ସମ୍ବଲପୁରରେ ପୋଲିସ୍‌ ଏନକାଉଣ୍ଟର: କଫ୍‌ ସିରପ୍‌ ବେପାରୀ ଆହତ

🚨 ସମ୍ବଲପୁରରେ ପୋଲିସ୍‌ ଏନକାଉଣ୍ଟର: କଫ୍‌ ସିରପ୍‌ ବେପାରୀ ଆହତ

ସମ୍ବଲପୁର: କଫ୍‌ ସିରପ୍‌ ବେଆଇନ କାରବାର ଅଭିଯୋଗରେ ଜଣେ ବ୍ୟକ୍ତି ପୋଲିସ୍‌ ଏନକାଉଣ୍ଟରରେ ଆହତ ହୋଇଛନ୍ତି। ସମ୍ବଲପୁର ଜିଲ୍ଲା ରେଙ୍ଗାଲି ଥାନା ଅଧୀନ ଜଙ୍ଗଲା-ପାଣ୍ଡଲୋଇ ରାସ୍ତାରେ ଆଜି ସକାଳେ ଏହି ଘଟଣା ଘଟିଥିବା ଜଣାପଡ଼ିଛି।

ସୂଚନା ଅନୁସାରେ, ପୋଲିସ୍‌ ପକ୍ଷରୁ ନିୟମିତ ଯାନବାହନ ଯାଞ୍ଚ ଚାଲିଥିବା ବେଳେ ଏକ ନମ୍ବରବିହୀନ କାର୍‌ ଦ୍ରୁତ ଗତିରେ ଖସିଯିବାକୁ ଚେଷ୍ଟା କରିଥିଲା। ଏହି ସମୟରେ କାର୍‌ଟି ରାସ୍ତାକଡ଼ରେ ଥିବା ଏକ ଗଛରେ ଧକ୍କା ଖାଇଥିଲା।

ପୋଲିସ୍‌ ଟିମ୍‌ ଗାଡ଼ି ନିକଟକୁ ପହଞ୍ଚିବା ପରେ ଗାଡ଼ିରେ ଥିବା ବ୍ୟକ୍ତି ପୋଲିସ୍‌ ଉପରେ ଗୁଳି ଚଳାଇଥିବା ଅଭିଯୋଗ ହୋଇଛି। ଏହାପରେ ଆତ୍ମରକ୍ଷା ପାଇଁ ପୋଲିସ୍‌ ପାଲଟା ଗୁଳି ଚଳାଇଥିଲା। ପୋଲିସ୍‌ର ଗୁଳିରେ ଅଭିଯୁକ୍ତ ପ୍ରୀତମ ବିଶ୍ୱାଳଙ୍କ ଡାହାଣ ଗୋଡ଼ରେ ଗୁଳି ବାଜିଥିବା ସୂଚନା ମିଳିଛି।

ଆହତ ପ୍ରୀତମଙ୍କୁ ଚିକିତ୍ସା ପାଇଁ ରେଙ୍ଗାଲି ହସ୍ପିଟାଲରେ ଭର୍ତ୍ତି କରାଯାଇଛି।

ଘଟଣାସ୍ଥଳରୁ ପୋଲିସ୍‌ ଏକ ଦେଶୀ ବନ୍ଧୁକ ସହ ବିପୁଳ ପରିମାଣର କଫ୍‌ ସିରପ୍‌ ଜବତ କରିଛି। ଘଟଣା ସମ୍ପର୍କରେ ପୋଲିସ୍‌ ପକ୍ଷରୁ ଅଧିକ ତଦନ୍ତ ଜାରି ରହିଛି।