିସ୍ଚାର୍ଜ ଆଦେଶ ଦେବାର ମାତ୍ର ଚାରି ଘଣ୍ଟା ମଧ୍ୟରେ CBI ରିଭିଜନ୍ ପିଟିସନ୍ ଦାଖଲ କରିଥିଲା। ୫୦୦ରୁ ଅଧିକ ପୃଷ୍ଠାର ଡିସ୍ଚାର୍ଜ ରାୟକୁ ଏତେ କମ୍ ସମୟ ମଧ୍ୟରେ ଅନୁଧ୍ୟାନ କରି CBI ଚ୍ୟାଲେଞ୍ଜ କରିଥିବାରୁ ଏହା ଏଜେନ୍ସିର ତରବରିଆ ଆଭିମୁଖ୍ୟକୁ ଦର୍ଶାଉଛି ବୋଲି ସେମାନେ ଦାବି କରିଛନ୍ତି।
ଆବେଦନରେ ଆହୁରି କୁହାଯାଇଛି ଯେ CBIର ରିଭିଜନ୍ ପିଟିସନ୍ ଅତ୍ୟନ୍ତ ସଂକ୍ଷିପ୍ତ ଓ ଅସ୍ପଷ୍ଟ ଥିବାରୁ ତାହାରେ ଏଜେନ୍ସି ପ୍ରକୃତରେ କେଉଁ ଆଧାରରେ ଡିସ୍ଚାର୍ଜ ଆଦେଶକୁ ଚ୍ୟାଲେଞ୍ଜ କରୁଛି, ତାହା ସ୍ପଷ୍ଟ ହେଉନାହିଁ।
ତେଣୁ CBIର ଆବେଦନକୁ ଗ୍ରହଣ ନକରି ଖାରଜ କରିବାକୁ ଦିଲ୍ଲୀ ହାଇକୋର୍ଟଙ୍କ ନିକଟରେ କେଜ୍ରିୱାଲ ଓ ସିସୋଦିଆ ଦାବି କରିଛନ୍ତି। ଏହି ଆଇନଗତ ଲଢ଼େଇ ଆଗକୁ କେଉଁ ଦିଗକୁ ଯାଉଛି, ଏବେ ତାହା ଉପରେ ନଜର ରହିଛି।
