ହେଡଲାଇନ୍:
ସୁରକ୍ଷା ଓ ଭିତ୍ତିଭୂମି ସମସ୍ୟା: ଦିଲ୍ଲୀରେ ଭାଙ୍ଗିବ ୩୪ ସରକାରୀ ସ୍କୁଲ୍, ୨୭ ନୂଆ ସ୍କୁଲ୍ ପାଇଁ ୯୦୦ କୋଟି
ନୂଆଦିଲ୍ଲୀ, ଅଗଷ୍ଟ ୧୩: ଛାତ୍ରଛାତ୍ରୀଙ୍କ ସୁରକ୍ଷା ଓ ସ୍କୁଲ୍ ଭିତ୍ତିଭୂମିକୁ ନେଇ ବଡ଼ ପଦକ୍ଷେପ ନେଇଛି ଦିଲ୍ଲୀ ସରକାର। ସହରର ୩୪ଟି ସରକାରୀ ସ୍କୁଲ୍କୁ ଭାଙ୍ଗି ନୂଆ ଭାବେ ନିର୍ମାଣ କରାଯିବ। ଏଥିସହ ବିଭିନ୍ନ ସ୍ଥାନରେ ୨୭ଟି ନୂଆ ସ୍କୁଲ୍ ବିଲ୍ଡିଂ ନିର୍ମାଣ ହେବ ବୋଲି ଜଣେ ସରକାରୀ ଅଧିକାରୀ ସୂଚନା ଦେଇଛନ୍ତି।
ଖାଲି ପଡ଼ିଥିବା ସରକାରୀ ଜମିରେ ନୂଆ ସ୍କୁଲ୍ ଭବନ ନିର୍ମାଣ ପାଇଁ ପ୍ରାୟ ୯୦୦ କୋଟି ଟଙ୍କା ଖର୍ଚ୍ଚ ହେବ। ଏହି ପ୍ରକଳ୍ପଗୁଡ଼ିକୁ ପାଞ୍ଚଟି ଭୌଗୋଳିକ କ୍ଲଷ୍ଟରରେ ବିଭକ୍ତ କରାଯାଇଛି। ଫଳରେ ନିର୍ମାଣ କାର୍ଯ୍ୟର ଶୀଘ୍ର ରୂପାୟଣ ସହ ନିୟମିତ ତଦାରଖ ସମ୍ଭବ ହେବ।
ଅଧିକାରୀଙ୍କ ସୂଚନା ଅନୁଯାୟୀ, ନୂଆ ସ୍କୁଲ୍ ଭବନଗୁଡ଼ିକର ନିର୍ମାଣ ୧୮ ମାସ ମଧ୍ୟରେ ସମ୍ପୂର୍ଣ୍ଣ କରିବାର ଲକ୍ଷ୍ୟ ରହିଛି।
ଅନ୍ୟପକ୍ଷରେ, ଭାଙ୍ଗିବାକୁ ଚିହ୍ନଟ ହୋଇଥିବା ୩୪ଟି ସ୍କୁଲ୍ ମଧ୍ୟରୁ ୧୬ଟିରେ ନିର୍ମାଣ କାର୍ଯ୍ୟ ଆରମ୍ଭ ହୋଇସାରିଛି, ଯେତେବେଳେ ଆଉ ୯ଟି ସ୍କୁଲ୍ ସମ୍ପର୍କିତ ପ୍ରସ୍ତାବକୁ ଅନୁମୋଦନ ମିଳିଛି।
କେତେକ ସ୍କୁଲ୍ରେ ବର୍ଷା ସମୟରେ ଜଳବନ୍ଦୀ ସମସ୍ୟା ଦେଖାଦେଉଥିବା ବେଳେ ଅନ୍ୟ କେତେକ ସ୍ଥାନରେ ଭିତ୍ତିଭୂମି ଓ ସୁରକ୍ଷା ସମ୍ପର୍କିତ ସମସ୍ୟା ରହିଛି। କେତେକ ସ୍କୁଲ୍ ଛାତ୍ରଛାତ୍ରୀଙ୍କ ପାଇଁ ଅନୁପଯୁକ୍ତ ସ୍ଥାନରେ ଥିବାରୁ ସେଗୁଡ଼ିକୁ ଭାଙ୍ଗି ନୂଆ ଭବନ ନିର୍ମାଣ ନିଷ୍ପତ୍ତି ନିଆଯାଇଛି।
ସରକାରଙ୍କ ଏହି ପଦକ୍ଷେପର ଲକ୍ଷ୍ୟ ହେଉଛି ଦିଲ୍ଲୀର ସରକାରୀ ସ୍କୁଲ୍ଗୁଡ଼ିକୁ ଅଧିକ ସୁରକ୍ଷିତ, ଆଧୁନିକ ଓ ଛାତ୍ରବନ୍ଧବ କରିବା।
