ଡିଗ୍ରୀ ଖୋଲିବ ଦ୍ୱାର, ନିଷ୍ପତ୍ତି ଗଢ଼ିବ ଜୀବନ: ରାଜ୍ୟପାଳ
ଗଙ୍ଗାଧର ମେହେର ବିଶ୍ୱବିଦ୍ୟାଳୟ ସମାବର୍ତ୍ତନ ସମାରୋହରେ ଯୁବପିଢ଼ିକୁ ଆହ୍ୱାନ
ଭୁବନେଶ୍ୱର: ଡିଗ୍ରୀ ହାସଲ କରିବା ହେଉଛି ଜୀବନର ଏକ ନୂଆ ଅଧ୍ୟାୟର ଆରମ୍ଭ। ଡିଗ୍ରୀ ସୁଯୋଗର ଦ୍ୱାର ଖୋଲିଦିଏ, କିନ୍ତୁ ଜୀବନର ଦିଗ ନିର୍ଦ୍ଧାରଣ କରେ ନିଜର ନିଷ୍ପତ୍ତି—ଏଭଳି ବାର୍ତ୍ତା ଦେଇଛନ୍ତି ଓଡ଼ିଶାର ରାଜ୍ୟପାଳ ଡ. ହରି ବାବୁ କମ୍ଭମପାଟି।
ସୋମବାର ଗଙ୍ଗାଧର ମେହେର ବିଶ୍ୱବିଦ୍ୟାଳୟର ସମାବର୍ତ୍ତନ ସମାରୋହରେ ଯୋଗଦେଇ ସେ ସ୍ନାତକ ଛାତ୍ରଛାତ୍ରୀଙ୍କୁ ପରିବର୍ତ୍ତନଶୀଳ ବିଶ୍ୱର ଚାହିଦା ଅନୁଯାୟୀ ନିଜକୁ ପ୍ରସ୍ତୁତ କରିବାକୁ କହିଥିଲେ। ନିରନ୍ତର ଶିକ୍ଷା, ନୂଆ ପରିବର୍ତ୍ତନ ସହ ଖାପ ଖୁଆଇବା, ପ୍ରଯୁକ୍ତି ଜ୍ଞାନ ଓ ଉଦ୍ୟୋଗୀ ଦକ୍ଷତା ହାସଲ ଉପରେ ସେ ଗୁରୁତ୍ୱ ଦେଇଥିଲେ।
ରାଜ୍ୟପାଳ କହିଥିଲେ, ଆଧୁନିକ ବିଶ୍ୱରେ ସେହି ବ୍ୟକ୍ତିମାନେ ଆଗକୁ ବଢ଼ିବେ, ଯେଉଁମାନେ ନିରନ୍ତର ଶିଖିବା, ପୁରୁଣା ଧାରଣାକୁ ପରିତ୍ୟାଗ କରିବା ଏବଂ ନୂଆ କିଛି ଶିଖିବାର କ୍ଷମତା ରଖିବେ।
ଯୁବପିଢ଼ି ପାଇଁ ନୂଆ ସୁଯୋଗ
ଭାରତ ଆତ୍ମବିଶ୍ୱାସର ସହ ଦ୍ରୁତ ଗତିରେ ଆଗକୁ ବଢ଼ୁଥିବା ଉଲ୍ଲେଖ କରି ରାଜ୍ୟପାଳ କହିଥିଲେ ଯେ ୨୦୨୬-୨୭ ଆର୍ଥିକ ବର୍ଷର ପ୍ରଥମ ତିନି ମାସରେ ଦେଶର ପ୍ରକୃତ ଜିଡିପି ଅଭିବୃଦ୍ଧି ୭.୮ ପ୍ରତିଶତ ରହିବା ଆକଳନ କରାଯାଇଛି। ସେମିକଣ୍ଡକ୍ଟର, ଇଲେକ୍ଟ୍ରୋନିକ୍ସ, ମହାକାଶ, ଡିଜିଟାଲ ପ୍ରଯୁକ୍ତି, ଉତ୍ପାଦନ, ସ୍ୱାସ୍ଥ୍ୟସେବା, କୃଷି ଓ ଅକ୍ଷୟ ଶକ୍ତି ଭଳି କ୍ଷେତ୍ରରେ ଯୁବପିଢ଼ି ପାଇଁ ବ୍ୟାପକ ସୁଯୋଗ ସୃଷ୍ଟି ହେଉଛି।
ଜାତୀୟ ଶିକ୍ଷା ନୀତି-୨୦୨୦ ସାମଗ୍ରିକ, ବହୁବିଷୟକ, ଅନୁଭୂତିଭିତ୍ତିକ ଓ ଦକ୍ଷତାଭିତ୍ତିକ ଶିକ୍ଷାକୁ ପ୍ରାଥମିକତା ଦେଉଥିବା ସେ କହିଥିଲେ। ଶିକ୍ଷା ଓ ଦକ୍ଷତା ବିକାଶ କ୍ଷେତ୍ରରେ ନୀତିକୁ ଆଗକୁ ନେବାରେ ପୂର୍ବତନ କେନ୍ଦ୍ରମନ୍ତ୍ରୀ ତଥା ସମ୍ବଲପୁର ସାଂସଦ ଧର୍ମେନ୍ଦ୍ର ପ୍ରଧାନଙ୍କ ଅବଦାନକୁ ମଧ୍ୟ ସେ ପ୍ରଶଂସା କରିଥିଲେ।
ପଶ୍ଚିମ ଓଡ଼ିଶାର ଐତିହ୍ୟ ସୁରକ୍ଷା ଉପରେ ଗୁରୁତ୍ୱ
ସ୍ୱଭାବ କବି ଗଙ୍ଗାଧର ମେହେରଙ୍କୁ ଶ୍ରଦ୍ଧାଞ୍ଜଳି ଜଣାଇ ରାଜ୍ୟପାଳ ପଶ୍ଚିମ ଓଡ଼ିଶାର ହସ୍ତତନ୍ତ, ହସ୍ତଶିଳ୍ପ, ଲୋକପରମ୍ପରା ଓ ପାରମ୍ପରିକ ଜ୍ଞାନକୁ ବିଶ୍ୱସ୍ତରରେ ପହଞ୍ଚାଇବା ଦିଗରେ ବିଶ୍ୱବିଦ୍ୟାଳୟର ଭୂମିକା ଉପରେ ଜୋର ଦେଇଥିଲେ।
କାରିଗର, ଡିଜାଇନର, ପ୍ରଯୁକ୍ତିବିଦ୍, ଉଦ୍ୟୋଗୀ ଓ ଛାତ୍ରଛାତ୍ରୀଙ୍କୁ ଏକାଠି କରି ପାରମ୍ପରିକ କଳା ସହ ଡିଜାଇନ୍ ଚିନ୍ତନ, ଡିଜିଟାଲ ମାର୍କେଟିଂ ଓ ଇ-କମର୍ସକୁ ଯୋଡ଼ିବା ଆବଶ୍ୟକ ବୋଲି ସେ କହିଥିଲେ।
ସେହିପରି ସୌର ଓ ପବନ ଶକ୍ତି, ଗ୍ରୀନ୍ ହାଇଡ୍ରୋଜେନ୍, ଶକ୍ତି ସଂରକ୍ଷଣ, ଇଲେକ୍ଟ୍ରିକ୍ ମୋବିଲିଟି, ବାୟୋଏନର୍ଜି ଓ ଶକ୍ତି ଦକ୍ଷତା ଭଳି କ୍ଷେତ୍ରରେ ଯୁବପିଢ଼ି ନୂଆ ସୁଯୋଗ ଖୋଜିବାକୁ ସେ ଆହ୍ୱାନ ଦେଇଥିଲେ।
ଲୋକଭବନକୁ IGBC ଗ୍ରୀନ୍ କ୍ୟାମ୍ପସ୍ ରେଟିଂରେ ପ୍ଲାଟିନମ୍ ସାର୍ଟିଫିକେସନ୍ ମିଳିଥିବା ଉଲ୍ଲେଖ କରି ରାଜ୍ୟପାଳ କହିଥିଲେ, ସ୍ଥାୟୀ ବିକାଶ କେବଳ ଏକ ଧାରଣା ନୁହେଁ; ଏହାକୁ ଶିକ୍ଷାନୁଷ୍ଠାନର ଦୈନନ୍ଦିନ କାର୍ଯ୍ୟରେ ମଧ୍ୟ ପ୍ରୟୋଗ କରାଯାଇପାରେ।
ସମାଜର ମଙ୍ଗଳରେ ଶିକ୍ଷାର ବ୍ୟବହାର କର
ସ୍ନାତକମାନଙ୍କୁ ନିଜ ଶିକ୍ଷା ଓ ଦକ୍ଷତାକୁ ସମାଜର ବୃହତ୍ତର ମଙ୍ଗଳରେ ବ୍ୟବହାର କରିବାକୁ ରାଜ୍ୟପାଳ ପରାମର୍ଶ ଦେଇଥିଲେ। ଓଡ଼ିଶାର ଐତିହ୍ୟକୁ ବିଶ୍ୱସ୍ତରରେ ପହଞ୍ଚାଇବା ସହ ବିଶ୍ୱର ଶ୍ରେଷ୍ଠ ଚିନ୍ତାଧାରାକୁ ଓଡ଼ିଶାକୁ ଆଣିବା ପାଇଁ ଯୁବପିଢ଼ି ଉଦ୍ୟମ କରିବା ଆବଶ୍ୟକ ବୋଲି ସେ କହିଥିଲେ।
ସମାରୋହରେ ପୂର୍ବତନ କେନ୍ଦ୍ରମନ୍ତ୍ରୀ ତଥା ସମ୍ବଲପୁର ସାଂସଦ ଧର୍ମେନ୍ଦ୍ର ପ୍ରଧାନ ଓ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ ଉଦ୍ବୋଧନ ଦେଇଥିଲେ। ବିଶ୍ୱବିଦ୍ୟାଳୟର କୁଳପତି ପ୍ରଫେସର ବ୍ୟୋମକେଶ ତ୍ରିପାଠୀ ସ୍ୱାଗତ ଭାଷଣ ପ୍ରଦାନ କରିଥିଲେ। ଏହି ଅବସରରେ କୃତୀ ଛାତ୍ରଛାତ୍ରୀଙ୍କୁ ରାଜ୍ୟପାଳ ବିଭିନ୍ନ ଡିଗ୍ରୀ ପ୍ରଦାନ କରିଥିଲେ।
